1 Kings 6 in Sunwar
1 इस्राएली इजीप्त रे ग्रूशा जाक्शो ४ सहे ८० बर्स दुम्शो बाक्माक्त। मिनु सोलोमनम इस्राएली आन कली हुकुम पशो ४ बर्स नु महिना निक्शी ङा जिव महिनाम परमप्रभु यावे आ खिं सेल्चा गोवा बाक्त। मत्ती १:१७
2 सोलोमनमी परमप्रभु यावे कली सेल्शो खिं ६० कुबीत लाइश्शो, २० कुबीत ब्रेम्शो नु ३० कुबीत ग्येत्थ लाइश्शो बाक्माक्त। कुबीत का ०.५ मिटर खोदेंशो बाक्ब।
3 मेको परमप्रभु यावे आ खिं आ ङोंइती ङा पिंडी आ ब्रेम्शो नु आ लाइश्शो २० कुबीत बाक्माक्त। मेको खिं आ ङोंइती गे १० कुबीत लाइश्शो ग्रूशो बाक्माक्त। कुबीत का ०.५ मिटर खोदेंशो बाक्ब। १राजा ७:१५-२१
4 मेकोमी खिं आ दी गे गारोम रोक्तीक पाइश्शो झेलपुकी सेल्पदा बाक्त।
5 नोले मेकेर चोव़खो नु नेल्ल क्येङा चोव़खो बाक्शो खिं आ एर ओंथ ङा गारो नेल्लेम बोइश्शो कोठापुकी सेल्पदा बाक्त।
6 मिनु नेल्ल क्येङा आगा ङा तला ५ कुबीत ब्रेम्शो बाक्माक्त। मिनु दाते ङा तला ६ कुबीत ब्रेम्शो नु नेल्ल क्येङा आ तार ङा तला ७ कुबीत ब्रेम्शो बाक्माक्त। मेकोमी ठेयब गारो आ एर ओंथ नेल्ले लाङगा गे पाइद्रा वोइक्चा कली गारो प्रोव़पदा बाक्त। मोपा पाइद्रा खिं ङा गारो मओव़चा ङा पा सेल्पदा बाक्त।
7 खिं सेल्मेनु, फुल्लु खांनीमीन ख्रोदमे बाक्त। मेको खिं सेल्मेनु घन, खा नु मारेइ फलाम के या आन रेयके मनेंसे बाक्त।
8 नेल्ल क्येङा आगा ङा तला ङा ओव़तीक दक्खिन गे बाक्माक्त। मिनु मेकेर रे दाते ङा नु आ तार ङा तला लचा कली हिरशो थेंकापुकी बाक्मा बाक्त।
9 मोपा मेकोम लेबानोन ङा लाइश्शो रवा के पाइद्रा नु फलेक साप्शा खिं सेल्ने थुम्पदा बाक्त।
10 मेकोम खिं आ एर ओंथ नेल्ल आइक्च आइक्च कोठा सेल्पदा बाक्त। मेको कोठा नेल्ल ५, ५ कुबीत लाइश्शो बाक्मा बाक्त। मिनु मेको कोठा नेल्ल लेबानोन ङा लाइश्शो रवा आ शीम खिं नु बोइश्शो बाक्मा बाक्त।
11 मिनु परमप्रभु यावेम सोलोमन कली लोव़ पवा बाक्त।
12 मार लोव़ पवा बाक्त देंशा हना “एको इ सेल्शो खिं आ पर्बम लोव़ पाइनुङ। गे आं फुल्लुम मुशा ब्रेक्शो लोव़ पाप्तीवी हना, आं देंशो पतीक लोव़ नु आं शेंशो नेल्ल पशा, आं लांम गाक्ते हना, इ आफ दाऊद नु थोक्शा पशो कबल गे नु पाइनुङ। २सामुएल ७:१३
13 मिनु गो इस्राएल ङा आं आल आन दातेम बाक्नुङ। मिनु गो आं मुर इस्राएली आन कली गेनायो मप्रोंइनुङमी” देंमाक्त। प्रस्थान २९:४५
14 मोपा सोलोमनम परमप्रभु यावे आ खिं सेल्ने थुमा बाक्त। प्रेरित ७:४७
15 मेकोमी खिं आगा गे ङा गारोम लेबानोन ङा लाइश्शो रवा आ शी के फलेक गारपाइश्शा क्येप्पदा बाक्त। खप रे इर ङा शी सम्मन शी के फलेक गारपाइश्शा क्येप्पदा बाक्त। मिनु खपीम चहिं अरु रवा ङा फलेक ब्रपदा बाक्त।
16 सोलोमनमी मेको खिं आगा आ नोले गे २० कुबीत लाइश्शो नेल्ल क्येङा चोव़खो कोठा सेल्पदा बाक्त। मेको कोठा नेल्ले लेबानोन ङा लाइश्शो रवा आन फलेक गारपाइश्शा क्येप्पदा बाक्त। कुबीत का ०.५ मिटर बाक्ब।
17 मेको नेल्ल क्येङा चोव़खो कोठा आ ङोंइती ४० कुबीत लाइश्शो बाक्माक्त। १ कुबीत ०,५ खोदेंशो बाक्ब।
18 मेको खिं आ आगा गे लेबानोन ङा लाइश्शो रवा आ शी के फलेकम चहिं लौका नु बोइश्शो फू आ बुटा मुशा आप्शो बाक्मा बाक्त। मेको शी नेल्ल मोदेंशो बाक्मा बाक्त। मेकेर फुल्लु का यो मतांइसीशो बाक्माक्त।
19 मेको आ खिं आ नेल्ल क्येङा आगाम चहिं परमप्रभु यावे आ कबल पशो सन्दोस वोइक्चा कली नेल्ल क्येङा चोव़खो कोठा सेल्पदा बाक्त।
20 मेको नेल्ल क्येङा चोव़खो कोठा पुक्शो नु २० कुबीत लाइश्शो, २० कुबीत ब्रेम्शो नु २० कुबीत ग्येत्थ लाइश्शो बाक्माक्त। मिनु मेकोमी मेकेर नेल्ल क्येख सुन क्येप्पदा बाक्त। मिनु मोदेंशो पा मेकोमी लेबानोन ङा लाइश्शो रवा आ शी के सेल्शो चढ़ेतीक कली यो सुनम गिल्पदा बाक्त। कुबीत का ०,५ खोदेंशो बाक्ब।१राजा ७:४८
21 सोलोमनम मेको खिं आगा गे नेल्ल क्येख सुन क्येप्पदा बाक्त। मिनु आगा ङा नेल्ल क्येङा चोव़खो कोठा नेल्ल सुन क्येप्पाइश्शा, आ ङोंइती सुन के साङलीपुकी क्याइक्पदा बाक्त।
22 मोपा मेकोम खिं आगा नेल्ल सुन क्येप्पदा बाक्त। आगा बाक्तीक ङा चढ़ेतीक कली यो सुनम गिल्पदा बाक्त।
23 मेकोमी परमप्रभु यावे आ खिं आगा ङा चोव़खो बाक्तीकेम तेल रवा आ शी के करूब निक्शी सेल्पदा बाक्त। मेको निम्फा १०, १० कुबीत ग्येत्थ लाइश्शो बाक्सा बाक्त। कुबीत का ०,५ खोदेंशो बाक्ब।प्रस्थान ३७:७-९
24 करूब आ फ्रां का ५ कुबीत लाइश्शो बाक्माक्त। मिनु अर्को यो ५ कुबीत लाइश्शो बाक्माक्त। मिनु फ्रां का आ ङर रे अर्को फ्रां आ ङर सम्म १० कुबीत लाइश्शो बाक्माक्त।
25 मोपान अर्को करूब आ फ्रां यो १० कुबीत लाइश्शो बाक्माक्त। मारदे हना मेको करूब निम्फा उइक्थ उइक्थ पा खाल का ङा बाक्सा बाक्त।
26 मेको करूब निम्फा खाल का ङा पा १०, १० कुबीत लाइश्शो बाक्सा बाक्त।
27 मिनु मेकोमी मेको करूब आस कली परमप्रभु यावे आ खिं ङा नेल्ल क्येङा चोव़खो कोठाम वोदा बाक्त। मेको करूब आस फ्रां प्राक्पाइश्शा सेल्शो बाक्माक्त। मोपा करूब का आ फ्रां कामी गारो का कली नु अर्को करूब आ फ्रां कामी अर्को गारो कली थिशो बाक्माक्त। मिनु मेको आस अर्को फ्रां चहिं दातेम थिमुशो बाक्सा बाक्त।
28 मिनु मेकोमी मेको करूब आस कली यो सुनम गिल्पदा बाक्त।
29 मेकोमी परमप्रभु यावे आ खिं ङा नेल्ल क्येङा चोव़खो कोठा आ एर ओंथ नेल्ल, गारो नेल्ल करूब, खजूर रवा नु बोइश्शो फु आन बुटा मुशा आप्पदा बाक्त। मेको चोव़खो कोठा आगा नु लाङगा नेल्ल मोदेंशो पा मुशा बुटा आप्पदा बाक्त।
30 मिनु मेकोमी परमप्रभु यावे आ खिं ङा नेल्ल क्येङा चोव़खो कोठा ङा खप नेल्ल सुन ब्रपदा बाक्त।
31 मेकोमी नेल्ल क्येङा चोव़खो कोठा ओव़चा कली तेल रवा आ शी के लाप्चो निक्शी सेल्पदा बाक्त। मेको लाप्चो ङा शी ५ सुर पाइश्शो पा सेल्पदा बाक्त।
32 मिनु मेकोम तेल रवा आ शी के लाप्चो निक्शीम करूब, खजूर रवा नु बोइश्शो फु आन बुटा मुशा आप्पदा बाक्त। मिनु सुनम गिल्पदा बाक्त।
33 मेको खिं ङा लाप्चो ङा शी यो तेल रवा आ शी के ४ पाटे पा सेल्पदा बाक्त।
34 मिनु मेकोमी अरु शी के लाप्चो निक्शी सेल्पदा बाक्त। मेको आगा नु लाङगा ङा लाप्चो हिरब लाप्चो बाक्सा बाक्त।
35 मिनु मेकोमी मेकेर नेल्ल करूब, खजूर रवा नु बोइश्शो फु आन बुटा मुशा आप्पदा बाक्त। मिनु सुनम गिल्पदा बाक्त।
36 मिनु मेकोमी खिं आगा ङा गारो यो ख्रोइश्शो फुल्लु सां खेयप ख्रोप्शा क्येप्शा, मेको आ तारी लेबानोन ङा लाइश्शो रवा के फलेकम सुम्पदा बाक्त।
37 सोलोमनमी सासन पवा आ ४ बर्स जिव माइश्शो महिनामी परमप्रभु यावे आ खिं आ जग वोदमे बाक्त। १राजा ६:१
38 मिनु ११ बर्स ङा बुल माइश्शो महिनामी मेको खिं नेल्ले सेल्ने थुम्मे बाक्त। मेको सेल्चा कली ७ बर्स माल्दा बाक्त।