1 Chronicles 10 in Sunwar

1 पलिस्‍तीपुकीम इस्राएल नु लडाइ पामे बाक्‍त। मिनु इस्राएल ङा मुर पलिस्‍ती आन ङोंइती रे प्रोक्‍मा बाक्‍त। मिनु गिल्‍बोआ डांडाम साइक्‍चा पुंइसामा बाक्‍त।

2 मिनु पलिस्‍तीपुकीम सावल नु आ तौ आन कली खेदा पामे बाक्‍त। मिनु सावल आ तौ सांफा योनाथन, अबीनादाब नु माल्‍कीशुआ सदमे बाक्‍त।

3 मेको लडाइम सावल कली थम श्‍येत दुम्‍माक्‍त। मारदे हना का निक्‍शी ब्रा आप्‍बपुकीम मेको कली आप्‍मे बाक्‍त। मिनु सावल मेको रे गार दुम्‍माक्‍त।

4 मोपतीके सावलमी आ या कुरब कली “इ तरवार शोइश्‍शा साइय्‍यी। ख्रोइक्‍तीक चिनु मख्रोइश्‍शोपुकीम आं कली ग्‍याइश्‍शा मरिम्‍शो मपाइय्‍यीमील” दे मदा बाक्‍त। तन्‍न आ या कुरब हिंशा, मबिस्‍से बाक्‍त। मिनु सावल आ या शोइश्‍शा, तूसे बाक्‍त।

5 मिनु मेको या कुरबम सावल कली बेक्‍शो तशा, आं यो आ या शोइश्‍शा आंम कली सांइसे बाक्‍त।

6 मोपा सावल नु आ तौ सांफा आ खिं ङा मुर नेल्‍ल कालेम बेक्‍मा बाक्‍त।

7 मिनु बेंसीम बाक्‍शो इस्राएली नेल्‍लेमी लडाइ पाइब प्रोक्‍शो नु सावल नु आ तौ बेक्‍शो तशा, मेको आन सहर प्रोंइशा प्रोक्‍मा बाक्‍त। मिनु पलिस्‍ती मेकेर जाक्‍दीश्‍शा, मेको सहर आन के सेल्‍मे बाक्‍त।

8 मिनु आ दीसा पलिस्‍तीपुकी बेक्‍शो मुर आन मार मार गुप्‍थ जाक्‍शा, सावल नु आ तौ आन कली गिल्‍बोआ डांडाम बेक्‍शो थित्‍मे बाक्‍त।

9 मिनु मेकोपुकीम मेको आ फेक्‍तीक फ्रुइश्‍शा, आ पिया ख्रोइश्‍शा लाइश्‍शा, आन रागी ङा देवता नु मुर नेल्‍ल आन कली मेको लोव़ नेंपाइक्‍चा कली कुरब मुर आन कली सोइक्‍तमे बाक्‍त।

10 मेकोपुकीम सावल आ या आन देवी देवता आन थानम वोदमे बाक्‍त। आ पिया दागोन आ थानम क्‍युक्‍गमे बाक्‍त।

11 मिनु याबेश-गिलाद सहर ङा मुरपुकीमी पलिस्‍तीमी सावल कली मार मार पदमे, मेको नेंशा,

12 बोल्‍यो लडाइ पाइब नेल्‍ले बोक्‍शा, सावल नु आ तौ आन रां ब्रथ लमा बाक्‍त। मिनु मेकोपुकीम मेको आन रां याबेश सहर चाक्‍गमे बाक्‍त। मिनु याबेश ङा मुरपुकीमी मेको आन कली यावेश ङा ठेयब रवा आ पुंम थिम्‍मे बाक्‍त। मिनु ७ नाक्‍त सम्‍म माइजा बाक्‍मा बाक्‍त। २सामुएल २:४-५

13 मोपा सावल आ परमप्रभु यावे प्रोंइतीके आ पर्बम बेक्‍चा माल्‍दा बाक्‍त। मेकोमी परमप्रभु यावे आ शेंशो मटिथु, बेक्‍शो मुर नु लोव़ पाइब आ लोव़ नेना बाक्‍त। १सामुएल १५:२३; १सामुएल २८:८

14 मिनु परमप्रभु यावे आ अर्ती ममाल्‍थु, मनेना बाक्‍त। मोपतीके परमप्रभु यावेमी मेको कली सदा बाक्‍त। मिनु आ राज्‍य येस्‍से आ तौ दाऊद कली गेवा बाक्‍त।