1 Peter 4 in Sunwar
1 दोपा ख्रीस्त रागीम बाक्शा, श्येत जवा, मोपा गो नेल्ल श्येत जचा माल्नय, दे मिम्तीन। सु सु रागीमी श्येत जाइनीमी, मेको मरिम्शो पतीक कली प्रोंइने थुम्शो बाक्नीम।
2 मिनु गे रागीमी बाक्नी सम्म इन दला दाक्स मपथु, परमप्रभु यावे आ दाक्शो पने।
3 ङोंइती परमप्रभु यावे कली मतुइक्थु मारेइ मारेइ पाइतीनी, मुल मेको गाप्त। थमा मसुइक्बपुकीमी मार पाइनीम देंशा हना, महिंब दुम्शा आन दला दाक्स पाइनीम। दुक्शा बाक्नीम, शुश जशा तूशा बाक्नीम नु ग्रांग्रा दिचा ङा मूर्ति पूजा पाइनीम। एफिसी २:२-३; तीतस ३:३
4 गे चहिं मुल मेको आन पशो खोदेंशो मपाइनीनी। मोपतीके मेकोपुकी छक लाक्नीम। मिनु इन पर्बम शुक्शी पाइनीम।
5 तन्न मेकोपुकीमी बेक्शो नु ब्रोंइशो मुर आन कली निसाफ पाइब आ ङोंइती मेको आ पर्बम लोव़ पचा माल्नीम। २तिमोथी ४:१
6 मोपतीके बेक्शो मुर आन कली यो परमप्रभु यावे आ ग्येरपाइक्ब लोव़ शेंशो बाक्त। परमप्रभु यावे खोदेंशो पा सोक्तीम ब्रोंइचा तामेक्ल, दे रागीमी बाक्मानु, निसाफ पचा पुंइसाक्म। १पत्रुस ३:१९
7 रागी नु रागीमी बाक्शो मारेइ मारेइ नुप्चा चिक्शो बाक्तेक्म। मोपतीके इन गेय पचा ङोंइती मिम्शा नु आंम रां कली अरेशा प्रार्थना पने। १कोरिन्थी १०:११; १यूहन्ना २:१८
8 नेल्ल क्येङा ठेयब मार बाक्ब देंशा हना, शुश दाक्मुचा बाक्ब। मारदे हना दाक्मुतीकेमी शुश पाप यो ग्याम्ब। हितोपदेस १०:१२; याकूब ५:२०
9 मगाइक्थु बास गेमुने।
10 परमप्रभु यावेमी इन कली गेय का का पपाइश्शो बाक्त। मोदेंशो पा वारच पमुने। परमप्रभु यावेमी गेशो गेय रिम्शो पने।
11 सुमी लोव़ पाइबा, मेकोमी परमप्रभु यावे आ ख्रुइश्शो लोव़ पवल। सुमी गेय पाइबा, मेकोमी परमप्रभु यावे आ गेशो सक्तिमी पवल। मोपा नेल्लेमी येसु ख्रीस्त आ नेंमी परमप्रभु यावे कली ठेयब सेल्मेक्ल। मेको छेङछेङमी बाक्शा, गेना हना यो सक्ति पाइश्शो बाक्ब। आमेन। रोमी १२:७
12 मिनु आं दाक्शो लोक्बपुकी, इन कली थुं थाम्चा ङा श्येत शुश दुम्त हना, महिनीन। मेको मारेइ ममाइ। इन थमा सुइक्तीके नाक्चा कली बाक्ब। १पत्रुस १:६-७
13 गे ख्रीस्त आ श्येत जशो खोदेंशो पा श्येत जाइतीनी हना, ग्येरसीने। मारदे हना आ छेङछेङ पा जाक्ची ना शुश ग्येरनीनी। प्रेरित ५:४१; याकूब १:२; रोमी ८:१७
14 ख्रीस्त आ नेंमी श्येत जाइतीनी हना, आसीक ताइब दुम्नीनी। मारदे हना छेङछेङ ङा परमप्रभु यावे आ सोक्त गे नु बाक्ब। मत्ती ५:११; एफिसी १:१३
15 गेपुकी मुर कली साइक्ब, खुइ पाइब, ग्रांग्रा दिचा ङा गेय पाइब नु अरु आन कली ग्येत्थ लुक्च सेल्शा, सजाइ तपाइक्ब खोदेंशो मदुमीन।
16 तन्न गे थमा सुइक्ब दुम्शा, श्येत जाइतीनी हना, मुने मपने। येसु ख्रीस्त आ नेंमी परमप्रभु यावे कली ठेयब सेलीन। फिलिप्पी १:२०
17 निसाफ पची ना दुम्चशो बाक्त। परमप्रभु यावे आ खिं ङा मुर ङोंइती निसाफ पचा पुंइसीनीम। मिनु गो ङोंइती ङा बाक्तय हना, ग्येरपाइक्ब लोव़ थमा मसुइक्ब आन कली दोदेंब दुम्बा? येरमीया २५:२९; इजीकीएल ९:६
18 मिनु ठीक पाइब मुरपुकी हेरा ब्रोंइचा मताइब दुम्तेक्म हना, थमा मसुइक्ब नु मरिम्शो पाइबपुकी दोदेंशो दुम्नीमी? हितोपदेस ११:३१
19 मोपतीके परमप्रभु यावेमी सु कली श्येत जचा गेबा, मेकोपुकीमी ठीक गेय पशा, आंम थुं परमप्रभु यावे कली जिम्मा गेमेक्ल। परमप्रभु यावेमी आ मुर आन कली गेनायो मप्रोंइब। भजन संग्रह ३१:६