Acts 20 in Rikbaktsa
1 Zipykbaiknahaze Pauro Sesus tuktsa inasikypykykze ispe niy: — Utakta aba piksi. Masedonia bo mokuru. Sesus humo tyspirikpotohinahaktsa! — niy. Iwazehi inakubaiknaha.
2 Kyze Epeso ekze niparak. Niytahi Masedonia bo niukuru. Sizubarẽtsa Sesus tuktsa bo inakozore. Pauro harere bo yhỹ nikaranaha. Sesus humo nisispirikpoko. Niytahi Keresia bo zumu.
3 Anaeze harakykbyihi byzoje zitsuze iwaze buburu zuba sak bo nipara tsihikik iwaze Sirija bo niparak. Sudeutsa Pauro pibeze tsihikiknaha. Asa zuba nipamykysokonaha: — Pauro tsaraha puẽtsikbyita eze tu tabezehik — nikaranaha. Pauro ana soho ziwaby. Hawa pibeze tsihikiknaha anahi ziwabyky. Iwatahi buburu zuba bo batu pão tsaraha bo batu koro. Niytahi Pauro hara taba niukuru. Masedonia bo ziksizo.
4 Ustsa Sesus tuktsa ituk niukurunaha. Sopataro Pihotse atahi Berija eze nipuruk, Aristarakus, Sekũdo niwatihi Tesaronika ezektsa, Kaijo Derebe ezekta, Timoteo, Tikiko, Toropimo Asia ezektsa iwatsa Pauro tuk niukurunaha.
5 Asaktsa myharaze niukurunaha. Toroade zumunahaze nimyperykynaha.
6 Iwaze Sudeutsa myikaha sapy bo. Nawa zuruze atsikara ziokoknaha nipykze katsa Toroade bo tsimykurunaha. Mytsyhyrytsa wa zuruze tsikurunahaze Toroade bo zukzuk tsikaha. Anaeze mytukytsa tsiksihobykzonaha. Anaeze nawa zuruze mytsyhyrytsa wa estuba ziharamu tsikapykykspyknaha.
7 Nubaze Sudeutsa byrykywy sizubarẽtsa Sesus tuktsa tuk tsikypykyryknaha. Katsaktsa atsikara ty tsitsatsakaknaha iwaze Sesus bo mytsaty tsinakaranaha. Iwaze Pauro nisihyrinymyryky. Miwa botu moparak iwatahi nisihyrinymyryky. Unopokte nisihyrinymyryky yzuzukukwy jobo ipokpedawy niy.
8 Anaeze rikatsa tsizubarẽna. Zipopokoknaha amypubyri niyzik.
9 Mykyryburukta Eutiko inarokota atahi Pauro harere ziwaby. Ihyrizikokwy baze nidyhyky. Iotutsa izumu Pauro nitsasokoze atsoko inaraha. Jo bo ipokpedawy ezektatu inaraha. Iwaze ziwabykynahatsitsa tyk bo inasiknaha. Mykyryburukta bo izumunaha. Botu zumuza iwaze Pauro niwatihi jobo ipokpedawy ikny inasik.
10 Niytahi Pauro ibo zumu. Ibaze taekaratsa humo puruk puruk niy ziharapyrykik iwaze Sesus tuktsa pe niy: — Ahasukatsihikbyihu ja mynahyrizikpo — niy.
11 Kyze Pauro jobo ipokpedawy bo nidozo. Atsikara zitsatsakaknaha iwa hawa Sesus mysapyzeky nihyrikosokda mytsaty tsikykaranaha. Tsiokoknahaze Sesus mysapyzeky nihyrikosokda mytsaty tsikykaranaha. Pauro nisihyrinymyry nakyokzoze iwaze niparak.
12 Niytahi mykyryburukta tawahoro bo ziksizo. Sizubarẽtsa ihumo sakurẽtsa nikaranaha.
13 Pauro mype niy: — Aba uta mokuru. Asos bo harataba mokuru. Anaeze ikiahatsa tsikperynaha. Ikiahatsaktsa tsaraha puẽtsikbyita eze tsimykurunaha — niy. Yhỹ tsimykaranaha. Iharaze tsikukurunaha. Tsaraha puẽtsikbyita eze kokokorohyk tsikaha. Asos bo tsikukurunaha.
14 Anaeze Pauro mytuk usta tsaraha puẽtsikbyita kokokorohyk tsikaha. Myzubarẽtsa Miterene bo tsikukurunaha.
15 Estuba tsikurunahaze tsikzikdihi bo bybybyu tsikaha. Tsikzikdihi Kois inarokoha. Estuba tsikurunahazoze usta tsikzikdihi bo bybybyu tsikaha. Samo inarokoha. Estuba tsikuruzonahaze Miretus myskeporokwy bo tsikumunaha.
16 Epeso batu kozore, Pauro Asia eze batu hỹbyri nikara. Aidy Serusarẽhe bo pomo tsihikik. Tapara Pẽtekoste myikaha Serusarẽhe bo pomo tsihikik.
17 Pauro Miretus eze tuze mektatu zipeha. Ipe niy: — Epeso bokta! Sispirikpohotsa Sesus tuktsa pe tsimy. “Pany Pauro bo tsinakozorenahaktsa! Miretus bo tsimahaktsa!” tsimy — niy. Yhỹ niy. Miretus Epeso harape pauk baze tu niy.
18 Sispirikpohonahatsa Sesus tuktsa zumunahaze Pauro ispe niy: — O katukytsa, tapara ikiahatsa tuk ikapykyrykspyk. Hawa ikykara naha humo ahahyrinymyrẽtsa. Mypehatsa tsyhyryze ihyriziktsokzawy humo ikykaraze hawa kasopyk humo ahahyrinymyrẽtsa.
19 Ikiahatsa baze batu katyso “Utakta myhyrizikwy puhuk byitatu”. Kytsa simysapybyritsa tu nikaranaha ana humo kasukatsihikrẽta. Simysapybyitsa nikaranaha ana bo iktsa ikyze batu kaku. Sudeutsa zikbeze tsihikiknaha iwatahi sinini ikykara. Deus harere wasania ty zuba ikpamykysoikik.
20 Amy ty wasani ahabo ikpamykysoko. Ahauzuzukukwy eze ikpamykysoko, ahawahoro eze kino niwatihi ikpamykysoko, Sesus soho sizubarẽtsa bo ikpamykysoko.
21 Sudeutsa, Sudeutsabyitsa bo kino niwatihi ikpamykysoko. “Ahamysapybyri tsimoewyhiknahaktsa! Deus bo tynapamykysonahaktsa kytsa! Sesus harere bo zuba yhỹ tsimykaranaha ihumo tyspirikponahaktsa kytsa iky.” Iwa zahahyrinymyryky. Iwa humo hi ahaspirikporẽtsa tsimoziknaha.
22 Abaka Serusarẽhe bo mokuru. Deus hyrikoso humo piksi. Atahi zikpehaka Serusarẽhe eze tuze hawa ja kape my batu kahyrinymyry.
23 Anaeze sinini mykara ana humo hi kahyrinymyrẽta. Sakyriukrẽnikitsa hurukwy bo pikoroknaha. Pikpawaranaha. Sihudikhudikwytsa bo iknakozoreze Deus hyrikoso ana humo hi kabo nitsasoko. Iwa Deus hyrikoso kabo nitsasoko. Batu kapyby.
24 Pomoza zeka mahani my. Kahyriziktsokzawy pepykbaka. Ana hi mozihikik. Kahyriziktsokzawy Sesus kabo nyny niy. Anahi pepyk tsihikik hỹ. Sesus kape niy: “Kytsa bokta! Ispe tsimy: ‘Ahamysapybyri tsimoewyhiknahaktsa! Iwaze Deus pahaokzohik Deus harere bo zuba yhỹ tsimykaranahaze Deus ahamysapybyri pahaokzohik’ tsimy” niy. Iwa kape niy. Iwaha hi kahyriziktsokzawy pepyk tsihikik.
25 Tapara ikiahatsa bo hawa Deus tyryktsa tsimoziknaha nitsasoko anatyhi nipamykysoko. Kyzeka ikiahatsa ba ziknyzonaha.
26 Wasani mykara. Aty ahatuk Deus harere bo habyi zeka atahi batu hỹ my.
27 Hawa Sesus humo ahaspirikporẽtsa tsimoziknaha anasoho iktsasoko. Tsizubarẽna ty zuba ikpamykysoko. Deus kape nikara anahi ikpamykysobaik.
28 Pykyhytutaha tsisapybakanaha ja! Sesus tuktsa humo ahamypokzitsiukuktsa niy. Deus hyrikoso zahawatawy. Iwatahi Sesus tuktsa tahapokzitsikinaha. Asahi Sesus tuktsa niaha. Sesus sisapyzeky nihyrikosokda iwatsahi Sesus tuktsa niyziknaha.
29 Myparakze simysapybyikitsa ahabo mozumukunaha. Simyspihikbatanikitsa. Ahape mybarapetu mykaranaha. Sesus harere bo batu hỹ niaha, ihumo batu sispirikpo. Iwatsahi mybarapetu mykaranaha. Parinitsa hyritywatsa hozipyrykzatsa mysiboronaha wa. Hawa parini hozipyrykza piboro nawa kytsa Sesus humo batu yhỹ niaha iwatsahi ikiahatsa humo kino pahakse tsihikiknaha. Barapetu mykaranaha iwa pahamyi tsihikiknaha.
30 Ikiahatsa tuk mybarapetu tsimykaranaha. Iwaze ustsa Sesus tuktsa metutu anaeze mykaranaha.
31 Iwatsahi pykyhytutaha. Tysiperyziukunahaktsa. Harakykbyihi niytyk tseheze zahahyrinymyryky, okoroze unata kino niwatihi Deus wasania ty ikpamykysoikik. Sinini ikykara. Iwa mytsatyziu tsimaha.
32 Deus ahahumo tsimypokzitsiukrẽta. Deus harere bo hyỹ tsimykaranaha, batu ahapyby. Deus harere bo hyỹ tsimykaranaha zeka Sesus humo tsimyspirikpotohinaha. Deus kytsa sizubarẽtsa ityryktsa moziknaha tsipinymyrykynaha. Isapy ha ty zuba tsipiaksekenaha. Ikiahatsa niwatihi situk tsimyharapekypykyknaha.
33 Utakta ahatukze batu ahanamy tyhyryk. Ahanamy parata ouro ahaty batu hyryk. Ahasuk ty batu hyryk.
34 Kahyriziktsokzaha ty zuba ikykara. Iwaha hi mynamy inynyhik ikykara. Niwatihi zahawatawy hawa ty sinamybyikitsa bo tysitsumuẽhĩnaha.
35 Hawa ahatsumuẽhĩkĩ iwa ahahyrinymyryky. Tapara mypehatsa tihi: “Kytsa mybo nyny maha zeka wasani my. Katsa hi ustsa kytsa bo nyny tsimaha zeka mykurẽtsa babatsa tsimoziknaha” niy. Tubabatu Sesus nitsasoko. Iharere bo mytsaty tynakaranaha — niy. Iwa Pauro sispirikpohotsa bo Epeso ezektsa nipamykysoko.
36 Iharere nipykbaze taekaratsa humo puruk puruk niy. Deus bo nipamykysoko.
37 Iwaze sizubarẽtsa nipuziukunaha. Pauro niparakze ipokzi nipuziukunaha. Ity ziharapyryknahaze sisukatsihikrẽtsa nikaranaha. Pauro ispe niyze: — Ba ziknyzonaha — niy iwatsahi sisukatsihikrẽtsa niyziknaha. Niahatsahi ituk tsaraha puẽtsikbyita bo nikurunaha.