1 Peter 5 in Sunwar

1 गो इन खोदेंशो खाल्‍पा नङ। गो थमा सुइक्‍ब आन दातेमी बाक्‍शो शेंब खाल्‍पा इन कली अर्ती गेनुङ। गो ख्रीस्‍त आ श्‍येत जशो तशो नङ। मुल गो जाक्‍चशो छेङछेङ ङा मुर यो दुम्‍ती। २यूहन्‍ना :१; मत्ती २६:३७,६९; रोमी ८:१७

2 इन कली मार अर्ती गेनुङ देंशा हना, गे परमप्रभु यावे आ योव़शो मुर आन गोठला खोदेंशो दुम्‍शा, मेको आन कली रिम्‍शो पा कोव़ङीन। इन थुंमी “आं मदाक्‍शो गेय बाक्‍ब” दे मिम्‍शा ममाइ, तन्‍न “गो मेको गेय दाक्‍नुङ” दे ग्‍येरशा पने। “क्‍येट चेम्‍नुङ” दे मिम्‍शा ममाइ, तन्‍न रिम्‍शो शेंतीके गेय शुश पने। यूहन्‍ना २१:१६; प्रेरित २०:२८; १तिमोथी ३:२-७

3 “गो परमप्रभु यावे आ योव़शो मुर आन कली हुकुम पाइब दुम्‍ती” दे ममाइ, तन्‍न मेको दोदेंब दुम्‍चा माल्‍नीमी, इन पशो गेयमी कोंइदीन। इजीकीएल ३४:२-४; २कोरिन्‍थी १:२४; तीतस २:७

4 नेल्‍ल क्‍येङा ठेयब गोठला जाक्‍मेनु, गे गेना हना यो लीब परमप्रभु यावे आ छेङछेङ ङा सिरपेच ताइनीनी। हिब्रू १३:२०; १कोरिन्‍थी ९:२५; २तिमोथी ४:८

5 मिनु गे ठिटापुकी, शेंब खाल्‍पा आन देंशो लोव़ टिने। गे नेल्‍ल ब्रेम्‍शो थुं पाइश्‍शो दुम्‍शा, गेय पमुने। मारदे हना परमप्रभु यावेमी ठेयब लेश्‍शो मुर आन कली मकोव़ब, ब्रेम्‍शो थुं पाइश्‍शो मुर आन कली ला शिशी पाइब। एफिसी ५:२१; अय्‍युब २२:२९; हितोपदेस ३:३४; मत्ती २३:१२; याकूब ४:६

6 मोपतीके गेपुकीमी “नेल्‍ल सक्ति परमप्रभु यावे केन बाक्‍ब” दे आ देंशो लोव़ ब्रेम्‍शो थुंमी ठीक पा टिने। मो पाइतीनी हना, परमप्रभु यावेमी आ मिम्‍ची ना इन कली ठेयब सेल्‍ब। याकूब ४:६

7 गेपुकीमी “मार जाइनीकी? मार तूनीकी? मार फेक्‍नीकी? मार दुम्‍नीकी?” दे हिंशा, सुर्ता पचा ममाल्‍नीनी। मारदे हना परमप्रभु यावेमी इन कली कोव़ब। भजन संग्रह ५५:२१; मत्ती ६:२५; फिलिप्‍पी ४:६

8 गेय पचा ङोंइती मिम्‍तीन। होस पा बाक्‍कीन। मारदे हना इन कली मदाक्‍ब सैतानमी शोव़लु बेक्‍शो गुप्‍स खोदेंशो पा “सु कली ब्‍वाइनुङा” दे माल्‍ना माल्‍न गाक्‍ब। १थिस्‍सलोनिकी ५:६; लूका २२:३१; २कोरिन्‍थी २:११

9 गेपुकीमी थमा सुइश्‍शा “गो सैतान कली तुइक्‍नुङ” दे मेको कली काइ मटिने। रागी नेल्‍ल ङा थमा सुइक्‍ब लोक्‍बपुकीम मोदेंशो श्‍येत जाइनीम दे तुइक्‍नीनी।

10 मिनु का निक्‍शी नाक्‍त श्‍येत जनी नोले नेल्‍ल शिशी पाइब परमप्रभु यावेमी “गेना हना यो छेङछेङमी बाक्‍चा गेनुङमी” दे ख्रीस्‍त आ नेंमी इन कली ब्रेश्‍शो बाक्‍त। मेकोमी इन कली आ राज्‍यम गारचा ङा सक्ति पाइश्‍शो नु ठीक सेल्‍ब। १पत्रुस १:६

11 मेको गेना हना यो नेल्‍ल क्‍येङा ठेयब बाक्‍ब। आमेन।

12 गो सिल्‍वानस थमा सुइक्‍ब लोक्‍ब बाक्‍ब, दे मिम्‍शा, आं ब्रेक्‍शो आइक्‍च चिठी मेको नु सोइक्‍ताक्‍ङ। गो इन कली परमप्रभु यावे आ थमा शिशी मार बाक्‍मे, मेको शेंताक्‍न्‍‍नी। मिनु गे मेको तुइश्‍शा, थमा सुइक्‍चा मप्रोंइथु बाक्‍कीन। प्रेरित १५:२२

13 इन खोदेंशो बेबीलोनम बाक्‍शो योव़शोपुकीमी यो इन कली “रिम्‍शो बाक्‍कीन” दे आं कली ब्रेक्‍पाइक्‍तीमी। मिनु आं तौ मर्कूसमी यो मो देंत। २तिमोथी ४:११

14 गे दाक्‍मुशा, प्रभु आ नेंमी मुम्‍मुने। परमप्रभु यावेमी ख्रीस्‍तम बाक्‍शो नेल्‍ल इन कली थुं नाइक्‍चा गेवल।