1 Kings 3 in Sunwar
1 सोलोमन आ ग्युंबेम पतीके इजीप्त ङा पिप फाराओ आ खिं ङा मुर दुम्माक्त। मिनु सोलोमनम फाराओ आ तमी नु ग्युंबे पवा बाक्त। मिनु मेको कली पिप आ खिं, परमप्रभु यावे आ खिं नु यरूसलेम ङा गारो सेल्ने मथुमा सम्म दाऊद आ सहरम चाक्शा वोदा बाक्त। ब्यवस्था २३:८; १राजा ११:१-२
2 मेना सम्म मुरपुकीम डांडा मेर चढ़ेबाक्मा बाक्त। मारदे हना परमप्रभु यावे आ नें कली मान पा तेकोइ खिं मसेल्शो बाक्माक्त।
3 सोलोमनम चहिं परमप्रभु यावे कली दाक्शा, मेको आ लांम गाक्शा आ आफ दाऊद आ पशो खोदेंशो पवा बाक्त। तन्न मेकोमी डांडा ङा थानम चढ़ेशा, धूप चोइबाक्माक्त।
4 काले पिप सोलोमन गिबोन सहरम मार मार चढ़ेथ लमाक्त। मारदे हना मेको डांडा नेल्ल क्येङा ठेयब चढ़ेतीक बाक्माक्त। मिनु मेको चढ़ेतीकेम सोलोमनम हजार का मार मार चोशा चढ़ेतीक चढ़ेवा बाक्त। १इतिहास २१:२९; १राजा ९:२
5 मिनु मेको नाक्दो परमप्रभु यावे गिबोनम सोलोमन आ ङोमुम जाक्शा “गे मार पुंइनेवे, मेको गेनन” देंमाक्त।
6 मिनु सोलोमनम “गे इन गेय पाइब, आं आफ दाऊद कली इन ठेयब गेना हना यो दाक्तीक कोंइताक्नी। मारदे हना मेको इन कली मप्रोंइथु, ठीक पाइब नु रिम्शो थुं पाइश्शो इन नोले खोइक्ब मुर बाक्त। मिनु गे मेको कली इन ठेयब नु गेना हना यो दाक्तीके कोंइशो बाक्तीनी। मिनु मुलाक्ती मेको आ नोले आ नित्तीकेम वोइक्चा कली मेको कली तौ का गेतीनी। १राजा १:४८
7 मिनु मुल परमप्रभु यावे, आं परमप्रभु गे इन गेय पाइब, आं कली, आं आफ दाऊद आ पा ङा पिप सेल्तीनी। मो हना यो गो आइक्च आल का ला बाक्नुङ। मिनु गो दोपा लाङगा लचा माल्नुङा, दोपा जाक्चा माल्नुङा, मेको मतुइक्नुङ।
8 मुल गो इन गेय पाइब इन योव़शो मुर इस्राएली आन दातेम बाक्शो बाक्नुङ। मेको शुश नु हिक्ने मचाप्चा ङा बाक्नीम। १राजा ४:२०
9 मोपतीके इन गेय पाइब, आं कली इन मुर आन कली ठीक पा सासन पचा कली रुप्तीक थुं गेयीनी। मिनु गो रिम्शो नु मरिम्शो तिल्स जोक्नुङ। मो मदुम्त हना, एको इश्का इन मुर आन कली सुम सासन पने चाप्नीमी ङा” देंमाक्त।
10 मिनु परमप्रभु यावे सोलोमनम मेको लोव़ पुंइशो तशा, ग्येरसे बाक्त।
11 मोपतीके परमप्रभुमी मेको कली “गेमी एको लोव़ पुंइतीके, तन्न आंम इ पर्बम शुश ब्रोंइतीक, शोंप चेम्तीके नु इ जोरी सत्रु आन कली साइक्तीक मपुंइतीके, मार ठीक बाक्म, दे रुप्तीक थुं पुंइतीके,
12 मुल गो इ पुंइशो गेनुङ। गो थमा पा इ कली जोक्तीक तुइक्तीक थुं नु रुप्तीक थुं गेनन। ङोंइती इ खोदेंशो अर्को सुइ मबाक्म। मिनु नोले यो इ खोदेंशो सुइ मदुम्नीम। ब्यवस्था २६:१४
13 मेको प्रोंइशा यो, गो अर्को इ मपुंइशो यो गेनन। गे मबेक्ङे सम्म इ कली शोंप नु मान ततीके यो गेनन। तेकोइ पिपपुकी गे नु उइक्थ मदुम्नीम। मत्ती ६:३३
14 मिनु गे इ आफ दाऊदम खोदेंशो पा, आं लांम गाक्ते हना, आं फुल्लुम मुशा ब्रेक्शो लोव़ नु आं शेंतीके टिप्तीवी हना, गो इ कली शुश ब्रोंइचा गेनन” देंमाक्त।
15 मिनु नोले सोलोमन सेंसे बाक्त। मिनु एको दा ङोमु कका बाक्त, दे तुइक्ता बाक्त। मिनु मेको नोले यरूसलेम लेम्माक्त। मिनु परमप्रभु यावे आ कबल पशो सन्दोस आ नेक्था राम्माक्त। मिनु मेकेर चोशा चढ़ेतीक नु दुशा बाक्तीक आ पर्बम चढ़ेतीके चढ़ेवा बाक्त। मिनु मेकोमी आ गेय पाइब नेल्ल आन कली भोज का गेमी बाक्त।
16 मिनु नोले तेल्लेम मीश मुर निक्शी पिप आ ङोंइती जाक्शा, राप्सा बाक्त।
17 मिनु मेको आस दाते ङा काम “आं प्रभु, एको मीश मुर नु गो खिं कामीन बाक्नस्कु। मिनु गो एको नु बाक्ङानु, आल का थीता।
18 मिनु गो आल थिङा आ नाक्त सां नोले एकोमी यो आल का थिप्तु। मेकेर गो निक्शी ला बाक्शो नस्कु। मेको खिंम आंस निक्शी ङा लाक्शा, अर्को सुइ मबाक्म।
19 मिनु नाक्दो एको मीश मुरुम आ तौ कली चिप्शा सदा बाक्त।
20 मिनु नाक्दो उइक्थ दुम्मेनु, गो, इन वाइलीम निन्द्रा पङा ना एको बोक्शा जाक्शा, आं तौ लदा बाक्त। मिनु आ बेक्शो तौ चहिं आं थुकुम वोदा बाक्त।
21 मिनु आ दीसा सुनी गो बोक्शा ‘आल दूध तुंइदु’ देंङानु दा, आल बेक्शो बाक्त। तन्न गो मेको कली सुनी रिम्शो पा शिरशा कोव़ङुनु, मेको आं थिशो तौ ममाइ बाक्त” देंमाक्त।
22 मिनु मेको अर्को मीश मुरुम “ममाइ सेस आल आं तौ बाक्ब। बेक्शो इ के बाक्ब” देंमाक्त। तन्न ङोंइती ङा मीश मुरुम “ममाइ बेक्शो तौ इ के बाक्ब। सेस चहिं आं तौ बाक्ब” देंमाक्त। मोपा मेको निक्शी पिप आ ङोंइती जिम्से बाक्त।
23 मिनु पिपम “कामी ‘सेस तौ आं के बाक्ब। बेक्शो चहिं इ के बाक्ब’ देंत। मिनु अर्कोम ‘ममाइ बेक्शो तौ इ के बाक्ब। सेस चहिं आं तौ बाक्ब’ देंत” देंमाक्त।
24 मिनु पिपम “आं कली तरवार का चाक्शा गेयीनी” देंमाक्त। मिनु मेकोपुकीम पिप कली तरवार का चाक्शा गेमे बाक्त।
25 मिनु पिपम “मेको सेस आल कली उइक्थ पा क्योरीन। मिनु उइक्थ भाग का, का कली नु अर्को उइक्थ भाग का अर्को कली गेने” देंमाक्त।
26 मिनु मेको सेस आल आ ममाम आ तौ कली शिशी पा पिप कली “ए प्रभु, एको सेस आल एकोमीन लदल। एको आल कली मसतीन” देंमाक्त। मिनु अर्कोम चहिं “एको आल गे यो लाइक्चा मताइनेवे, गो यो लाइक्चा मताइनुङ। एको कली उइक्थ पा क्योरीन” देंमाक्त। यसैया ४९:१५
27 मिनु पिपम आ निसाफ ङा लोव़ नेंपाइश्शा “एको सेस आल ङोंइती ङा मीश मुर कली गेने। एको आल कली मसतीन। आल आ ममा एकोन बाक्ब” देंमाक्त।
28 मिनु पिप आ निसाफ नेंशा, इस्राएली नेल्ल आन थुंमी रिम्शो पशो तुइश्शा, हिंमा बाक्त। मारदे हना मेकोपुकीम ठीक पा निसाफ पचा कली मेको आ थुंम परमप्रभु आ रुप्पाइक्तीक थुं बाक्त, दे तुइक्तमे बाक्त।