Luke 5 in Secoya

1 Jesús Genesaret Jaira të̱ꞌtëpare paꞌi quëaquëna, jai pa̱i quiꞌiyerepa Maijaꞌquë coca asañuꞌu cajë dateña.

2 Daijëna, Jesupi caya yohuë, peo huë̱api huahuaquëna, ñapi. I̱ti yohuë acohuaꞌipi yoꞌe nëare tsoa to̱ñuꞌu cajë tu̱mareña.

3 Ñani ja̱ maca Jesús yohuëna aya mëjiꞌi. I̱ aya mëisi yohuë Simón tse̱ pacoꞌë. Ja̱ maca capi, aꞌri maña soꞌona jëjo sao huahuojë̱ꞌë, yohuë. Huahuojëna, jaꞌruni ñuꞌi Jesús pa̱ire yeꞌya huëopi.

4 Yeꞌya tëjini Simónre capi: “Huaꞌi paꞌi hue̱ꞌñana yohuëja̱ꞌa sani mësaru yoꞌe nëapi huaꞌire neñuꞌu.”

5 Simónpi sehuopi: “Yeꞌyaquë, siꞌa ñami teꞌe huaꞌireje̱ neñe peoyerepa ai yoꞌohuë, nemaꞌpë. Ja̱je pa̱sicohuaꞌitaꞌa mëꞌëpi cua̱ñeñe sëte huaꞌi yoꞌerë je̱o dëosiꞌi.”

6 Cani je̱o dëosi maca huaꞌipi airepa ti̱mërena, huaꞌi yoꞌerëpi tëi huëo.

7 Ja̱ maca yequë yohuëre cajeohuaꞌi paꞌicohuaꞌire jë̱ñapi soihuë. Soina, dani siꞌahuaꞌi caya yohuë̱a ea tete macarepa aya ti̱mëhuë.

8 Ja̱ maca Simón Pedro iyere ñani doꞌre jaꞌruni Jesure capi: “Saijë̱ꞌë, Ëjaë, yëꞌë quë̱no maca paꞌimaꞌë. Yëꞌë coꞌaye yoꞌoquë aꞌë.”

9 Coa quëquë huesëni ja̱je caquëna, i̱ ja̱ꞌre co̱ni paꞌicohuaꞌije̱ huaꞌire neseꞌere cuasajë ai quëquëhuë.

10 Cuiꞌne, Zebedeo mamajë Jacobo cuiꞌne Juan, Simón cajeohuaꞌije̱ quëquë huesësicohuaꞌi paëꞌë. Ja̱je quëquëjëtaꞌare Jesús capi, Simónre: “Caꞌramaꞌë paꞌijë̱ꞌë. Mëꞌë yurepi pa̱ire yoꞌecaiquë paꞌija̱ꞌquë aꞌë.”

11 Ja̱ maca yohuë̱are të̱ꞌtëpana sani je̱oni Jesús ja̱ꞌre saëꞌë.

12 Jesús pa̱i daripëre paꞌina, teꞌi pa̱i ja̱ꞌju dahuë ju̱ꞌiquëpi ti̱tani Jesure ñani i̱ tsiapi yejare pana se̱meni se̱jiꞌi. Ñeje caquë: “Ejaë, mëꞌëpi yëꞌëre jujuye yëni jujujë̱ꞌë. Yëꞌë ju̱ꞌi dahuë.”

13 Ja̱ maca Jesús i̱ jë̱tëpi patoquë capi: “Yëꞌë jujucaiyë.” Caquëna, ja̱re i̱ti macapi ja̱ꞌju dahuë peoquë deꞌopi.

14 Ja̱ maca Jesús i̱te capi: “Quëamaꞌë paꞌijë̱ꞌë, pa̱ire. Coa Maijaꞌquë huëꞌe ñacaicohuaꞌiseꞌere sani i̱ñojëꞌë. I̱ñoni mëꞌë coꞌayere tsoa to̱quë yoꞌo doꞌire i̱sijë̱ꞌë, Moisés cua̱ñequë paꞌiseꞌere. Ja̱je yoꞌoquëna, siꞌa huaꞌi mëꞌë ju̱ꞌiquë paꞌisiquëpi deꞌoquë po̱nëni yoꞌoye ñajaꞌcohuaꞌi aꞌë.”

15 Ja̱je paꞌiquëtaꞌare Jesús yoꞌoyepi jero saꞌana jai sajiꞌi. Ja̱je paꞌina, jai pa̱i i̱ caye asañuꞌu cajë daijëna, ju̱ꞌicohuaꞌije̱ daëꞌë, juju cua̱ñoñuꞌu cajë.

16 Ja̱je yoꞌojëna, Jesús pa̱i peo hue̱ꞌñana sai Maijaꞌquëre se̱jiꞌi.

17 Jesupi yeꞌyaquëna, ja̱rote jaꞌrusicohuaꞌipi ñuëꞌë. Fariseo acohuaꞌi cuiꞌne cua̱ñeseꞌe yeꞌyacohuaꞌi co̱ni, Galilea yejare siꞌa hue̱ꞌña paꞌicohuaꞌipi daisicohuaꞌi paëꞌë. Paꞌijëna, yecohuaꞌipi Judeapi cuiꞌne Jerusalénpi daisicohuaꞌije̱ paëꞌë. Paꞌijëna, Jesupi pajiꞌi, Maijaꞌquë tutu ju̱ꞌicohuaꞌire jujucaiye.

18 Paquëna, yoꞌoye peoquëpi ju̱ꞌiquëni ca̱i saihuëna o̱asiquëni cua̱ijë Jesús paꞌi hue̱ꞌña co̱areña, ñajaquë cajë.

19 Dajëtaꞌare caca hue̱ꞌñapi jai pa̱i ti̱mësico paꞌi doꞌire cacaye pa̱jë ña jujani huëꞌe jeteja̱ꞌa mëni peo coje tëteni ju̱ꞌiquëre pa̱i jopoja̱ꞌa meñe casahuë, Jesús ña hue̱ꞌña ca̱i saihuëna o̱asiquëni.

20 Ja̱ maca Jesús i̱ohuaꞌipi i̱te jujuquë api cuasayere ñani ju̱ꞌiquëre capi: “Mëꞌë coꞌaye yoꞌoseꞌere sa̱i deꞌhuacaiyë.”

21 Ja̱je caquëna, asani cua̱ñeseꞌe yeꞌyacohuaꞌi cuiꞌne fariseohuaꞌi cuasa huëoreña: “Pa̱ipi yequë coꞌaye yoꞌoseꞌere sa̱i deꞌhuacaiye peoji. Ja̱re Maijaꞌquëseꞌe sa̱i deꞌhuacaiye paꞌiji. ¿I̱queiꞌni, iquë ja̱ jerepa Maijaꞌquëre cueꞌcuequë caquë?”

22 Jesupi ja̱je cuasajëna, ñani capi: “¿Me yoꞌojë ja̱je cuasayeꞌni?

23 Coꞌaye yoꞌoseꞌere sa̱i deꞌhuaye cuiꞌne iquëre jujucaiye pa̱i cato yoꞌo ti̱ꞌa maꞌñe aꞌë. A̲ꞌjiñe yoꞌoye peoji.

24 Ja̱je paꞌito deꞌoji. I̱ñosiꞌi, mësarute. Yëꞌë Pa̱i Mamaquëpi teꞌipi iye yeja cua̱ñequëre papi coꞌaye yoꞌoseꞌere sa̱i deꞌhuacaiquë paꞌiyë.” Ja̱je se cani ju̱ꞌiquëre capi: “Mëꞌëni cayë, huëijë̱ꞌë. Më u̱icore i̱ni mëꞌë huëꞌena saijë̱ꞌë.”

25 Caquëna, ja̱ macarepa i̱ti ju̱ꞌiquë paꞌisiquëpi ja̱ohuaꞌi ñajëna, huëni nëcani i̱ u̱isicore se deꞌhuani Maijaꞌquëre sihuaquë caquë sajiꞌi, i̱ huëꞌena.

26 Saina, siꞌahuaꞌi ña quëquëni Maijaꞌquëre sihuajë careña. “Yurena ñahuë, pa̱ije yoꞌo maꞌñere yoꞌoye.”

27 Iye yoꞌosi jeteyoꞌje Jesús etaquë Leví hueꞌequëre ñapi, paꞌi doꞌi sa̱i hue̱ꞌñare ñuꞌi curire se̱ina, ñani capi: “Tuijë̱ꞌë, yëꞌëni.”

28 Ja̱ maca Leví i̱ yoꞌoye siꞌaye se je̱oni Jesús ja̱ꞌre co̱ni sajiꞌi.

29 Ja̱ jeteyoꞌje Leví jai fiesta nepi, i̱ huëꞌena, Jesuni sihuaquë. Ja̱rote cuiꞌne jai pa̱i paꞌi doꞌi se̱cohuaꞌi cuiꞌne yecohuaꞌi co̱ni a̱i saihuëna jaꞌrusicohuaꞌipi paëꞌë.

30 Paꞌijëna, ñani fariseohuaꞌi cuiꞌne cua̱ñeseꞌe yeꞌyacohuaꞌi Jesure yeꞌyecohuaꞌipi deꞌoye yoꞌomaꞌcohuaꞌi aꞌë, cuasajë sa̱ñope ca huëojë careña: “¿Me yoꞌojë mësaru paꞌi doꞌi se̱cohuaꞌi ja̱ꞌre cuiꞌne coꞌaye yoꞌocohuaꞌi ja̱ꞌre co̱ni a̱ijë cuiꞌne u̱cuyeꞌni?”

31 Cajëna, asani Jesupi sehuopi: “Deꞌoye paꞌicohuaꞌi cuiꞌne huajëcohuaꞌi jujuquëre coꞌeye pa̱ñë. Ja̱je paꞌina, ju̱ꞌicohuaꞌipi coꞌecohuaꞌi aꞌë, jujuquëre.

32 Ja̱ doꞌire deꞌocohuaꞌini soisiꞌi caquë, daisiquë peoyë. Coꞌacohuaꞌini soisiꞌi caquë daisiquë aꞌë, ja̱ohuaꞌipi ja̱ꞌrë yoꞌoseꞌe je̱oni po̱nëjajë caquë.”

33 Caquëna, i̱ohuaꞌipi Jesure se̱teña: “Juanre yeꞌyecohuaꞌi yoꞌoye sëte a̱imaꞌpë Maijaꞌquëre ai se̱jë yoꞌoyë, cuiꞌne fariseo yeꞌyecohuaꞌije̱. ¿Me yoꞌojë mëꞌë yeꞌyacohuaꞌiseꞌe siꞌanë a̱ijë cuiꞌne u̱cujë paꞌiyeꞌni?”

34 Cajëna, Jesupi sehuopi: “¿Hueja a̱o a̱ijaꞌcohuaꞌire soisicohuaꞌire a̱imaꞌpë paꞌijë̱ꞌë cacohuaꞌi aꞌni, mësaru, huejaquëpi i̱ti macare co̱ni paꞌito?

35 Ja̱je paꞌiquëtaꞌare yequë muꞌse huejaquëre yëꞌëre sioye paꞌiji. Ja̱ maca huejaquëpi peoëna, a̱o a̱imaꞌpë paꞌija̱ꞌcohuaꞌi aꞌë.”

36 Cuiꞌne quëa i̱ñopi, i̱ohuaꞌi ñañena co̱ni ñeje: “Yecohuaꞌije̱ huajë juꞌi ca̱re tëani ai juꞌi ca̱re sëomaꞌcohuaꞌi aꞌë. Ja̱je yoꞌocohuaꞌi pani coa huajë juꞌi ca̱re nejoñë. Cuiꞌne huajë ca̱ ca̱tipëpi ai juꞌi ca̱na sëosicohuaꞌi paꞌito teꞌoje̱ paꞌio ña cua̱ñoñe pa̱ji.

37 Ja̱re cuiꞌne paꞌiji. Cuiyaꞌi co̱no doye peoji, ai ca̱ꞌnihuë deꞌhuasicona. Ja̱je ai ca̱ꞌnihuëna huajë cuiyaꞌi co̱no doto yete saiye paꞌiji. Ja̱je yete saina, siꞌaye nejoñe paꞌiji, cuiyaꞌi co̱no cuiꞌne ca̱ꞌnihuë deꞌhuasi topëje̱ nejoñe paꞌiji.

38 Ja̱je paꞌina, huajë cuiyaꞌi co̱no doye paꞌiji, ja̱re cuiꞌne huajë ca̱ꞌni topëna. Ja̱je huajëyeseꞌe paꞌi deꞌoye quëcoja̱ꞌcoa.

39 Ja̱je paꞌina, oꞌsasi co̱no u̱cucohuaꞌije̱ huajë co̱no u̱cuye pa̱ñë, oꞌsasi co̱no ai deꞌoye aꞌë, cajë.”