1 Chronicles 14 in Sunwar

1 टायर ङा पिप हीराममी आ लोव़ कुरबपुकी दाऊद आ बाक्‍तीकेम सोइक्‍ता बाक्‍त। मेको कुरब मुर नु दाऊद आ खिं सेल्‍चा कली लेबानोन ङा लाइश्‍शो रवा आ शी, गारो प्रोव़ब नु शी के गेय पाइब सोइक्‍तीमी बाक्‍त।

2 मिनु दाऊदमी “मुल परमप्रभु यावेम आं कली इस्राएली आन पिप सेल्‍ती। मिनु आ मुर इस्राएली आन पर्बम आ राज्‍य ठेयब नु मान ताइब सेल्‍शो बाक्‍ब” दे तुइक्‍ता बाक्‍त।

3 दाऊदमी यरूसलेमम बाक्‍मेनु, अर्को मीश चाक्‍मी बाक्‍त। मिनु शुश तमी तौ आन आफ दुम्‍माक्‍त।

4 यरूसलेमम थिशो आ आल आन नें मार मार बाक्‍मा बाक्‍त देंशा हना, शम्‍मुआ शोबाब, नाथान, सोलोमन,

5 इभार, एली-शुआ नु एली-फेलेत,

6 नोगाह, नेफेग, याफीया,

7 एली-शामा, बेलीआदा नु एली-फेलेत बाक्‍मा बाक्‍त।

8 मिनु पलिस्‍तीमी दाऊद इस्राएल नेल्‍ल ङा पिप दुम्‍त देंशो लोव़ नेंशा, मेको नेल्‍ले दाऊद कली माल्‍थ लमा बाक्‍त। मिनु दाऊदम मेको लोव़ नेंशा पलिस्‍ती नु लडाइ पथ लमाक्‍त।

9 मिनु पलिस्‍ती जाक्‍शा, रेफाइम ङा बेंसीम मार मार रोइक्‍तमे बाक्‍त।

10 मोपतीके दाऊदमी परमप्रभु कली “गो लशा, पलिस्‍ती आन कली लडाइ तोङमी? गे मेको आन कली आं गुइमी गेनीनी?” दे हिल्‍लो पवा बाक्‍त। मिनु परमप्रभु यावेमी “इर ङोइश्‍शा लावो, गो मेको आन कली इ गुइमी गेनन” देंमाक्‍त।

11 मोपतीके दाऊद नु आ मुरपुकी इर ङोइश्‍शा लशा, बाल-पेराजीमम मेको आन कली लडाइ तोशा ग्रामा बाक्‍त। मिनु दाऊदमी “परमप्रभुमी खोला आ नेक्‍था ङा रू प्रेश्‍शो खोदेंशो पा, आं जोरी सत्रु आन कली साइक्‍मी बाक्‍त” देंत। मोपतीके मेको बाक्‍तीक आ नें बाल-पेराजीम वोदमे बाक्‍त।

12 मेकेर पलिस्‍तीपुकीम आन देवी देवता प्रोंइशा वोदमे बाक्‍त। मिनु दाऊदमी “मेको चोने” दे अरेवा बाक्‍त। ब्‍यवस्‍था ७:५-२५

13 मिनु पलिस्‍तीपुकीम लेंशा बेंसीम मार मार रोइक्‍चा गोव़मे बाक्‍त।

14 मिनु दाऊदमी लेंशा परमप्रभु कली हिल्‍लो पवा बाक्‍त। मिनु परमप्रभुम मेको कली “मुल गे इर ङोइश्‍शा मलने। गे नोले रे हिरशा, लचा माल्‍नेवे। शुश रवा बाक्‍तीके रे मेको आन नेक्‍था लशा लडाइ तोव़मी।

15 गे रवा आन ङर ङरमी लडाइ पाइब आन गाक्‍शो नेंनी चोटी मेको आन कली लडाइ तोव़मी। मारदे हना परमप्रभु इन ङोंइती पलिस्‍ती आन लडाइ पाइब नु लडाइ पथ लाइब” देंमाक्‍त।

16 मिनु दाऊदमी परमप्रभुम देंशो खोदेंशो पा लडाइ पवा बाक्‍त। मिनु मेकोम पलिस्‍ती आन लडाइ पाइब आन कली गिबोन रे गेजेर सम्‍म खेदा पा सदमे बाक्‍त।

17 मोपा दाऊद आ ठेयब दुम्‍तीके रागी नेल्‍ल ब्रमाक्‍त। मिनु परमप्रभु यावेमी रागी रागी ङा मुर नेल्‍ल आन थुंमी दाऊद क्‍येङा हिंतीक थुं वोदा बाक्‍त।