John 8 in Marathi

1 पण येशू जैतूनाच्या डोंगराकडे गेला,

2 नंतर पहाटेस तो पुन्हा मंदिरात आला, तेव्हा सर्व लोक त्याच्याकडे आले आणि तो बसून त्यांना शिकवू लागला.

3 तेव्हा व्यभिचार करत असताना धरलेल्या एका स्त्रीला नियमशास्र शिक्षक व परूशी ह्यांनी त्याच्याकडे आणले व तिला मध्यभागी उभे करून ते त्याला म्हणाले.,

4 “गुरूजी, ही स्त्री व्यभिचार करीत असताना धरण्यात आली.

5 मोशेने नियमशास्त्रात आम्हाला अशी आज्ञा दिली आहे की, अशांना दगड मार करावा, तर आपण हिच्याविषयी काय म्हणता?

6 त्याला दोष लावायला आपणास काहीतरी मिळावे म्हणून त्याची परीक्षा पाहण्याकरता ते असे म्हणाले. पण येशू खाली आेणवून आपल्या बोटाने जमिनीवर लिहू लागला.

7 आणि ते त्याला एकसारखे विचारत असता तो उठून त्यांना म्हणाला,“तुमच्यात जो कोणी निष्पाप असेल त्याने प्रथम तिच्यावर एक दगड टाकावा.”

8 मग तो पुन्हा खाली ओणवून जमिनीवर लिहू लागला.

9 हे शब्द ऐकून वृध्दातल्या वृध्दापासून तो थेट शेवटल्या माणसापर्यंत ते सर्व एकामागून एक निघून गेले, येशू एकटा राहिला आणि ती स्त्री मध्यभागी उभी होती.

10 नंतर येशू उठला व त्या स्त्रीशिवाय तेथे कोणीही नाही असे पाहून तिला म्हणाला, “बाई, तुला दोष देणारे कोठे आहेत? तुला कोणी दंड ठरवला नाही काय?”

11 ती म्हणाली, “ प्रभूजी, कोणी नाही.” तेव्हा येशू तिला म्हणाला, “मी पण तुला दोषी ठरवीत नाही; जा, ह्यापुढे पाप करू नको.”

12 पुढे येशू पुन्हा त्यांना म्हणाला, “मीच जगाचा प्रकाश आहे; जो मला अनुसरतो तो अंधारात चालणारच नाही, तर त्याच्याजवळ जीवनाचा प्रकाश राहील.”

13 ह्यावरून परूशी त्याला म्हणाले, “तुम्ही स्वतःविषयी साक्ष देता, तुमची साक्ष खरी नाही.”

14 येशूने त्यांना उत्तर देऊन म्हटले, “मी स्वतःविषयी साक्ष दिली तरी माझी साक्ष खरी आहे, कारण मी कोठून आलो आणि कोठे जाणार हे मला माहीत आहे; पण मी कोठून आलो आणि कोठे जाणार हे तुम्हाला माहीत नाही.

15 तुम्ही देहानुसार न्याय करता; मी कुणाचा न्याय करीत नाही.

16 आणि जरी मी कोणाचा न्याय करतो, तरी माझा न्याय खरा आहे. कारण मी एकटा नाही तर मी आहे व ज्याने मला पाठवले तोही आहे.

17 तुमच्या नियमशास्त्रात असे लिहिले आहे की, दोघा मनुष्यांची साक्ष खरी अाहे.

18 मी स्वतःविषयी साक्ष देणारा आहे, आणि ज्या पित्याने मला पाठवले आहे तोही माझ्याविषयी साक्ष देतो.”

19 ह्यावरून ते त्याला म्हणाले, “तुमचा पिता कोठे आहे?” येशूने उत्तर दिले, “तुम्ही मला किंवा माझ्या पित्यालाही ओळखीत नाही. तुम्ही मला ओळखले असते तर माझ्या पित्यालाही ओळखले असते.”

20 तो मंदिरात शिकवीत असता ही वचने जामदारखान्यात बोलला; पण कोणीही त्याच्यावर हात टाकले नाहीत, कारण त्याची वेळ अजून आलेली नव्हती.

21 पुन्हा तो त्यांना म्हणाला, “मी निघून जातो आणि तुम्ही माझा शोध कराल व तुम्ही आपल्या पापात मराल, मी जेथे जातो तिकडे तुम्ही येऊ शकत नाही.”

22 ह्यावर यहूदी म्हणाले, “हा आत्महत्या करणार काय? कारण हा म्हणतो की, ‘मी जाईन तिथे तुम्हाला येता येणार नाही’.”

23 तो त्यांना म्हणाला, “तुम्ही खालचे आहा, मी वरचा आहे; तुम्ही ह्या जगाचे आहा, मी ह्या जगाचा नाही.

24 मी म्हणून तुम्हाला सांगितले की, तुम्ही तुमच्या पापात मराल; कारण, मी तो आहे असा तुम्ही विश्वास न धरल्यास तुम्ही आपल्या पापात मराल.”

25 ह्यावरून ते त्याला म्हणाले, “तू कोण आहेस?” येशू त्यांना म्हणाला, “पहिल्यापासून तुम्हाला जे सांगत आलो तेच नाही का?

26 मला तुमच्याविषयी पुष्कळ बोलायचे आहे व न्यायनिवाडा करायचा आहे, पण ज्याने मला पाठवले तो खरा आहे आणि ज्या गोष्टी मी त्याच्या कडून एेकल्या त्या मी जगाला सांगतो.‘

27 तो त्यांच्याशी पित्याविषयी बोलत होता हे त्यांना कळले नाही.

28 तेव्हा येशू त्यांना म्हणाला, “तुम्ही जेव्हा मनुष्याच्या पुत्राला उंच कराल तेव्हा तुम्हाला हे कळेल की तो मी आहे आणि मी स्वतः काही करीत नाही तर पित्याने मला सांगितल्याप्रमाणे मी हे करतो.

29 ज्याने मला पाठवले तो माझ्याबरोबर आहे; त्याने मला एेकटे सोडले नाही; कारण मी नेहमी त्याला आवडणार्‍या गोष्टी करतो.”

30 तो हे बोलत असता पुष्कळ जणांनी त्याच्यावर विश्वास ठेवला.

31 ज्या यहूद्यांनी त्याच्यावर विश्वास ठेवला त्यांना येशू म्हणाला, “तुम्ही माझ्या वचनात राहिला तर खरोखर माझे शिष्य आहात.

32 तुम्हाला सत्य समजेल, आणि सत्य तुम्हाला बंधमुक्त करील.”

33 त्यांनी त्याला उत्तर दिले, “आम्ही अब्राहामाचे वंशज आहो आणि कधीही कोणाचे दास झालो नाही. तुम्ही आम्हाला कसे म्हणता की, तुम्ही स्वतंत्र केले जाल?”

34 येशूने त्यांना उत्तर दिले, “मी तुम्हाला खचीत खचीत सांगतो, जो कोणी पाप करतो तो पापाचा दास आहे.

35 दास सर्वकाळ घरात रहात नाही; पुत्र सर्वकाळ घरात राहतो.

36 म्हणून जर पुत्राने तुम्हाला बंधनमुक्त केले तर तुम्ही, खरोखर, बंधनमुक्त व्हाल.

37 मी जाणतो की, तुम्ही अब्राहामाचे वंशज आहा, तरी तुमच्यामध्ये माझ्या वचनाला जागा नाही, म्हणून तुम्ही मला जिवे मारायला पाहता.

38 मी पित्याजवळ जे पाहिले ते बोलतो, तसेच तुम्ही आपल्या पित्याकडून जे ऐकले ते करता.”

39 त्यांनी त्याला उत्तर दिले, “अब्राहाम आमचा पिता आहे.” येशू त्यांना म्हणाला, “तुम्ही अब्राहामाची मुले आहा तर अब्राहामाची कृत्ये कराल.

40 परंतु ज्याने देवापासून एेकलेले सत्य तुम्हाला सांगितले त्या मनुष्याला म्हणजे मला तुम्ही आता ठार मारायला पाहता. अब्राहामाने असे केले नाही.

41 तुम्ही आपल्या पित्याच्या कृत्ये करता.” ते त्याला म्हणाले, “आमचा जन्म व्यभिचारापासून झाला नाही. आम्हाला एकच पिता म्हणजे देव आहे.”

42 येशूने त्यांना म्हटले, “देव जर तुमचा पिता असता तर तुम्ही माझ्यावर प्रीती केली असती; कारण मी देवापासून निघालो व आलो, मी स्वतः होऊन आलो नाही, पण त्याने मला पाठवले.

43 तुम्ही माझे बोलणे का समजून घेत नाही? ह्याचे हेच की, तुम्हाला माझे वचन ऐकवत नाही.

44 तुम्ही आपला बाप सैतान ह्यापासून झाला आहात आणि तुमच्या बापाच्या वासनांप्रमाणं करू इच्छिता. तो प्रारंभापासून मनुष्य घातक होता आणि तो सत्यात टिकला नाही, कारण त्याच्यामध्ये सत्य नाही. तो जेव्हा खोटे बोलतो तेव्हा तो स्वतःचे बोलतो, कारण तो लबाड व लबाडीचा बाप आहे.

45 पण मी तुम्हाला खरे सांगतो म्हणून तुम्ही माझ्यावर विश्वास ठेवत नाही.

46 तुमच्यातला कोण मला पापी ठरवतो ? मी खरे सांगत असता तुम्ही माझ्यावर का विश्वास ठेवत नाही?

47 जो देवापासून आहे तो देवाची वचने ऐकतो. तुम्ही देवापासून नाही म्हणून तुम्ही एेकत नाही.”

48 यहूद्यांनी त्याला उत्तर देऊन म्हटले, “तुम्ही शोमरोनी आहात व तुम्हाला भूत लागले आहे, हे जे आम्ही म्हणतो ते बरोबर आहे की नाही?”

49 येशूने त्यांना उत्तर दिले, “मला भूत लागले नाही; तर मी आपल्या पित्याचा सन्मान करतो आणि तुम्ही माझा अपमान करता.

50 मी स्वतःचे गौरव करू पाहत नाही; ते पाहणारा व न्यायनिवाडा करणारा अाहेच.

51 मी तुम्हाला खचीत खचीत सांगतो, जर कोणी माझे वचने पाळील तर त्याला मरणाचा अनुभव कधीही होणार नाही.”

52 यहूदी त्याला म्हणाले, “आता आम्हाला कळल की, तुम्हाला भूत लागले आहे. अब्राहाम मेला आणि संदेष्टेही मेले; आणि तुम्ही म्हणता की, ‘कोणी माझे वचन पाळील तर तो कधी मरण अनुभवणार नाही’.

53 आमचा पिता अब्राहाम मेला; त्याच्यापेक्षा तुम्ही मोठे आहात काय? आणि संदेष्टेही मेले; तुम्ही स्वतःला काय समजता?”

54 येशूने उत्तर दिले, “मी स्वतःचे गौरव केले तर माझे गौरव काहीच नाही, माझे गौरव करणारा माझा पिता आहे, तो आमचा देव आहे असे तुम्ही त्याच्याविषयी म्हणता.

55 तरी तुम्ही त्याला अोळखले नाही, मी त्याला ओळखतो. आणि मी त्याला आेळखत नाही असे जर मी म्हणेन, तर मी तुमच्यासारखा लबाड ठरेन. पण, मी त्याला ओळखतो, आणि त्याचे वचन पाळतो.

56 माझा दिवस बघायला तुमचा पिता अब्राहाम उल्हासीत झाला; तो त्याने पाहीला व त्याला हर्ष झाला.”

57 यहूदी त्याला म्हणाले, “तुम्हाला अजून पन्नास वर्षे झाली नाहीत आणि तुम्ही अब्राहामाला पाहिले आहे काय?”

58 येशू त्यांना म्हणाला, “मी तुम्हाला खचीत खचीत सांगतो, अब्राहामाचा जन्म झाला त्यापूर्वी मी आहे.”

59 ह्यावरून त्यांनी त्याला मारायला दगड उचलले, पण येशू मंदिरामधून गुप्तपणे निघून गेला.