Mark 6 in Marathi

1 नंतर तो तेथून आपल्या गावी आला, आणि त्याचे शिष्य त्याच्यामागे आले.

2 शब्बाथ दिवशी तो सभास्थानात शिकवीत होता. पुष्कळ लोकांनी त्याची शिकवण ऐकली तेव्हा ते थक्क झाले. ते म्हणाले, “या माणसाला ही शिकवण कोठून मिळाली?'' ''त्याला देवाने कोणते ज्ञान दिले आहे आणि ह्याच्या हातून हे केवढे चमत्कार होतात?''

3 जो सुतार, मरीयेचा मुलगा आणि याकोब, योसे, यहूदा व शिमोन ह्यांचा जो भाऊ तोच हा आहे ना? आणि या आपल्याबरोबर आहेत त्या याच्या बहिणी नव्हेत काय?” त्याचा स्वीकार करण्याविषयी त्यांना प्रश्न पडला.

4 मग येशू त्यांना म्हणाला, “संदेष्ट्यांचा त्याच्या गावात, शहरात, त्याच्या नातेवाईकात आणि त्याच्या कुटुंबात त्याचा सन्मान होत नसतो.”

5 थोड्याशाच रोग्यांवर हात ठेवून त्याने त्यास बरे केले, ह्याशिवाय दुसरे कोणतेही महत्कृत्य त्याला तेथे करता आले नाही.

6 त्यांच्या अविश्वासामुळे त्याला आश्चर्य वाटले. नंतर येशू शिक्षण देत जवळपासच्या गावोगावी फिरला.

7 त्याने बारा शिष्यांना आपणाकडे बोलावून घेतले व त्यांना जोडीजोडीने पाठवू लागला, त्याने त्यास अशुध्द आत्म्यावरचा अधिकार दिला.

8 आणि त्यास आज्ञा केली की , “काठीशिवाय प्रवासासाठी दुसरे काही घेऊ नका. भाकरी, झोळणा, किंवा कमरकशात पैसे काही घेऊ नका.

9 तरी वहाणा घालून चाला, दोन अंगरखे घालू नका.''

10 आणखी तो त्यास म्हणाला, ज्या कुठल्याही घरात तुम्ही जाल तेथे तुम्ही ते शहर सोडीपर्यंत राहा.

11 आणि ज्या ठिकाणी तुमचे स्वागत होणार नाही किंवा तुमचे ऐकणार नाहीत तेथून निघताना, त्यांना साक्ष व्हावी म्हणून आपल्या तळ पायाची धूळ तेथेच झाडून टाका.”

12 मग शिष्य तेथून निघाले आणि लोकांनी पश्चात्ताप करावा म्हणून त्यांनी घोषणा केली.

13 त्यांनी पुष्कळ भुते काढली, आणि अनेक रोग्यांना तैलाभ्यंग करून त्यांना बरे केले.

14 हेरोद राजाने येशूविषयी ऐकले कारण येशूचे नाव सगळीकडे गाजले होते. काही लोक म्हणत होते, “बाप्तिस्मा करणारा योहान मेलेल्यातून उठला आहे, म्हणून त्याच्याठायी चमत्कार करण्याचे सामर्थ्य आहे.”

15 इतर लोक म्हणत, “येशू एलीया आहे.” तर काही जण म्हणत, “हा संदेष्टा फार पूर्वीच्या संदेष्ट्यापैकी एक आहे.”

16 परंतु हेरोदाने जेव्हा ऐकले तेव्हा तो म्हणाला, “ज्या योहानाचा मी शिरच्छेद केला तोच उठला आहे.”

17 हेरोदाने स्वतः योहानाला पकडून तुरूंगात टाकण्याची आज्ञा दिली होती. कारण त्याचा भाऊ फिलिप्प याची पत्नी हेरोदीया हिच्याबरोबर हेरोदाने लग्न केले होते.

18 व योहान हेरोदाला सांगत असे की, “तू आपल्या भावाची पत्नी ठेवावीस हे शास्त्रानुसार नाही.”

19 याकरता हेरोदीयाने योहानाविरूध्द मनात अढी धरली. ती त्याला ठार मारण्याची संधी पाहात होती. परंतु ती त्याला मारू शकली नाही,

20 कारण योहान नीतिमान आणि पवित्र मनुष्य आहे हे जाणून हेरोद त्याचे भय धरीत असे व त्याचे संरक्षण करी. हेरोद योहानाचे बोलणे ऐके तेव्हा, फार गोंधळून जाई, तरी त्याचे म्हणणे आनंदाने ऐकून घेत असे.

21 मग एके दिवशी संधी आली की हेरोदिया काहीतरी करू शकेल. आपल्या वाढदिवशी हेरोदाने आपले महत्त्वाचे अधिकारी, सैन्यातील सरदार व गालीलातील प्रमुख लोकांना मेजवानी दिली.

22 हेरोदीयाच्या मुलीने स्वतः आत जाऊन नाच करून हेरोद व आलेल्या पाहुण्यांना आनंदित केले. तेव्हा हेरोद राजा मुलीला म्हणाला, “तुला जे पाहिजे ते माग म्हणजे मी ते तुला देईन.”

23 तो शपथ वाहून तिला म्हणाला, “माझ्या अर्ध्या राज्यापर्यंत जे काही तू मागशील ते मी तुला देईन.”

24 ती बाहेर गेली आणि तिच्या आईला म्हणाली, “मी काय मागू?” आई म्हणाली, “बाप्तिस्मा करणाऱ्या योहानाचे शीर.”

25 आणि ती मुलगी लगेच आत राजाकडे गेली आणि म्हणाली, “मला तुम्ही या क्षणी बाप्तिस्मा करणाऱ्या योहानाचे शीर तबकात घालून द्यावे अशी माझी इच्छा आहे.”

26 राजाला फार वाईट वाटले, परंतु त्याच्या शपथेमुळे व भोजनास आलेल्या पाहुण्यांमुळे त्याला तिला नकार द्यावा असे वाटले नाही.

27 तेव्हा राजाने लगेच वध करणाऱ्याला पाठवले व योहानाचे शीर घेऊन येण्याची आज्ञा केली. मग तो गेला व तुरूंगात जाऊन त्याने योहानाचे शीर कापले.

28 ते शीर तबकात घालून मुलीला दिले व मुलीने ते आईला दिले.

29 हे ऐकल्यावर, योहानाचे शिष्य आले आणि त्यांनी त्याचे शरीर उचलले आणि कबरेत नेऊन ठेवले.

30 ह्यानंतर प्रेषित येशूभोवती जमले, आणि त्यांनी जे केले आणि शिकविले ते सर्व त्याला सांगितले.

31 नंतर तो त्यांना म्हणाला, “तुम्ही रानांत एकांती चला आणि थोडा विसावा घ्या.'' कारण तेथे पुष्कळ लोक जात येत होते व त्यांना जेवायलाही सवड मिळत नव्हती.

32 तेव्हा ते सर्वजण नावेत बसून रानात गेले.

33 परंतु पुष्कळ लोकांनी त्यांना जाताना पाहिले व ते कोण आहेत हे त्यांना कळाले तेव्हा सर्व गावांतील लोक पायीच धावत निघाले व येशू तेथे येण्याअगोदरच ते तेथे पोहोचले.

34 येशू नावेतून उतरला तेव्हा, त्याने मोठा लोकसमुदाय पाहिला; त्याला त्यांचा कळवळा आला, कारण ते मेंढपाळ नसलेल्या मेंढरांसारखे होते. मग तो त्यांना बऱ्याच गोष्टीविषयी शिक्षण देऊ लागला.

35 दिवस बराच उतरल्यावर त्याचे शिष्य त्याच्याकडे येऊन म्हणाले, “ही अरण्यातली जागा आहे व आता दिवस फार उतरला आहे.

36 लोकांना जाऊ द्या म्हणजे ते भोवतालच्या शेतात व खेड्यात जाऊन त्यांच्यासाठी काहीतरी खायला विकत आणतील.”

37 परंतु त्याने त्यास उत्तर दिले, “तुम्हीच त्यांना काहीतरी खावयास द्या.” ते त्याला म्हणाले, “आम्ही जाऊन त्यांना खाण्यासाठी दोनशे रूपयाच्या भाकरी विकत आणाव्या काय?”

38 तो त्यांना म्हणाला, “जा आणि पाहा की तुमच्याजवळ किती भाकरी आहेत?” पाहिल्यावर ते म्हणाले, “आमच्याजवळ पाच भाकरी आणि दोन मासे आहेत.”

39 येशूने सर्व लोकांना आज्ञा केली की गटागटाने हिरवळीवर बसावे.”

40 तेव्हा सर्व लोक गटागटाने बसले; प्रत्येक गटात पन्नास ते शंभर लोक असे.

41 येशूने पाच भाकरी आणि दोन मासे घेउन वर स्वर्गाकडे पाहून, आशीर्वाद दिला आणि भाकरी मोडल्या व त्या लोकांना वाढण्यासाठी आपल्या शिष्यांजवळ दिल्या आणि दोन मासेसुध्दा वाटून दिले.

42 मग ते सर्व जेवून तृप्त झाले.

43 आणि त्यांनी उरलेल्या तुकड्यांच्या बारा टोपल्या भरून घेतल्या आणि माशांचेही तुकडे नेले.

44 भाकरी खाणारे पाच हजार पुरूष होते.

45 नंतर मी लोकसमुदायाला निरोप देतो आणि तुम्ही नावेत बसून पलीकडे बेथसैदा येथे जा, असे सांगून त्याने लगेचच शिष्यांना त्याच्यापुढे जाण्यास सांगितले.

46 लोकांना निरोप देऊन तो प्रार्थना करण्यास डोंगरावर गेला.

47 संध्याकाळ झाली तेव्हा नाव सरोवराच्या मध्यभागी होती आणि येशू एकटाच जमिनीवर होता.

48 मग त्यांना वल्ही मारणे अवघड जात आहे असे त्याला दिसले, कारण वारा त्यांच्या विरुध्दचा होता. नंतर पहाटे bतीन ते सहाच्या दरम्यान येशू समुद्रावरून चालत त्यांच्याकडे आला, त्यांच्याजवळून पुढे जाण्याचा त्याचा बेत होता.

49 पण त्याला सरोवरातील पाण्यावरून चालताना पाहिले, तेव्हा त्यांना ते भूत आहे असे वाटले व ते ओरडले,

50 कारण त्या सर्वांनी त्याला पाहिले व ते घाबरून गेले. तो लगेच त्यांना म्हणाला, “धीर धरा, भिऊ नका, मी आहे.”

51 नंतर तो त्यांच्याकडे नावेत गेला तेव्हा वारा शांत झाला. ते अतिशय आश्चर्यचकित झाले.

52 कारण त्यांना भाकरीच्या संदर्भातील चमत्कार समजलाच नव्हता, आणि त्यांची मने कठीण झाली होती.

53 त्यांनी सरोवर ओलांडल्यावर ते गनेसरेताच्या किनाऱ्याला आले व नाव बांधून टाकली.

54 ते नावेतून उतरताच लोकांनी येशूला ओळखले.

55 आणि ते आसपासच्या सर्व भागात चोहोकडे धावपळ करीत फिरले व जेथे कोठे तो आहे म्हणून त्यांच्या कानी आले, तेथे तेथे लोक दुखणेकऱ्यांना बाजेवर घालून नेऊ लागले.

56 तो गावात किंवा शेतमळ्यात कोठेही जावो, तेथे लोक दुखणेकऱ्यांना भर बाजारात आणून ठेवत आणि आपल्या वस्त्राच्या गोंड्याला तरी स्पर्श करू द्या अशी त्याला विनंती करीत, आणि जितके त्याला स्पर्श करीत तितके बरे होत.