Revelation 19 in Marathi

1 ह्या गोष्टींनंतर मी जणू एक, विशाल समुदायाची मोठी वाणी स्वर्गात ऐकली; ती म्हणाली, ‘हालेलूया! तारण, गौरव आणि सामर्थ्य आमच्या देवाची आहेत,

2 कारण त्याचे न्याय खरे आणि नीतीचे आहेत; कारण ज्या महावेश्येने आपल्या व्यभिचारी वागण्याने पृथ्वी भ्रष्ट केली तिचा त्याने न्यायनिवाडा केला आहे. आणि आपल्या दासांच्या रक्ताबद्दल तिचा सूड घेतला आहे. ’

3 आणि ते दुसऱ्यांदा म्हणाले, ‘हालेलूया! तिचा धूर युगानुयुग वर चढत आहे. ’

4 तेव्हा ते चोवीस वडील व चार जिवंत प्राणी पालथे पडले, त्यांनी राजासनावर बसलेल्या देवाला नमन केले आणि ते म्हणाले, ‘आमेन, हालेलूया. !’

5 आणि राजासनाकडून एक वाणी आली; ती म्हणाली, ‘तुम्ही सर्व त्याचे दास, दोन्ही लहानमोठे आणि सामर्थ्यवान त्याला भीणारे, आपल्या देवाची स्तुती करा. ’

6 आणि, मी जणू एका, विशाल समुदायाची वाणी ऐकली; ती वाणी महापूराच्या आणि मेघांच्या मोठ्या गडगडाटांच्या आवाजासारखी होती. ती म्हणाली, ‘हालेलूया! कारण, आमचा प्रभू सर्वसत्ताधारी देव हा राज्य करीत आहे.

7 या, आपण आनंद करू, हर्ष करू, आणि त्याला गौरव देऊ; कारण कोकर्‍याचे लग्न निघाले आहे, आणि त्याच्या नवरीने स्वतःला सजविले आहे.

8 आणि तिला नेसायला, स्वच्छ, शुभ्र, चमकणारे तलम तागाचे वस्त्र दिले आहे. ’ (हे तलम वस्त्र म्हणजे पवित्र जनांच्या नीतिमत्वाची कामे होत. )

9 आणि तो देवदूत मला म्हणाला, “लिहीः ‘कोकर्‍याच्या लग्नाच्या भोजनाला बोलावलेले धन्य होत. ’” आणि तो मला म्हणाला, “ही देवाची खरी वचने आहेत. ”

10 आणि, मी त्याला नमन करायला त्याच्या पायाशी पालथा पडलो, परंतु तो मला म्हणाला, “असे करू नको; मी तुझ्या सोबतीचा, आणि येशूची साक्ष ज्यांच्याजवळ आहे त्या तुझ्या बंधूंच्या सोबतीचा दास आहे. देवाला नमन कर. कारण येशूविषयीची साक्ष हा भविष्यवादाचा आत्मा आहे. ”

11 तेव्हा मी बघितले की, स्वर्ग उघडला, आणि पाहा, एक पांढरा घोडा, आणि त्यावर जो बसला होता त्याचे नाव ’विश्वासू आणि खरा’ आहे. तो नीतीने न्याय करतो, आणि युध्द करतो.

12 त्याचे डोळे अग्नीच्या ज्वालेसारखे होते व त्याच्या डोक्यावर पुष्कळ मुगुट होते. आणि त्याचे एक नाव लिहिलेले होते. ते त्याच्याशिवाय कोणी जाणत नाही.

13 त्याने एक, रक्तात भिजवीलेला झगा घातला होता, आणि ’देवाचा शब्द’हे नाव त्याला देण्यात आले आहे.

14 आणि स्वर्गातल्या सेना पांढर्‍या घोड्यांवर बसून शुभ्र, स्वच्छ, तलम तागाची वस्त्रे परिधान करून त्याच्या मागोमाग जात होत्या.

15 आणि त्याने राष्ट्रांवर प्रहार करावा म्हणून त्याच्या तोंडामधून एक धारदार तरवार निघते. तो त्यांच्यावर लोहदंडाने सत्ता चालवील. तो सर्वसमर्थ देवाच्या अतीकोपाचे द्राक्षकुंड तुडवील.

16 त्याच्या झग्यावर व त्याच्या मांडीवर ‘राजांचा राजा आणि प्रभूंचा प्रभू’ असे नाव लिहिलेले आहे.

17 आणि मी बघितले की, एक देवदूत सूर्यात उभा होता; तो आकाशात उडणार्‍या सर्व पक्ष्यांना मोठ्या आवाजात ओरडून म्हणाला, ‘या, आणि देवाच्या मोठ्या भोजनासाठी जमा व्हा.

18 म्हणजे तुम्ही राजांचे, सेनापतीचे मांस खाल, आणि बलवान पुरुषांचे मास खाल; घोड्यांचे आणि त्यावर बसणार्‍यांचे मास खाल, स्वतंत्र आणि दास, लहान आणि मोठे अशा सर्वांचे मास खाल. ’

19 आणि मी बघितले की, तो जो घोड्यावर बसला होता त्याच्याबरोबर आणि त्याच्या सेनेबरोबर लढाई करायला तो पशू व पृथ्वीचे राजे आणि त्यांच्या सेना एकत्र आल्या होत्या.

20 मग त्या पशूला व त्याच्याबरोबर त्या खोट्या संदेष्ट्याला धरण्यात आले. त्याने त्याच्यासमोर चिन्हे करून, त्या पशूने शिक्का घेणार्‍यांस व त्याच्या मूर्तीला नमन करणार्‍यांस फसवले होते. ह्या दोघांनाही गंधकाने जळणार्‍या अग्नीच्या सरोवरात जिवंत टाकण्यात आले.

21 बाकीचे लोक जो घोड्यावर बसला होता त्याच्या तोंडातून बाहेर येणार्‍या तरवारीने मारले गेले. आणि त्यांच्या मांसाने सगळे पक्षी तृप्त झाले.