1 Kings 17 in Sunwar
1 मिनु गिलाद ङा तिश्बे सहर ङा एलीयाम आहाब कली “परमप्रभु यावे, इस्राएली आन परमप्रभु ब्रोंइशा बाक्शो खोदेंशो पा, गो मेको आ ङोंइती राप्शा गेय पाइनुङ। इस्राएलम रेउ नु सीत मारेइ मयीब” देंमाक्त। १राजा ८:३५; लूका ४:२५; याकूब ५:१७; प्रकाश ११:६
2 मिनु परमप्रभु यावेमी एलीया कली लोव़ पवा बाक्त।
3 मार लोव़ पवा बाक्त देंशा हना “एको रागी प्रोंइशा, पूर्ब गे लावो। मिनु यर्दन आ पूर्ब गे बाक्शो केरीथ खोलाम लशा ख्रुइश्शा बाक्को।
4 गे मेको खोला ङा ब्वाक्कु तूङो। मिनु गो इ कली थुल्चा कली मेकेर ङा खद आन कली अरेता” देंमाक्त।
5 मिनु मेकोमी परमप्रभु यावे आ देंशो खोदेंशो पवा बाक्त। मिनु मेको यर्दन आ पूर्बम बाक्शो केरीथ खोला लशा, ख्रुइश्शा बाक्माक्त।
6 मिनु खदपुकीम मेको कली नाक्दो सुनी शोब्ले नु श्ये चाक्शा, गेमे बाक्त। मिनु एलीया मेको खोला ङा ब्वाक्कु तूशा बाक्माक्त।
7 इच्का नाक्त नोले रेउ मयितीके मेको खोला ङा ब्वाक्कु सोव़माक्त।
8 मिनु परमप्रभु यावेमी मेको कली लोव़ पवा बाक्त।
9 मार लोव़ पवा बाक्त देंशा हना “मुल गे सीदोन ङा चारेफाथ सहर लावो। गो मेकेर इ कली थुल्चा कली आ वोंइश बेक्शो मीश मुर का कली अरेता” देंमाक्त। लूका ४:२५-२६
10 मोपतीके मेको चारेफाथ सहरम लमाक्त। मिनु मेको चारेफाथ सहर ङा ठेयब लाप्चोम जाक्दीम्मेनु, आ वोंइश बेक्शो मीश मुर का शी खुम्ना खुम्न बाक्शो तवा बाक्त। मिनु मेको कली ब्रेश्शा “आं कली शिशी पा लोटा का ब्वाक्कु तूचा गेयी। मिनु गो तूनुङ” देंमाक्त।
11 मिनु मेको मीश मुर ब्वाक्कु ब्रथ लन लना, लेंशा ब्रेश्शा “आं कली शिशी पा टुक्रा का शोब्ले यो पिश्शा गेयी” देंमाक्त।
12 तन्न मेकोमी “परमप्रभु यावे, इन परमप्रभु ब्रोंइशा बाक्शो खोदेंशो पा बोसुम मुठी का फस नु ढुङग्रोम इच्का खोइ तेल ङा लाक्शा, आं खिंम मारेइ मबाक्ब। गो इच्का खोइ शी खुप्शा, खिं लशा, गो नु आ तौ आंस कली शोब्ले सेल्नुङ। मिनु गो मेको जशा, बेक्नस्कु” देंमाक्त।
13 मिनु एलीयाम मेको कली “महिनो, खिं लशा इ देंशो खोदेंशो पावो। तन्न मेको क्येङा ङोंइती बटुक का सेल्शा, एक आं बाक्तीक चाक्को। मिनु मेको नोले इस कली जचा थोव़क सेलो।
14 मारदे हना परमप्रभु यावे, इस्राएली आन परमप्रभुमी ‘गो रागीम रेउ मयिपदु सम्म फस मनुप्ब। मिनु ढुङग्रो ङा तेल यो मनुप्ब’ देंशो बाक्ब” देंमाक्त। २राजा ४:२-४
15 मिनु मेको मीश मुर लशा एलीयाम देंशो खोदेंशो पवा बाक्त। मिनु मेको नेल्ल आन कली शुश नाक्त सम्म जचा थोव़क गाम्माक्त।
16 मारदे हना एलीया रे पा परमप्रभु यावेम देंशो खोदेंशो पा बोस ङा फस मनुम्माक्त। मिनु ढुङग्रो ङा तेल यो मनुम्माक्त।
17 इच्का नाक्त नोले मेको मीश मुर, मेको खिं ङा होव़पोक्म आ तौ रोइ पवा बाक्त। मिनु मेको नाक्त किंत किंत मरिम्शो दुम्ना दुम्न लमाक्त। मिनु नोले बेक्माक्त।
18 मिनु मेको मीश मुरुम एलीया कली “परमप्रभु आ मुर, गे नु गो इस दातेम मार मरिम्शो दुम्शो बाक्बा? मार, गे आं पाप कोंइशा, आं तौ कली साइक्थ जाक्नी?” देंमाक्त।
19 मिनु एलीयाम “इ तौ आं कली गेयी” देंमाक्त। मिनु मेकोमी मेको आ तौ आ गुइ रे ताक्शा आ बाक्तीक तला तार लदा बाक्त। मिनु मेको कली आ ब्राख्येम वोदा बाक्त।
20 मेको नोले मेकोमी ठेयब सेंदा पा परमप्रभु यावे कली “परमप्रभु यावे, आं परमप्रभु, गो सुका आ खिंम बाक्ङा, मेको आ तौ बेक्पा मेको वोंइश बेक्शो मीश मुर कली मारदे श्येत गेनी” देंमाक्त।
21 मिनु मेको सां खेयप मेको बेक्शो आल तार गोल्माक्त। मिनु ठेयब सेंदा पा, परमप्रभु यावे कली “परमप्रभु यावे, आं परमप्रभु, एको आल कली लेंशा ब्रोंइपतीन” देंमाक्त। २राजा ४:३४; प्रेरित २०:१०
22 मिनु परमप्रभु यावेमी एलीया आ पुंइशो लोव़ नेना बाक्त। मिनु मेको आल ब्रोंइमाक्त।
23 मिनु एलीयाम मेको कली पोक्शा तला तार रे आगा यिदा बाक्त। मिनु मेको आ ममा कली गेशा “कोव़ङो, इ तौ ब्रोंइत” दे मदा बाक्त। लूका ७:१५; हिब्रू ११:३५
24 मिनु मेको मीश मुरुमी एलीया कली “गे परमप्रभु आ मुर बाक्नीनी, दे मुल गो थमा पा तुइक्ताक्ङ। मिनु इन देंशो परमप्रभु यावे आ लोव़ थमा बाक्त” देंमाक्त।