1 Corinthians 6 in Sunwar

1 इन दाते ङा का निक्‍शी जिम्‍तेक्‍म। मिनु मारदे निसाफ पाइब आन ङोंइती लाइश्‍शा मुददा कोप्‍शा, थमा मसुइक्‍ब निसाफ पाइब आन गुइमी गेनीनी? आंमा इन दातेम गारपाइक्‍चा माल्‍शो ननी।

2 थमा सुइक्‍बपुकीमी नेल्‍ल रागी ङा मुर आन कली निसाफ पाइनीम देंशो लोव़ मतुइक्‍नीनी ङा? गे रागी ङा मुर आन कली निसाफ पाइतीनी हना, इन दाते ङा आइक्‍च लोव़ गारपाइक्‍ने मचाप्‍नीनी ङा? मत्ती १९:२८

3 गोपुकीमी परमप्रभु यावे आ स्‍वर्ग ङा गेय पाइब आन कली लाइ यो निसाफ पाइनीकी देंशो लोव़ यो प्रेंदीनी? आंइ नाक्‍त किंत किंत ङा पतीक मार बाक्‍बा ङा?

4 इन दातेमी मोदेंशो जीब खे‍ब बाक्‍त हना, मारदे थमा मसुइक्‍ब, महिक्‍सीशो मुर आन गुइमी निसाफ पचा कली गेनीनी।

5 मोदेंशो पशोमी गे मुने दोक्‍‍तीनी। इन दातेमी मोदेंशो मुर कली निसाफ पाइब जोक्‍ब तुइक्‍ब लोक्‍ब का मबाक्‍बा ङा?

6 तन्‍न लोक्‍बमी लोक्‍ब कली मुददा कोप्‍शा, थमा मसुइक्‍ब आन ङोंइती चाक्‍दीश्‍शो तशा, गो थम मरिम्‍शो लाक्‍ती।

7 इन जिशो ठीक मलाक्‍नुङ। इन के मार लाइक्‍तेक्‍म हना यो, मार पाम्‍तेक्‍म हना यो, मुददा मकोप्‍थु, फाल्‍शा बाक्‍ने मचाप्‍नीनी? मत्ती ५:३८-४८; १थिस्‍सलोनिकी ५:१५; १पत्रुस ३:९

8 तन्‍न गे आंमा इन लोक्‍ब आन कली मरिम्‍शो पाइनीनी, रोइक्‍नीनी।

9 ठीक मपाइबपुकी परमप्रभु यावे आ राज्‍य ओव़चा मताइनीम दे मतुइक्‍नीनी? दूली ममिम्‍तीने। मरिम्‍शो पाइबपुकीमी दोदेंशो पाइनीम देंशा हना, पात्‍के, तेल्‍लेम पाइनीमी, मूर्ति कली पूजा पाइनीमी, मुर आन मीश लाइक्‍नीमी, वोंइश मुर वोंइश मुर ब्‍वांइ‍सीनीमी, १तिमोथी १:९-११; गलाती ५:१९-२१

10 खुइ पाइनीमी, शिं‍म पाइनीमी, शांबु राकसीमी दुक्‍शा गाक्‍नीमी, शुक्‍शी लोव़ पा गाक्‍नीमी, मुर आन के बाक्‍शो थोव़क रोइश्‍शा, श्‍येत गेनीमी। मोदेंशो पाइबपुकी परमप्रभु यावे आ राज्‍यम ओव़चा मताइनीम।

11 इन दातेमी का निक्‍शी मोदेंशो बाक्‍मा बाक्‍त। तन्‍न मुल गे चिक्‍शो खोदेंशो पा, परमप्रभु यावे आ मुर दुम्‍शा, प्रभु येसु ख्रीस्‍त आ नेंमी नु इं परमप्रभु यावे आ सोक्‍तीम पतीके ठीक मुर सेल्‍चा पुंइसाक्‍नी। तीतस ३:३-७; १कोरिन्‍थी १:२; रोमी ३:२६

12 गो मार गेय पचा दाक्‍तु, मेको पने चाप्‍नुङ। तन्‍न गेय का निक्‍शी आं कली रिम्‍शो मदुम्‍ब। गो मारेइ पने चाप्‍ता हना यो, मरिम्‍शो पतीक आ वाइल मदुम्‍नुङ। १कोरिन्‍थी १०:२३

13 जचा थोव़क कोव़ज कली बाक्‍ब, कोव़ज जचा थोव़क कली बाक्‍ब। मिनु परमप्रभु यावेमी निम्‍फा आस कली जाम्‍शा लाइब सेल्‍शो बाक्‍ब। मुर आ रां ग्रांग्रा दिशो तेल्‍लेम पचा कली मसेल्‍शो बाक्‍ब। तन्‍न रां प्रभु कली सेल्‍शो बाक्‍ब। मिनु प्रभु यो रां कली सेल्‍शो बाक्‍ब। १थिस्‍सलोनिकी ४:३-५

14 परमप्रभु यावेमी प्रभु कली बेक्‍शो रे सेंताक्‍व। मिनु आ सक्तिम इं कली यो सेंब। १कोरिन्‍थी १५:२०; २कोरिन्‍थी ४:१४

15 इन रां ख्रीस्‍त आ रां बाक्‍ब दे मतुइक्‍नीनी? मिनु ख्रीस्‍त आ रां लाइश्‍शा, तेल्‍लेम आ रां सेल्‍चा ङा? मोदेंशो मपने।

16 तेल्‍लेम नु ब्‍वांइ‍सीशोनु, रां कांइचीक दुम्‍सीब दे मतुइक्‍नीनी? मार ब्रेक्‍शो बाक्‍त देंशा हना “मेको निक्‍शी रां का दुम्‍नीस” दे ब्रेक्‍शो बाक्‍ब। उत्‍पत्ती २:२४

17 तन्‍न प्रभु आ मुर दुम्‍यानु, प्रभु आ सोक्‍त नु इं सोक्‍त का दुम्‍नीस। यूहन्‍ना १७:२१-२२

18 ग्रांग्रा दिशो तेल्‍लेम पतीक रे ङोन बाक्‍कीन। मारदे हना मारेइ मारेइ पाप पनीनु, रां आगामी मपाइनीनी। तेल्‍लेम पनीनु चहिं आंम रां कली पाप पाइनीनी।

19 इन रां परमप्रभु यावे आ सोक्‍त आ खिं बाक्‍ब दे मतुइक्‍नीनी? परमप्रभु यावेमी आ सोक्‍त इन रांमी वोइक्‍तु। मिनु इन रां इन के ममाइ। १कोरिन्‍थी ३:१६

20 गे ग्‍याप्‍शो मुर बाक्‍नीनी। मोपतीके इन रांमी परमप्रभु यावे कली ठेयब सेलीने। १कोरिन्‍थी ७:२३; १पत्रुस १:१८-१९; फिलिप्‍पी १:२८