John 7 in Marathi

1 ह्यानंतर येशू गालीलांत फिरू लागला, कारण यहूदी त्याला ठार मारायला टपले होते. म्हणून त्याला यहूदीयात फिरावेसे वाटले नाही.

2 यहूद्यांचा मंडपांचा सण जवळ आला होता.

3 म्हणून त्याचे भाऊ त्याला म्हणाले, ‘तू इथून नीघ, आणि यहुदीयात जा, म्हणजे तू करतोस ती तुझी कामे तुझ्या शिष्यांनीही पाहावीत.

4 जो कोणी प्रसिध्द होऊ पाहतो तो गुप्तपणे काही करत नाही. तू ह्या गोष्टी करीत असशील तर स्वतः जगाला प्रकट हो.

5 कारण त्याचे भाऊही त्याच्यावर विश्वास ठेवत नव्हते.

6 त्यावरून येशू त्यांना म्हणाला, “माझी वेळ अजून आलेली नाही; तुमची वेळ तर सर्वदा सिध्द आहे.

7 जगाने तुमचा व्देष करवा हे शक्य नाही; पण ते माझा व्देष करते, कारण मी त्याच्याविषयी साक्ष देतो की, त्यांची कामे वाईट आहेत.

8 तुम्ही सणाला वर जा. मी ह्या सणाला आताच वर जात नाही. कारण माझा वेळ अजून पूर्ण झाला नाही.”

9 असे त्यांना सांगून तो गालिलात राहिला.

10 पण त्याचे भाऊ सणाला वर गेल्यानंतर तोही, उघडपणे न जाता गुप्तपणे वर गेला.

11 तेव्हा, यहूदी त्याला सणात शोधीत होते आणि म्हणत होते, “तो आहे तरी कोठे?”

12 आणि लोकांतही त्याच्याविषयी पुष्कळ कुजबुज सुरू झाली. कोणी म्हणत होते, “तो चांगला आहे.‘ दुसरे कोणी म्हणत होते, “नाही, तो लोकांना फसवतो.”

13 तरी यहूद्यांच्या भीतीमुळे कोणीही त्याच्याविषयी उघडपणे बोलत नसे.

14 मग सण अर्धा आटोपल्यावर येशू वर मंदिरात जाऊन शिक्षण देऊ लागला.

15 तेव्हा यहूदी आश्चर्य करून म्हणू लागले, “ शिकल्यावाचून ह्याला विद्या कशी आली?”

16 त्यावरून येशूने त्यांना उत्तर देऊन म्हटले, “माझी शिकवण माझी नाही तर ज्याने मला पाठवल त्याची आहे.

17 जो कोणी त्याच्या इच्छेप्रमाणे करण्याची मनीषा बाळगिल त्याला ही शिकवण देवापासून आहे किंवा मी आपल्या मनचे बोलतो हे समजेल.

18 जो आपल्या मनचे बोलतो, तो स्वतःचेच गौरव करतो, परंतु आपणाला ज्याने पाठवले त्याचे गौरव जो पाहतो तो मनुष्य खरा आहे व त्याच्यामध्ये अनीती नाही.

19 मोशेने तुम्हाला नियमशास्त्र दिले की नाही? तर तुम्ही कोणीही नियमशास्त्र पाळीत नाही. तुम्ही मला ठार मारायला का पाहता?”

20 लोकांनी त्याला उत्तर देऊन म्हटले, “तुला भूत लागले आहे. तुला ठार मारायला कोण पाहतो?”

21 येशूने त्यांना उत्तर देऊन म्हटले, “मी एक कृत्य केले व त्यामुळे तुम्ही सर्व आश्चर्य करता.

22 मोशेने तुम्हाला सुंता लावून दिली (तरी ती मोशेपासून नाही, पण पूर्वजांपासून आहे.) आणि तुम्ही शब्बाथ दिवशी मनुष्याची सुंता करता.

23 मोशेचे नियमशास्त्र मोडू नये म्हणून मनुष्याची सुंता जर शब्बाथ दिवशी होते तर, तर मी शब्बाथ दिवशी एका मनुष्याला अगदी बरे केले ह्यामुळ तुम्ही माझ्यावर रागावता काय?

24 वरवर पाहून न्याय करू नका तर योग्य न्याय करा.”

25 ह्यारून यरुशलेमकरांपैकी कित्येक जण म्हणू लागले , “ज्याला ठार मारायला पाहतात तो हाच ना?

26 पाहा, तो उघडपणे बोलत आहे, आणि ते त्याला काहीच बोलत नाहीत. हाच ख्रिस्त आहे, हे खरोखर अधिकार्‍यांना कळले आहे काय?

27 तरी हा कोठला आहे हे आम्हाला ठाऊक आहे; पण ख्रिस्त येईल तेव्हा तो कोठला आहे हे कोणालाही कळणार नाही.”

28 ह्यावरून येशू मंदिरात शिक्षण देत असता मोठ्याने म्हणाला, “तुम्ही मला ओळखता आणि मी कुठला आहे हे तुम्ही जाणता; तरी पण मी आपण होऊन आलो नाही; ज्याने मला पाठवले तो खरा आहे त्याला तुम्ही ओळखत नाही.

29 मी तर त्याला ओळखतो, कारण मी त्याच्यापासून आहे व त्याने मला पाठवले आहे.”

30 ह्यावरून ते त्याला धरण्यास पाहत होते, तरी कोणी त्याच्यावर हात टाकला नाही, कारण त्याची वेळ अजून आली नव्हती.

31 तेव्हा लोकसमुदायातील पुष्कळांनी त्याच्यावर विश्वास ठेवला व ते म्हणू लागले, “ख्रिस्त येईल तेव्हा ह्यानं केलेल्या चिन्हांपेक्षा तो काही अधिक काय करणार आहे?”

32 लोकसमुदाय त्याच्याविषयी अशी कुजबुज करत आहे हे परूश्यांच्या कानावर गेले, आणि मुख्य याजक व परूश्यांनी त्याला धरण्यास कामदार पाठवले.

33 ह्यावरून येशू त्यांना म्हणाला, “मी आणखी थोडावेळ तुमच्याबरोबर आहे मग ज्याने मला पाठवले त्याच्याकडे मी निघून जाणार आहे.

34 तुम्ही माझा शोध कराल तरी मी तुम्हाला सापडणार नाही आणि जेथे मी असेन तेथे तुम्ही येऊ शकणार नाही.”

35 ह्यामुळे यहूदी आपआपल्यात म्हणाले, “हा आपल्याला सापडणार नाही असा हा कुठे जाईल? हा हेल्लेण्यांत पांगलेल्या लोकांत जाऊन हेल्लेण्यांस शिकवील काय?

36 हा जे म्हणतो की, ‘तुम्ही माझा शोध कराल आणि मी तुम्हाला सापडणार नाही’, आणि ‘मी असेन तिथे तुम्ही येऊ शकणार नाही’, हे म्हणणे काय आहे?”

37 मग सणाच्या शेवटल्या दिवशी म्हणजे महत्वाच्या दिवशी, येशू उभा राहून मोठ्याने म्हणाला, “कोणी तान्हेले असेल तर त्याने माझ्याकडे यावे आणि प्यावे.

38 जो माझ्यावर विश्वास ठेवतो त्याच्या अंतःकरणातून शास्त्रलेखात सांगितल्याप्रमाणे जिवंत पाण्याच्या नद्या वाहतील.”

39 ज्यांनी त्याच्यावर विश्वास ठेवला त्यांना जो आत्मा मिळणार होता, त्याच्याविषयी त्याने हे म्हटले. तोपर्यंत पवित्र आत्मा दिलेला नव्हता, कारण अजून येशूचे गौरव झाले नव्हते.

40 लोकसमुदायातील कित्येक जण हे शब्द ऐकून म्हणत होते, “खरोखर, हा तो संदेष्टा आहे.”

41 कित्येक म्हणाले, “हा ख्रिस्त आहे.” दुसरे कित्येक म्हणाले, “ख्रिस्त गालिलातून येणार आहे काय?

42 दाविदाच्या वंशाचा आणि ज्या गावात दावीद होता त्या बेथलेहेमातून ख्रिस्त येईल अस शास्त्रलेख म्हणत नाही काय?”

43 ह्यावरून त्याच्यामुळे लोकांत फूट झाली.

44 त्यांच्यातील कित्येक जण त्याला धरायला पाहत होते, तरी कोणी त्याच्यावर हात टाकले नाहीत.

45 मग कामदार मुख्य याजकांकडे व परूश्यांकडे आले, तेव्हा ते त्यांना म्हणाले, “तुम्ही त्याला का आणल नाही?”

46 कामदारांनी उत्तर दिले, “कोणीही मनुष्य त्याच्यासारखा कधी बोलला नाही.”

47 तेव्हा परूश्यांनी त्यांना उत्तर दिले, “तुम्ही पण फसलात काय?

48 अधिकार्‍यांपैकी किंवा परूश्यांपैकी कोणी त्याच्यावर विश्वास ठेवला आहे काय?

49 पण हा जो लोकसमुदाय नियमशास्र जाणत नाही तो शापित आहे.”

50 (पूर्वी त्याच्याकडे आलेला, आणि त्यांच्यातला एक असलेला) निकदेम त्यांना म्हणतो,

51 “एखाद्या मनुष्याच ऐकण्याअगोदर, आणि तो काय करतो ह्याची माहीती करून घेतल्यावाचून आपले नियमशास्त्र त्याचा न्याय करते काय?”

52 त्यांनी त्याला उत्तर देऊन म्हटले, “तुम्हीपण गालीलातले आहात काय? शोधा आणि बघा, कारण गालीलातून संदेष्टा उद्भवत नाही.”

53 मग ते सर्वजण आपआपल्या घरी निघुन गेले.