1 Chronicles 28 in Sunwar
1 मिनु दाऊदमी यरूसलेम सहरम इस्राएली आन ठेयब मुर नेल्ले आन कली ग्रुम्पदा बाक्त। सु सु ग्रुम्पदा बाक्त देंशा हना, थर थर ङा ठेयब मुर, पिप आ गेय पाइब हुल हुल आन ठेयब मुर, हजार हजार लडाइ पाइब आन कप्तानपुकी, सहे सहे लडाइ पाइब आन कप्तानपुकी, पिप नु आ तौ आन मार मार नु बी ब्यफ कोव़ब आन ठेयब मुरपुकी, दरवारमी गेय पाइब आन ठेयब मुरपुकी, शुश सक्ति पाइश्शो लडाइ पाइबपुकी नु अरु महिंब लडाइ पाइब आन कली ग्रुम्पदा बाक्त।
2 मिनु पिप दाऊद बोक्शा मेको आन कली “आं लोक्ब नु आं मुर आं लोव़ नेनीन। गो परमप्रभु यावे आ कबल पशो सन्दोस कली नाइक्चा कली बाक्तीक का सेल्चा मिम्शो बाक्ती। परमप्रभु यावे, इं परमप्रभु आ खोइल थेक्तीक खोदेंशो दुम्चा माल्ब। गो मेको सेल्चा कली ठीक पाता। १इतिहास २२:६-१०; भजन संग्रह ९९:५; भजन संग्रह १३२:७
3 तन्न परमप्रभुमी आं कली ‘गे आं नें ठेयब सेल्चा कली खिं सेल्चा मदुम्ब। मारदे हना गे लडाइ पा हुश ख्राक्श पोक्शो बाक्ते’ देंत।
4 मो हना यो परमप्रभु यावे, इस्राएली आन परमप्रभुमी आं आफ आ खिं खिं रे आं कली गेना हना यो इस्राएलम पिप दुम्चा कली योव़ती। मारदे हना मेकोमी लां कोंइचा कली यहूदा कली योव़तु। मिनु यहूदा आ थर ङा खिं खिं रे आं आफ आ खिं कली योव़तु। मिनु आ आफ आ तौ आन दातेमी आं कली दाक्शा, इस्राएल ङा पिप सेल्ती। उत्पत्ती ४९:१०; १सामुएल १६:१,१२
5 परमप्रभु यावेमी आं कली शुश तौ गेती। परमप्रभु यावेमी आ राज्य इस्राएलम पिप दुम्चा कली आं तौ सोलोमन कली योव़तु।
6 मिनु आं कली ‘इ तौ सोलोमनमी आं खिं नु आं लाङगा सेल्चा माल्ब। मारदे हना गो आं तौ दुम्चा, दे मेको कली योव़ता। गो आ आफ दुम्नुङ। १इतिहास १७:११-१४
7 मेकोमी आं शेंशो नु निसाफ पतीक लोव़ टिना टिन बाक्ब। मुल खोदेंशो पा रिम्शो टिप्तु हना, गो मेको आ राज्य गेना हना यो बोल्यो सेल्नुङ’ देंमाक्त।
8 मोपतीके गे परमप्रभु यावे आ नेंम ग्रुम्शो इस्राएली नेल्ल आन ङोंइती नु इं परमप्रभु आ ङोंइती परमप्रभु यावे, इन परमप्रभु आ शेंतीके टिशा बिस्सीन। मिनु नोले मेको रिम्शो रागी इन के दुम्ब नु इन नोले इन आल आन कली गेना हना यो थेरशो रू दुम्ब।
9 आं तौ सोलोमन, इ आफ आ परमप्रभु कली तुइश्शा मालो। इ थुं नेल्लेमी ग्येरशा मेको आ नोले खोतो। मारदे हना परमप्रभु यावेमी इ थुं कोव़ना कोव़न, इन मिम्शो नु पशो नेल्ल तुइक्ब। गे मेको कली माल्तीवी हना, गे थित्नेवे। तन्न गे मेको कली प्रोंइतीवी हना, इ कली गेना हना यो कली प्रोंइब। येरमीया २९:१३-१४; १राजा ११:३१,३३
10 मुल होस पावो। मारदे हना परमप्रभु यावेमी आंम आ बाक्तीक खिं सेल्चा कली इ कलीन योव़तु। इ थुं ग्येत्थ लुक्च मपथु, गेय पावो” दे पिप दाऊदमी आ तौ कली मदा बाक्त।
11 मिनु नोले दाऊदम आ तौ सोलोमन कली परमप्रभु यावे आ खिं सेल्तीक ब्रेक्स गेवा बाक्त। मेको खिं ङा ब्रेक्समी परमप्रभु आ बाक्तीक, आ पिंडी, अरु खिं, मार मार वोइक्तीक, खिं आ तार ङा कोठापुकी, आगा ङा कोठापुकी नु सन्दोस नु आ सुम्तीके आ कोठा बाक्शो बाक्माक्त। प्रस्थान २५:९
12 दाऊद आ मिम्शो नेल्ल मेको ब्रेक्सम बाक्शो बाक्त। मेकोमी परमप्रभु यावे आ खिं ङा लाङगा, आ एर ओंथ नेल्ल ङा कोठापुकी, परमप्रभु आ खिं ङा मार मार वोइक्तीक कोठा नु नेल्ल गेशो थोव़क कली वोइक्तीक कोठा आ तौ कली गेवा बाक्त।
13 मिनु लेवी नु चढ़ेब आन हुल हुल, परमप्रभु यावे आ खिंमी मार मार गेय पचा नु मेकेर मार मार ग्योंबपुकी परमप्रभु यावे आ खिं ङा गेय कली सेल्चा नेल्ल मेको ब्रेक्सम ब्रेक्शो बाक्माक्त।
14 मार मार गेय पचा कली सुन के ग्योंब सेल्चा कली गिश सुन माल्बा, चांदी के ग्योंब सेल्चा कली गिश चांदी माल्बा, मेको ब्रेक्शो बाक्माक्त।
15 मिनु सुन के बत्ती दातीक नु आ दियारी आन कली गिश सुन माल्बा, चांदी के बत्ती दातीक नु आ दियारी आन कली गिश चांदी माल्बा नु मार मार गेय कली मार माल्बा नेल्ल ब्रेक्शो बाक्माक्त।
16 लहर पा वोइश्शो कोंइतीक शोब्ले कली सुन के टेबल गिश सुन नु चांदी के टेबल आन कली गिश चांदी माल्बा मेको ब्रेक्शो बाक्माक्त।
17 मिनु कांटा, ब्रुइक्तीक बोस, लोटा नु सुन के बोस आन कली गिश क्येख सुन माल्बा, मेको ब्रेक्शो बाक्माक्त। मिनु चांदी के बोस गिश चांदी माल्ब, मेको ब्रेक्शो बाक्माक्त।
18 क्येख सुन के धूप चोतीक कली गिश क्येख सुन माल्बा, मेको ब्रेक्शो बाक्माक्त। सुन के फ्रां प्राक्शा परमप्रभु यावे आ सन्दोस सुम्ब करूब आस कली कुरब बग्गी के यो ब्रेक्स यो सेल्शो बाक्माक्त। मिनु गिश सुन माल्बा, मेको ब्रेक्शो बाक्माक्त।
19 मिनु दाऊदमी “एको नेल्ल परमप्रभु यावेमी मार पचा, दोपा सेल्चा आं कली शेंताक्यी। मोपा गो मेको नेल्ल गेय ङा ब्रेक्स ब्रेक्ताक्ङ” दे दाऊदमी देंमाक्त।
20 मिनु दाऊदमी आ तौ सोलोमन कली “बोल्यो नु महिंब दुम्शा, एको गेय पावो। महिनो, इ थुं ग्येत्थ लुक्च मपावो। मारदे हना परमप्रभु यावे, आं परमप्रभु गे नु बाक्ब। परमप्रभु यावेमी आ खिंमी गेय पचा कली मारेइ मारेइ सेल्ने मथुमा सम्म इ कली मप्रोंइथु वारच पाइब। १इतिहास २२:१३; ब्यवस्था ३१:६
21 परमप्रभु आ खिंमी गेय पचा कली चढ़ेब नु लेवी आन हुल हुल ठीक दुम्शो बाक्नीम। मिनु मेको गेय पचा कली शुश जोक्ब तुइक्ब नु ग्येरशो गेय पाइब गे नु बाक्नीम। मिनु ठेयब मुरपुकी नु मुर नेल्लेमी इ देंशो नेल्ल टीनीम” दे दाऊदम आ तौ सोलोमन कली देंमाक्त।