1 Kings 4 in Sunwar
1 मोपा पिप सोलोमनम इस्राएल नेल्लेम सासन पवा बाक्त।
2 मेको आ ठेयब गेय पाइब सु सु बाक्मा बाक्त देंशा हना, सादोक आ तौ अजारयाह चढ़ेब बाक्माक्त।
3 शीशा आ तौ एली-होरेफ नु अहीयाह ब्रेक्ब बाक्सा बाक्त। अहीलुद आ तौ येहो-शाफात हिक्शा ब्रेक्शा वोइक्ब मुर बाक्माक्त।
4 येहो-यादा आ तौ बेनायाह लडाइ पाइब आन ठेयब मुर बाक्माक्त। सादोक नु अबीयाथार चढ़ेब बाक्सा बाक्त। १राजा २:३४-३५; २सामुएल २३:२०
5 नाथान आ तौ अजारयाह सासन पाइब आन ठेयब मुर बाक्माक्त। नाथान आ तौ जाबुद चढ़ेब नु पिप आ वारच बाक्माक्त।
6 अहीशार पिप आ खिं ङा मारेइ मारेइ कोव़ब मुर बाक्माक्त। अब्दा आ तौ अदोनीराम गेय पाइब आन कली कोव़ब बाक्माक्त। १राजा ५:२८
7 सोलोमनम इस्राएल नेल्लेम १२ जना सासन पाइब वोइश्शो बाक्माक्त। मेकोपुकीम पिप कली नु पिप आ खिं ङा मुर आन कली जचा थोव़क गारपाइक्बाक्मा बाक्त। मेको नेल्लेमी बर्सम महिना का का कली जचा थोव़क चाक्तीक गेय पाइक्बाक्मा बाक्त। १सामुएल ८:११-१८
8 मेको आन नें मार मार बाक्मा बाक्त देंशा हना, बेन-हुर, एफ्राइम पहाड ङा ठेयब मुर बाक्माक्त। बेन-हुर देंशो हुर आ तौ बाक्ब।
9 बेन-देकेर, माकाज, शा-आल्बीम, बेथ-शेमेश नु एलोन-बेथ-हानान सहर ङा ठेयब मुर बाक्माक्त।
10 बेन-हेसेद, अरुब्बोथ ङा ठेयब मुर बाक्माक्त। मेको आ जिम्माम सोकोह नु हेफेर ङा रागी नेल्ल बाक्मा बाक्त।
11 बेन-अबीनादाब नाफाथ-डोर ङा ठेयब मुर बाक्माक्त। बेन-अबीनादाबम सोलोमन आ तमी थाफाथ कली ग्युंबे पशो बाक्माक्त। १सामुएल १६:८
12 अहीलुद आ तौ बाना तानाक सहर, मेगीददो नु बेथ-शेआन ङा ठेयब मुर बाक्माक्त। बेथ-शेआन चारेथन आ नेक्था नु येज्रेल आ दी बाक्ब। मेको बेथ-शेआन रे आबेल-मेहोलाह योकमाम सहर आ अर्को पटटी सम्म ङा ठेयब मुर बाक्माक्त।
13 बेन-गेबेर रामोथ-गिलाद ङा ठेयब मुर बाक्माक्त। मेको आ जिम्माम मनस्से आ तौ याइर आ गिलादम बाक्शो गाउंपुकी बाक्मा बाक्त। मेको के बाशान रागी ङा अरगोब गारो हिरशो ६० ओटा ठेयब सहर यो बाक्मा बाक्त। मेको गारो ङा लाप्चोम कांसा के आग्लो बाक्मा बाक्त। गन्ती ३२:४१
14 इददो आ तौ अहीनादाब महा-नाइम ङा ठेयब मुर बाक्माक्त।
15 अहीमाज नाप्ताली ङा ठेयब मुर बाक्माक्त। मेकोम सोलोमन आ तमी बासेमाथ नु ग्युंबे पशो बाक्माक्त।
16 हुशाइ आ तौ बाना आशेर नु बेआलोथ ङा मुर आन ठेयब मुर बाक्माक्त।
17 पारुआह आ तौ येहो-शाफात इस्साकार ङा ठेयब मुर बाक्माक्त।
18 एला आ तौ शिमेइ बेन्यामीन रागी ङा ठेयब मुर बाक्माक्त।
19 ऊरी आ तौ गेबेर गिलाद ङा ठेयब मुर बाक्माक्त। मेको एमोरी आन पिप सीहोन नु बाशान रागी ङा पिप ओग आस रागी ङा यो ठेयब मुर बाक्माक्त। मिनु यहूदा रागी कली कोव़ब अर्को मुर मबाक्मा बाक्त।
20 यहूदा नु इस्राएल ङा मुरपुकी समुन्द्र ङा बाल्वा खोदेंशो पा शुश बाक्मा बाक्त। मेकोपुकी जशा तूशा ग्येरशा बाक्बाक्मा बाक्त। १राजा ३:८; उत्पत्ती १३:१६
21 सोलोमनम युफ्रेटीस खोला रे पलिस्ती आन रागी इजीप्त ङा सांद सम्म ङा राज्यम सासन पशो बाक्माक्त। मिनु मेको रागीम सोलोमन कली तिरो थाप्बाक्मा बाक्त। मिनु मेकोपुकी सोलोमन ब्रोंइम सम्म मेको आ गेय पाइब दुम्शा बाक्मा बाक्त। उत्पत्ती १५:१८
22 सोलोमन आ खिंमी काबु ङा जचा थोव़क ३० कोर रिम्शो फस नु ६० कोर अरु फस बाक्मा बाक्त। कोर का २२० लिटर ङा ठेयब पुक्तीके बाक्ब।
23 मिनु १० ओटा दोम्शो ब्यफ, २० ओटा खर्कम योव़शो ब्यफ नु सहे का क्यारश भेडा बाक्मा बाक्त। मेको प्रोंइशा किश्श, रोकोश नु दोम्शो हांसपुकी यो बाक्मा बाक्त।
24 मारदे हना मेकोम युफ्रेटीस खोला आ पच्छिम गे ङा रागी तिफ्साह रे गाजा सम्म युफ्रेटीस खोला आ पच्छिम गे बाक्ब पिप नेल्ल आन कली सासन पशो बाक्माक्त। मेको आ राज्य नेल्ल लडाइ मदुम्थु थुं नाइश्शा बाक्शो बाक्मा बाक्त।
25 सोलोमन बाक्म सम्म दान रे बेयर-शेबा सम्म यहूदा नु इस्राएल रिम्शो दुम्शा बाक्सा बाक्त। मुर नेल्ल आंम आंम अङगुर नु फोव़शी जशा बाक्मा बाक्त। लेवी २५:१८
26 सोलोमन के ४ हजार बग्गी कीब शारा आन कली वोइक्तीक खिं बाक्माक्त। मेको के १२ हजार शारा ङोइक्ब बाक्मा बाक्त। २इतिहास ९:२५
27 मिनु मेको १२ जना सासन पाइबपुकीमी महिना महिनाम पाल्पालो पा सोलोमन नु मेको नु बाक्शा जाइब आन कली जचा थोव़क चाक्बाक्मा बाक्त। मोपा चाक्ग्मेनु, मेकोपुकीम तेकोइ थोव़क मख्राइक्थु चाक्बाक्मा बाक्त।
28 मेकोपुकीमी शारा नु बग्गी कीब शारा आन कली यो क्योव़ज नु नल चाक्बाक्मा बाक्त। नेल्लेम आन पचा ङा गेय पाइबाक्मा बाक्त।
29 परमप्रभुमी सोलोमन कली शुश जोक्तीक तुइक्तीक थुं गेवा बाक्त। मेको आ रुप्तीके समुन्द्र ङा बाल्वा खोदेंशो पा शुश बाक्माक्त।
30 पूर्ब ङा मुर नेल्ल नु इजीप्त ङा मुर नेल्ले आन दातेमी सोलोमन के खोदेंशो जोक्तीक तुइक्तीक थुं सुइ के मबाक्मा बाक्त।
31 मिनु मेको अरु नेल्ल आन क्येङा जोक्ब तुइक्ब दुम्माक्त। मेको एज्राह आ खिं ङा एथान नु माहोल आ तौ हेमान, कल्कोल नु दारदा आन क्येङा यो शुश जोक्ब तुइक्ब बाक्माक्त। मिनु मोपा आ जोक्तीके तुइक्तीके रागी रागी ङा मुर नेल्ल आन दातेमी ब्रमाक्त।
32 मेकोमी हजार सां अर्ती ब्रेक्ता बाक्त। मिनु हजार का ५ ओटा कुम्सो सेला बाक्त। उपदेसक १२:९
33 मेकोमी रवा आन पर्बम लेबानोन ङा लाइश्शो रवा रे लाइश्शा, गारोम वाब हिस्सोप माइश्शो सुप्तीक बोट सम्म आन पर्बम ब्रेक्ता बाक्त। मिनु मेकोमी चिक्ब, जन्तु, खपीम ग्रेशा गाक्ब जन्तु नु ङांइ नेल्ल आन पर्बम यो ब्रेक्ता बाक्त।
34 रागी ङा शुश मुर सोलोमन आ जोक्तीक तुइक्ती नेंचा तुइक्चा कली जाक्बाक्मा बाक्त। रागी ङा पिपपुकीम सोलोमन आ पर्बम नेंशा, मेको आ लोव़ नेंचा कली मुर आन कली सोइक्बाक्मा बाक्त।