1 Corinthians 13 in Sunwar
1 गो मुर आन लोव़ पाता हना नु परमप्रभु यावे आ स्वर्ग ङा गेय पाइब आन लोव़ यो पाता हना, तन्न मुर आन कली मदाक्ताक्ङ हना, गो हेंथे पा ताप्शो किङगो नु रेयके पाइब बुप्केल खोदेंशो दुम्नुङ।
2 गो नु परमप्रभु यावे आ लोव़ पतीक सक्ति, ख्रुइश्शो लोव़ नेल्ल रुप्तीक सक्ति, नेल्ल जोक्तीक तुइक्तीक सक्ति नु डांडा याक्पाइक्तीक थमा सुइक्तीके बाक्त हना, तन्न गो नु दाक्तीक मबाक्त हना, गो मारेइ मनङ। मत्ती ७:२२; मत्ती १७:२०
3 आं के बाक्शो थोव़क नेल्ल योक्शा गेशा, आंम आं रां ग्रोइश्शा बेक्चा कली गेता हना यो, दाक्ब मुर चहिं मदुम्ती हना, मार रिम्शो दुम्नुङा ङा? गो शोर गाक्शो मदुम्नुङा ङा? मत्ती ६:२
4 दाक्तीकेमी श्येत फाल्ने नु शिशी पने चाप्ब। दाक्तीकेमी गेहे मपाइब मबोरब।
5 दाक्तीकेमी ठेयब मलेप्ब नु मुने दोक्चा ङा लोव़ मपाइब। दाक्तीकेमी आं के ला ठीक मदेंब। दाक्तीकेमी रीब पा मचुरब, ईख मकुरब। फिलिप्पी २:४
6 मरिम्शो पशो तशा मग्येरसीब। ठीक पशो तशा ग्येरसीब। रोमी १२:९
7 दाक्तीकेमी मारेइ मारेइ सुम्ब, मारेइ मारेइ थमा सुइक्ब, मारेइ मारेइ आस पाइब नु नेल्ल फाल्ने चाप्ब। हितोपदेस १०:११; मत्ती १८:२१-२२; रोमी १५:१
8 दाक्तीक गेनायो मक्याम्सीब। परमप्रभु यावे आ लोव़ पतीक जाम्शा लाइब। परमप्रभु यावे आ सोक्त आ लोव़ यो नुप्ब। तुइक्तीक सक्ति नुप्शा लाइब।
9 मारदे हना आंइ जोक्तीक तुइक्तीक आइक्च बाक्ब। आंइ परमप्रभु यावे आ लोव़ पतीक यो नेल्ल रुप्चा ङा मबाक्ब।
10 नोले चहिं गोपुकीमी नेल्ले तुइश्शा रुप्नय। मिनु मरुप्शो नु मतुइश्शो मारेइ मलीब।
11 गो आल बाक्ङानु, आलम ब्वाक्स पा ब्वाक्ती। आलम मिम्स पा मिम्ताक्ङ। आलम पस पा पाता। मिनु कोल्शा ठेयब दुम्शा, आलम खोदेंशो मपङ।
12 मुल गोपुकीमी ब्राब्रा पा ताइतय। मेना रिम्शो पा ताइनय। मुल गो इच्का ला रुप्नुङ। मेना नेल्ल रिम्शो पा रुप्नुङ। परमप्रभु यावेमी आं कली तुइश्शो बुद पा, गो मेना नेल्ल तुइक्नुङ। गन्ती १२:८; २कोरिन्थी ५:७; १कोरिन्थी ८:३
13 थमा सुइक्चा, परमप्रभु यावेमी आ देंशो नेल्ल खाप्ब, दे आस पा बाक्चा नु दाक्तीक सांफा बाक्नीम। मेको सांफामी दाक्तीक चहिं नेल्ल क्येङा ठेयब बाक्ब। १थिस्सलोनिकी १:३; १यूहन्ना ४:१६