Hebrews 1 in Piratapuyo

1 Panopʉ Cohãcjʉ̃ ijiahye. Tiquiro peye tahari mari acayere panopʉ cjẽnare tiquiro yere yahuahye. Apequinare tiquiro bajuaro yahuahye. Apequinare quehẽnopʉ yahuahye. Apequinare tiquiro piti caro yahuahye. Tiquiro yere yahu mʉhtariquinare yahu dutiro, sa yahuahye tiquiro mari acayere.

2 Yojopʉre pihtiri deco panogã ijiye decorire tiquiro macʉnore tiquiro yere yahu dutigʉ̃ tiquiro pehe marine yahue tiri. Tiquiro Pacʉro ye dutiro mehna ahri yehpare, ʉhmʉse gʉ̃hʉre yeriquiro ijire. Tiquiro Pacʉro pehe pihtiri deco ijigʉ̃ ijipihtiyere cʉoatiquirore cũahye tiquiro macʉnore.

3 Sa yero tiquiro macʉno pehe tiquiro Pacʉro ye asi siteyere cʉoriquiro ijiro, tiquiro tutuayere marine ihñore. Sa yero ihcãno saha tiquiro Pacʉro yero sahata ijiro, tiquiro Pacʉro ijiye tiyere marine ihñore tiquiro macʉno. Sa yero tiquiro macʉno tiquiro tutuaye mehna dutigʉ̃ ahri yehpa, ʉhmʉse gʉ̃hʉ sa ijiducure. Sa yero mari ñano yerire tiquiro coseri bato ʉhmʉsepʉ tiquiro Pacʉro tutua yʉhdʉariquiro poto pehe dujiahye, pʉhtoro tiquiro ijiyere ihñono.

4 Tiquiro “Cohãcjʉ̃ macʉno”, wame tire. Ti wamene Cohãcjʉ̃ cũahye tiquirore. Sa wame tiro apequina pʉhtoro ijire. Sa yero tiquiro angele yʉhdʉoro ijire.

5 Tiquiro yequina angele pehere Cohãcjʉ̃ ne ohõ saha ni yahuera tiahye: Yʉhʉ macʉ ijire mʉhʉ. Miare mʉhʉre bajuagʉ̃ yei, niahye Cohãcjʉ̃ tiquiro macʉnore. Angele pehere ne sa ni yahuera tiahye. Sa yero tiquinare ahri gʉ̃hʉre ne yahuera tiahye: Tiquiro Pacʉro ijiitja yʉhʉ. Sa yero tiquiro yʉhʉ macʉ ijirota, niahye Cohãcjʉ̃ tiquiro macʉnore. Angele pehere ne sa ni yahuera tiahye. Sa yero tiquiro macʉno tiquina yʉhdʉoro ijire.

6 Sa yero ape taha tiquiro macʉnore coã masa bajuariquirore ahri yehpapʉ cũno ohõ saha niahye Cohãcjʉ̃ tiquirore: Ijipihtiyequina yeequina angele dʉsepe curi mehna quehe sa, ño peoeta tiquina yʉhʉ macʉre, niahye tiquiro.

7 Sa yero tiquiro yequina angele pehere yahuro taro ohõ saha niahye tiquiro: Yeequina angelere wihnono yero saha pagʉ tigʉ̃ yeaja yʉhʉ. Tiquina yʉhʉ cahacjẽna ijire. Sa yegʉ tiquinare peca pohna yero saha pagʉ tigʉ̃ yeaja yʉhʉ, ni yahuahye Cohãcjʉ̃.

8 Tiquinare sa nieperota tiquiro macʉno pehere ohõ saha niahye: Mʉhʉ Cohãcjʉ̃ ijipihtiyequina pʉhto sa ijiducugʉta. Queoro dutigʉta mʉhʉ, mʉhʉ yequinare.

9 Ni mehono marieno yeyere, quehnoano yeyere tutuaro cahmene mʉhʉ. Sa yegʉ ñañe yeyere ihña yabire mʉhʉ. Mʉhʉ sa ijigʉ̃ ihñagʉ yʉhʉ mʉhʉ Pacʉ ijipihtiyequina apequina yʉhdʉoro mʉhʉre bucuegʉ̃ yei, niahye Cohãcjʉ̃ mari Pacʉ.

10 Ahri gʉ̃hʉre niahye tiquiro, tiquiro macʉnore “Pʉhto” ni pisuro: Pʉhto, coã waropʉre ahri yehpare, ʉhmʉse gʉ̃hʉre bajumehnedi mʉhʉ.

11 Ti ijipihtiye camesa pihtia waharota. Mʉhʉ pehe ne camesasi. Sa ijiducugʉta mʉhʉ. Ti ijipihtiye suhtiro ahba bora dijiaro saha pihtia waharota.

12 Ti ijipihtiye ʉhmʉsere, ahri yehpa gʉ̃hʉre camesagʉ̃ yeita mʉhʉ. Mʉnano suhtirore mʉhʉ cohãboro saha ti ijipihtiyere camesagʉ̃ yeita mʉhʉ. Sa yero suhtiro ahba bora dijiaro saha ti ijipihtiye camesarota. Mʉhʉ pehe ne camesasi. Sa ijiducugʉta mʉhʉ, niahye Cohãcjʉ̃ tiquiro macʉnore.

13 Ne angele pehere ahrire yahuera tiahye mari Pacʉ: Yʉhʉ poto pehe dujiya mʉhʉ. Pʉhto ijire mʉhʉ. Sa yegʉ mʉhʉre ihña tuhtiyequinare yʉhdʉdʉca basagʉtja. Sa yegʉ tiquina pʉhto ijigʉta mʉhʉ, niahye Cohãcjʉ̃ tiquiro macʉnore.

14 Ijipihtiyequina angele pehe Cohãcjʉ̃ cahacjẽna ijire. Sa yero mari Pacʉ ohore tiquiro yequina angelere Cristo yʉhdʉoatiquinare yedoho dutiro.