1 Kings 18 in Sunwar
1 मिनु परमप्रभु यावेम रागी सोव़शो शुश नाक्त नोले बर्स सांमी एलीया कली लोव़ पवा बाक्त। मार लोव़ पवा बाक्त देंशा हना “गे लशा, आहाब कली ग्रुमो। मिनु गो रागीम रेउ यिपाइक्नुङ” देंमाक्त।
2 मोपतीके एलीया आहाब कली ग्रुम्थ लमाक्त। मेना सामरीया सहरम ठेयब अन्काल दुम्शो बाक्माक्त।
3 मिनु आहाबमी आ खिं कोव़ब ओबदिया कली ब्रेत्थ सोइक्ता बाक्त। मेको ओबदिया परमप्रभु यावे कली शुश मान पा हिंशा, थमा सुइक्ब मुर का बाक्माक्त।
4 इजेबेलम परमप्रभु यावे आ लोव़ पाइब आन कली साइक्ना साइक्न बाक्मेनु, ओबदियामी मेको आन दाते ङा सहे का जना आन कली लाइश्शा, मेको आन कली प्रोंइचा कली जचा तूचा थोव़क गेशा ५०, ५० जना ङा हुल पा पुक्खी निक्शीम ख्रुइश्शा वोइश्शो बाक्माक्त।
5 मिनु आहाबम ओबदिया कली “रागी ङा ब्वाक्कु बुक्तीके, खोल्सा मेर लावो। गो शारा नु खच्चर आन कली प्रोंइचा कली घांस थित्नसा कों? मोपा इं बस्तु भाव आन कली साइक्चा ममाल्नया कों?” देंमाक्त।
6 मिनु मेको निक्शीमी कोव़चा कली रागी योक्ससा बाक्त। मिनु आहाब का गे नु ओबदिया अर्को गे लसा बाक्त।
7 मिनु ओबदिया लांम गाक्ना गाक्न बाक्मेनु, एलीयाम मेको कली ग्रुमा बाक्त। मिनु ओबदियामी मेको कली तुइश्शा खप सम्मन बाप्शा सेउ पा “आं प्रभु, गे थमा पा एलीयान ननी?” देंमाक्त।
8 मिनु एलीयाम “ओं, गो नङ। गे लशा इ होव़प कली ‘एलीया एक बाक्त’ मतो” देंमाक्त।
9 मिनु ओबदियामी “गो मार मरिम्शो पङा ङा? गे इन गेय पाइब, आं कली साइक्पाइक्चा कली आहाब आ गुइम गेनीनी?
10 परमप्रभु यावे, इन परमप्रभु गेना हना यो ब्रोंइशा बाक्शो खोदेंशो पा, आं होव़पम इन कली रागी रागी नु राज्य नेल्लेम माल्थ सोइक्ताक्व। तेकोइ रागी नु राज्य मलीशो बाक्ब। मिनु मेकोपुकीमी ‘एलीया एक मबाक्ब। गो थमा पा मेको कली थिन्ने मचाप्का’ देंमानु, मेको कसम जचा माल्तेक्म।
11 तन्न मुल गे आं कली लावो, इ होव़प कली ‘एलीया एक बाक्त, देंनो’ देंतीनी।
12 गो इन कली प्रोनु चोटी परमप्रभु यावे आ सोक्तीम इन कली लाइक्ब। मिनु गो लशा आहाब कली मो देंङानु, मेकोमी इन कली मथित्तु हना, आं कली साइक्ब। मो हना यो, गो, इन गेय पाइब, आं आल रेन परमप्रभु यावे कली मान पा हिंशा, थमा सुइक्ब बाक्नुङ।
13 आं प्रभु, इजेबेलम परमप्रभु यावे आ लोव़ पाइब आन कली साइक्ना साइक्न बाक्मेनु, गो मार पङा, मेको गे मनेंनी ङा? गो मेको आन दाते ङा सहे का जना आन कली ५०, ५० जना पा पुक्खीम ख्रुइश्शा वोइक्तामी। मिनु मेको आन कली जचा तूचा गेतामी।
14 मिनु मुल गे आं कली लावो, इ होव़प कली ‘एलीया एक बाक्त’ देंनो, देंतीनी। मेकोमी आं कली थमा पा साइक्ब” देंमाक्त।
15 मिनु एलीयामी “गो मेको आ ङोंइती बाक्शो मुर नेल्ल आन परमप्रभु यावे ब्रोंइशा बाक्शो खोदेंशो पा, मुलाक्ती थमा पा आहाब कली ग्रुम्नुङ” देंमाक्त।
16 मिनु ओबदिया आहाब कली ग्रुम्थ लमाक्त। मिनु मेको कली मेको लोव़ शेंदा बाक्त। मिनु आहाब एलीया कली ग्रुम्थ जाक्माक्त।
17 मिनु आहाबमी एलीया कली तशा, मेको कली “इस्राएल कली श्येत गेब गेन नवे?” दे मदा बाक्त। येरमीया ३८:४
18 मिनु एलीयाम “इस्राएल कली श्येत गेब गो मनङ। तन्न गे नु इन आफ आ खिं ङा मुर इस्राएल कली श्येत गेब ननी। मारदे हना गे परमप्रभु यावे आ शेंतीक प्रोंइशा, बाल देवता आ नोले खोइश्शो बाक्तीनी। १राजा १६:३१-३३
19 मोपतीके मुल कारमेल डांडाम इस्राएल ङा मुर नेल्ल आं कली ग्रुम्पाइक्चा कली ब्रेत्तीन। मिनु इजेबेलम थुल्शा वोइश्शो बाल देवता आ नोले दुम्ब लोव़ पाइब ४ सहे ५० जना मुर नु अशेराह देवी आ नोले दुम्ब लोव़ पाइब ४ सहे जना मुर नेल्ल आन कली यो ब्रेत्तीन” देंमाक्त।
20 मोपतीके आहाबमी इस्राएली नेल्ल आन कली लोव़ सोइक्तीमी बाक्त। मिनु बाल नु अशेराह देवी आस नोले दुम्ब लोव़ पाइब नेल्ल आन कली कारमेल डांडाम पुक्मी बाक्त।
21 मिनु एलीया मुर नेल्ल आन ङोंइती राप्शा “गे गेना सम्म थुं निक्शी पा बाक्नीनी? परमप्रभु यावे, थमा परमप्रभु बाक्ब देंनीनी हना, मेको आ नोले खोतीन। बालन परमप्रभु बाक्ब देंनीनी हना, मेको आ नोले खोतीन” देंमाक्त। तन्न मुरपुकीम लोव़ का यो मलेत्थु, सिक्सी पा बाक्मा बाक्त। यहोसु २४:१४; मत्ती ६:२४
22 मिनु एलीयाम मेको आन कली “परमप्रभु यावे आ लोव़ पाइब गो आं का ला लीती। तन्न बाल आ नोले दुम्ब लोव़ पाइब ४ सहे ५० जना बाक्नीम।
23 मुल आंइ कली ब्यफ निक्शी चाक्शा गेने। मिनु मेकोपुकीम का योव़सीशा मेको कली क्योरशा चेक्शा, शी तार वोइश्शा, मी मसुइक्थु वोइक्चा माल्नीम। गो यो मेको अर्को कली क्योरशा मो पान शी तार वोइश्शा मी मसुइक्थु वोइक्नुङ।
24 मिनु गे इन देवता आ नें थिशा, मेको कली पुनीन। गो परमप्रभु यावे आ नें थिशा, मेको कली पुंइनुङ। मिनु पुंइशो नेंशा, मी सोइक्ब, परमप्रभु बाक्ब” देंमाक्त। मिनु मुर नेल्लेमी “दुम्ब इन देंशो लोव़ ठीक बाक्ब” देंमा बाक्त। उत्पत्ती १५:१७
25 मिनु एलीयाम बाल आ लोव़ पाइब नेल्ल आन कली “गे ङोंइती ब्यफ का योव़शा, मेको कली क्योरीन। मारदे हना गे शुश बाक्नीनी। मिनु इन देवता आ नें थिशा पुनीन। तन्न मी मसुइक्तीन” दे माइक्मी बाक्त।
26 मोपतीके मेको आन योव़शो ब्यफ लांइसीशा, क्योरशा चढ़ेशा, बाल आ नें थिशा सुनी रे नाक्त सम्म “ए बाल! आंइ कली लोव़ लेत्तीकी” दे ग्रीमा बाक्त। तन्न मेकेर मारेइ मदुम्माक्त। मारेइ सेंदा यो मनेंसे बाक्त। मिनु मेकोपुकी मेको आन सेल्शो चढ़ेतीक आ एर ओंथ प्रेक्ना प्रेक्न सिल पामे बाक्त।
27 मिनु नाक्त उइक्थ दुम्मेनु, एलीयाम मेको आन कली “मुल यो ठेयब सेंदा पा ग्रीङीन। मेको थमा पा देवता बाक्ब। मेको मिम्ना मिम्न बाक्म माइ, ना हिरथ गाक्म कों? ना ङोन लम कों? ना इप्शा बाक्म कों? मेको कली पोक्चा माल्ब” दे शुक्शी पा लोव़ पवा बाक्त।
28 मोपतीके मेको चिनु ठेयब सेंदा पा ग्रीमा बाक्त। मिनु मेकोपुकीम आन रिती थिती पा आंम आन रां तरवार नु भालाम चेस्सीशा, हुश चुंइसमा बाक्त।
29 मोपा नाक्त रे नाक्दो चढ़ेची ना सम्म ग्रीना ग्रीन बाक्मा बाक्त। तन्न मेकेर मारेइ मदुम्माक्त। मारेइ सेंदा यो मनेंसे बाक्त। मी यो मयिमाक्त।
30 मिनु एलीयाम मुर नेल्ल आन कली “आं नेक्था जाक्कीन” देंमाक्त। मिनु मेको नेल्ल मेको आ नेक्था जाक्मा बाक्त। मिनु मेकोम ङोंइती ब्रेश्शो परमप्रभु यावे कली चढ़ेतीके लेंशा सेला बाक्त।
31 मिनु एलीयाम १२ ओटा फुल्लु चाक्मी बाक्त। मेको याकूब आ १२ जना तौ आन थर का का पा १२ ओटा फुल्लु गुबा बाक्त। ङोंइती परमप्रभु यावेमी याकूब कली “इ नें इस्राएल दुम्ब” देंशो बाक्माक्त। प्रस्थान २४:४; उत्पत्ती ३२:२९
32 मिनु मेकोमी मेको फुल्लु रे परमप्रभु यावे आ नेंम चढ़ेतीक का सेला बाक्त। मिनु मेको चढ़ेतीक कली एर ओंथ हिरशा, कुला दोवा बाक्त। मेकेर सेआह अन्न पुक्तीक बोस निक्शी रिक्ब बाक्माक्त। सेआह का ७.३ लिटर बाक्ब।
33 मिनु नोले शी गार पाइश्शा, मेको ब्यफ क्योरशा चेक्शा, मेको शी तार वोदा बाक्त। मिनु मेकोमी मुर आन कली “गे ४ गाग्री ब्वाक्कु चाक्शा, एको चोशा चढ़ेतीक नु शी तार लुक्तीन” दे माइक्मी बाक्त। मिनु मेकोपुकीम मो पामे बाक्त।
34 मिनु नोले मेकोमी “मेको लेंशा पने” देंमाक्त। मिनु मेकोपुकीम मो पामे बाक्त। मिनु मेकोम लेंशा “चीनु खेयप सां मो पने” देंमाक्त। मिनु मेकोपुकीम खेयप सां यो मो पामे बाक्त।
35 मिनु चढ़ेतीक आ एर ओंथ ङा कुला नेल्ल ब्वाक्कु ब्रीशा क्युम्माक्त।
36 मिनु नाक्त किंत किंत ङा नाक्दो ङा चढ़ेची ना परमप्रभु यावे आ लोव़ पाइब एलीयामी मेको आ चढ़ेतीक आ ङोंइती लशा “परमप्रभु यावे, अब्राहाम, इसहाक नु इस्राएल आ परमप्रभु, गे का ला इस्राएल रागीम परमप्रभु बाक्नीनी, दे मुलाक्ती एको आन कली तुइक्पतीन। मिनु गो इन गेय पाइब बाक्नुङ। मिनु गो एको नेल्ल इन देंतीके पशो बाक्नुङ, दे यो एको आन कली तुइक्पतीन।
37 आं लोव़ लेत्तीनी। परमप्रभु यावे, आं लोव़ लेत्तीनी। मिनु एको मुरपुकीम गेन परमप्रभु यावे, थमा परमप्रभु बाक्नीनी, दे तुइक्तमेक्ल। एको आन थुं लेप्पाइक्ब गेन बाक्नीनी” देंमाक्त।
38 मिनु इर रे परमप्रभु यावे आ मी यिशा चोशा चढ़ेतीके, चोशा चढ़ेतीक ङा शी, फुल्लु नु खप नेल्ल नेक्गा बाक्त। मिनु मेको कुला ङा ब्वाक्कु यो सोव़माक्त। लेवी ९:२४
39 मिनु मुर नेल्ल मेको तशा, खुम्की पा बाप्शा “परमप्रभु यावे, थमा पा परमप्रभु बाक्माक्त। परमप्रभु यावे, थमा पा परमप्रभु बाक्माक्त” देंमा बाक्त।
40 मिनु एलीयामी मेको आन कली “बाल आ लोव़ पाइब आन कली ग्याइक्तीन। का यो प्रोक्चा मतामेक्ल” दे माइक्मी बाक्त। मिनु मेकोपुकीम मेको आन कली ग्याइक्तमे बाक्त। मिनु एलीयाम मेको आन कली किशोन खोल्साम लाइश्शा साइक्मी बाक्त। प्रस्थान २२:१९; ब्यवस्था १३:६-९
41 मिनु एलीयाम आहाब कली “लशा जने तूङीन। मारदे हना गो ठेयब रेउ आ रेयके नेंता” देंमाक्त। याकूब ५:१८
42 मिनु आहाब जचा तूचा कली लमाक्त। तन्न एलीया चहिं कारमेल डांडा ङोइश्शा, मेकेर आ पिया पोक्चीम ख्रेप्शा बाक्माक्त।
43 मिनु मेकोमी आ गेय पाइब कली “लशा, समुन्द्र गे कोव़ङो” दे मदा बाक्त। मिनु मेको लशा कोव़ङा बाक्त। मिनु मेकोमी “मेकेर मारेइ मबा” देंमाक्त। मिनु एलीयामी मेको कली “७ खेयप मेकेर लशा, कोव़ङो” दे सोइक्ता बाक्त।
44 मिनु ७ खेयप ङा पाली मेकोमी “मुर आ गुइ खोमो गोस्स का समुन्द्र रे बोक्शो ताता” देंमाक्त। मिनु एलीयाम मेको कली “मुल लशा आहाब कली ‘इन बग्गी ठीक पा, उइ खिं लने। मो मपाइतीनी हना, इन कली रेउम तेक्ब’ दे मतो” देंमाक्त।
45 मिनु क्येर गोस्सुम सरीङ सुम्शा, फश गिवार पा ठेयब रेउ यिचा गोवा बाक्त। मिनु आहाब आ बग्गी ङोइश्शा येज्रेल सहर लमाक्त।
46 मिनु परमप्रभु यावेमी एलीया कली थिवा बाक्त। मिनु मेको आ फेक्शो वा खाइश्शा आहाब आ ङोंइङोंइती येज्रेल ङा ठेयब लाप्चो सम्म दोरशा लमाक्त।