1 Samuel 2 in Sunwar
1 हान्नाहमी “आं थुं परमप्रभु यावे नु ग्येरसीब। गो परमप्रभु यावे आ पर्बम आं पिया पोक्नुङ। गो आं जोरी सत्रु आन कली ग्राती। गेम आं कली प्रोंइतीके गो ग्येरसाक्यी। लूका १:४६-५५
2 परमप्रभु यावे खोदेंशो अरु सुइ मबाक्नीम। इन क्येङा लाक्शो अर्को सुइ मबाक्नीम। आंइ परमप्रभु, सेरथे फुल्लु खोदेंशो अरु सुइ मबाक्नीम। ब्यवस्था ४:३५; उत्पत्ती ४९:२४; ब्यवस्था ३२:१८; भजन संग्रह १८:२२
3 ठेयब लेश्शो लोव़ नु मरिम्शो लोव़ पचा प्रोनीन। मारदे हना परमप्रभु यावे नेल्ल जोक्ब तुइक्ब बाक्ब। मेकोमी मुर आन पतीके नु लोव़ नेल्ले नाक्ब।
4 सक्ति पाइश्शो मुर आन लिब्रा जिक्शो बाक्ब। तन्न सक्ति मपाइश्शो बोल्यो दुम्शो बाक्नीम।
5 ङोंइती मारेइ मारेइम गाप्शो मुर यो मुल जचा आ पर्बम गेय पाइनीम। तन्न शोव़लु बेक्शोपुकी रूशो बाक्नीम। आल मथीब मीश मुरुमी ७ जना आल थिप्तु। तन्न शुश आल थीब ममा आ थुं बेक्ब।
6 परमप्रभु यावे बेक्पाइक्ब नु सेंपाइक्ब बाक्ब। मेकोमी मुर आन कली बेक्शो मुर आन बाक्तीके सोइक्ब। मिनु मेकोमी सेंपाइक्ने यो चाप्ब। ब्यवस्था ३२:३९; भजन संग्रह ७१:२०
7 परमप्रभु यावे प्रुङग नु शोंप पाइश्शो सेल्ब बाक्ब। मेकोमी आइक्च नु ठेयब यो सेल्ब। भजन संग्रह ७५:८
8 मेकोमी मारेइ मथीब आन कली फुरक रे पोक्ब। प्रुङग आन कली घुरेन रे पोक्ब। मिनु मेको आन कली पिप आन तौ नु निप्पाइक्ब। मेको ठेयब मुर आन दातेम बाक्चा नु मान पाइक्तीक ताइनीम। मारदे हना रागी आ थाम परमप्रभु यावे केन बाक्नीम। मेकोम मेको तार रागी वोइक्तु। भजन संग्रह ११३:७-८
9 मेकोमी थमा सुइक्चा पुंइसीब मुर आन कली कोव़ब। तन्न आ अरेशो लोव़ मटीब आन कली छिङछिङमी खतम पोक्पाइक्ब। मारदे हना मुरपुकीम आन सक्तिमी मग्रानीम। भजन संग्रह ३३:१६
10 परमप्रभु यावे आ पर्बम जोरी सत्रु साइक्चा पुंइसीनीम। नेल्ल क्येङा ठेयबमी मेको आन पर्बम सरीङ रे बुंबु पपाइक्ब। मिनु परमप्रभु यावेमी रागी नेल्ल आन कली निसाफ पाइब। मेकोम आ पिप कली सक्ति गेब। मिनु आ तेल लुक्शो आ पिया पोक्ब” देंमाक्त।
11 मिनु नोले एल्काना आ खिं ङा मुरपुकी नु रामाह लेम्माक्त। मेको वोंइश आल चहिं परमप्रभु यावे कली चढ़ेब एली आ ङोंइती बाक्शा, परमप्रभु यावे आ गेय पवा बाक्त।
12 एली आ तौ निम्फा हिंचा ङा मरिम्शो पाइब बाक्सा बाक्त। मेको निक्शी परमप्रभु यावे कली मान पा महिंब बाक्सा बाक्त।
13 मेको चढ़ेब निक्शीमी चढ़ेथ जाक्ब मुर आन कली मार पाइक्बाक्ताक्स देंशा हना, मुर आन चाक्शो चढ़ेशो श्ये क्येशा ब्रुइक्तानु, मेको आस गेय पाइब कली ठेयब तूतीक सां पाइश्शो काटा कुरपाइश्शा, लेवी ३:२-५; लेवी ७:११-१७,२८-३४
14 कराइ, ताप्के, दिउरे कि ठेयब बोसुम लोप्शो श्ये तूपाइश्शा, दोशो ग्रूमे मोशो आंम के सेल्बाक्सा बाक्त। मोपा शिलोम चढ़ेथ जाक्शो इस्राएली नेल्ल आन कली मो पाइक्बाक्सा बाक्त।
15 मेको निक्शीमी नेल्ल क्येङा मरिम्शो मार पाइक्बाक्सा बाक्त देंशा हना, मेको बोंसो चोशा चढ़ेचा क्येङा ङोंइती आस गेय पाइबपुकी सोइश्शा “चढ़ेब कली वाल्चा कली श्ये गेवो। लोप्शो श्ये मताक्ब। क्येख ला ताक्ब” देंपाइक्बाक्सा बाक्त।
16 मिनु मेको मुरुमी “ममाइ, ङोंइती बोंसो चोचा गेयी। मिनु नोले इ दाक्शो लाइक्ने चाप्नेवे” देंमेनु, मेको आस गेय पाइबमी “ममाइ, मुलन गेयी। मगेप्तीवी हना, गो रोइश्शा लाइक्नुङ” देंबाक्माक्त।
17 मिनु मेको ठिटा आस मरिम्शो पशो परमप्रभु यावे आ ङोंइती ठेयब पाप दुम्माक्त। मारदे हना मुरपुकीमी परमप्रभु यावे कली चढ़ेशो आइक्च मिम्तसे बाक्त।
18 मिनु सामुएल परमप्रभु यावे आ ङोंइती गेय पाइक्बाक्माक्त। मेको वोंइश आल सुती वा के कुचु तार चढ़ेब आ फेक्तीके फेक्शा, गेय पाइबाक्माक्त। १सामुएल २२:१८; प्रस्थान २८:४-६हिब्रू लोव़मी एफोद देंशो कुचु आ फेक्तीक बाक्त।
19 मिनु आ ममाम मेको कली बर्स बर्सम आइक्च फेक्तीक वा फेरबाक्माक्त। मिनु आ वोंइश नु बर्स बर्स ङा क्योरशा चढ़ेदीमेनु, मेको वा लाइश्शा गेबाक्माक्त।
20 मिनु एलीमी एल्काना नु आ मीश आस कली आसीक गेशा “एको आल आ पा ङा परमप्रभु यावेमी एको मीश रे इन कली आलपुकी गेवल। मारदे हना एको परमप्रभु यावे कली गेप्तीवी” देंबाक्माक्त। मिनु नोले मेको आन खिं लेप्बाक्मा बाक्त।
21 मिनु परमप्रभु यावेमी हान्नाह कली आसीक गेवानु, मेको आल थीब दुम्शा, तौ सां नु तमी निक्शी थिमाक्त। मिनु सामुएल चहिं परमप्रभु यावे आ ङोंइती कोल्ना कोल्न लमाक्त। लूका १:८०
22 मिनु एली थम खूशो दुम्माक्त। आ तौ निक्शीमी इस्राएली आन कली दोदेंशो पाम्से, मेको नेल्ल नेना बाक्त। मेकोमी आ तौ ग्रुम्तीक ताम्बु आ ङोंइती गेय पाइब मीश मुरपुकी नु इप्शो, यो नेना बाक्त। प्रस्थान ३८:८
23 मोपतीके मेकोमी मेको आस कली “गे निक्शीमी मारदे ओदेंशो गेय पसी? गेमी ओदेंशो मरिम्शो गेय पाइतीसी देंशो लोव़ गो मुर नेल्ल आन शोव़ रे नेंता।
24 आं तौ निक्शी ओदेंशो गेय पचा प्रोनीस। मारदे हना, परमप्रभु यावे आ मुर आन दातेमी एको लोव़ ब्रशो नेंता। एको थम मरिम्शो बाक्ब। गे परमप्रभु यावे आ मुर आन कली पाप पपाइक्नीसी।
25 मुरुमी मुर आन कली पाप पाप्तु हना, परमप्रभुम निसाफ पाइब। तन्न मुरुमी परमप्रभु यावे कली पाप पाप्तु हना, सुम गारपाइक्ने चाप्बा ङा” देंमाक्त। मेको लोव़ नेल्ल नेंताक्स हना यो, मेको निक्शीमी आस आफ आ लोव़ मटिम्से बाक्त। मारदे हना परमप्रभु यावेम मेको निक्शी आस कली साइक्चा माल्शो बाक्माक्त। अय्युब १६:२०-२१
26 मिनु सामुएल कोल्ना कोल्न लमेनु, परमप्रभु यावे नु मुर आन ङोंइती दाक्शो दुम्माक्त। लूका २:५२
27 मिनु परमप्रभु आ लोव़ पाइब का जाक्शा, एली कली “परमप्रभु यावेमी इन कली लोव़ का पाइब। मेको मार बाक्ब देंशा हना, गो इन आफ नु आ खिं ङा मुर इजीप्त फाराओ आ रागीमी बाक्मानु, गो मतपांइसीङा ङा?
28 गो इस्राएल ङा थर नेल्ल रे मेको कली आं कली चढ़ेब दुम्पाइक्चा कली योव़ता। आं कली चढ़ेतीकेम चढ़ेचा, आं कली धूप चोचा, नु आं ङोंइती निसाफ पतीक ऊरीम नु थुम्मीम बाक्शो झोला फेक्चा कली योव़ता। इस्राएल ङा मीम चढ़ेशो नेल्ल इ आफ आ खिं ङा मुर आन कली गेता। ब्यवस्था १८:१; गन्ती १८:८-२०
29 मारदे गे आं देंशो चढ़ेशो नु जचा थोव़क चढ़ेशो नेल्ल आइक्च मिम्ती? मिनु आं क्येङा गे इ तौ आस कली ठेयब सेल्नेवे। आं मुर, इस्राएली आन चढ़ेशो रे गे नेल्ल क्येङा रिम्शो मारदे आंम कली वोंइसीशा, इ तौ आस कली ठेयब सेल्नेवे?” देंमाक्त।
30 मोपतीके परमप्रभु यावे, इस्राएली आन परमप्रभुमी “इ किकी पिपी आन खिं ङा मुर नेल्ल गेना हना यो आं ङोंइती चढ़ेब दुम्नीम, गो कसम जशो नङ” देंशो बाक्त। तन्न परमप्रभु यावेमी “मुल ओदेंशो मदुम्ब। मारदे हना आं कली ठेयब सेल्ब आन कली गो ठेयब सेल्नुङ। आं कली आइक्च सेल्ब नेल्ल आइक्च सेल्चा पुंइसीनीम। प्रस्थान २८:१; मलाकी ३:१६-१८
31 मुल गे नु इ किकी पिपी आन खिं ङा मुर आन सक्ति नेल्ल साम्नुङ। इ खिं ङा मुर सुइ खूशो दुम्चा मताइनीम। १राजा २:२७
32 गे आं मुर इस्राएली आन कली गेशो रिम्शो थोव़क तशा गेहे पाइनीनी। मिनु इ खिंमी सुइ खूशो सम्म मलीनीम।
33 तन्न गो इ तौ चच युइ आन दाते ङा आं कली चढ़ेतीकेम गेय पाइब, का कली मसाइक्नुङ। मेको शुश ङाक्शा, आ थुं लुक्च लाइक्ब। मारदे हना मेकोमी आ वोंइश मुर नेल्ल बेक्ची मजाक्थु बेक्शो ताइब।
34 मिनु इ तौ निक्शी होफ्नी नु फिनेहास काबुमीन बेक्नीस। मेको आं देंशो लोव़ थमा बाक्ब, देंशो चिन्ड का बाक्ब। १सामुएल ४:११
35 गो आं कली थमा सुइक्ब चढ़ेब का पोक्नुङ। मेकोम आं कली टिशा, आं थुंम मिम्शो पाइब। गो मेको कली गेना हना यो लीब खिं का सेल्नुङ। मिनु मेकोमी आं तेल लुक्शो आ ङोंइती गेना हना यो गेय पाइब। १राजा २:३५; हिब्रू ५:४-६
36 मिनु इ खिं ङा ब्रोंइशा लीशोपुकी मेको आ ङोंइती बाप्शा ‘टुक्रा का चांदी, शोब्ले का तचा कली, आं कली चढ़ेतीक गेय गेयीनी। मिनु गो नु जचा थोव़क बाक्ल’ देंनीम” दे परमप्रभु यावेमी देंत।