John 20 in Marathi

1 आठवड्याच्या पहिल्या दिवशीं, पहाटेस अंधारातच, मरिया मग्दालीया कबरेजवळ आली आणि कबरेच्या तोंडावरून धोंड काढली आहे असे तिने पाहिले.

2 तेव्हा शिमोन पेत्र व ज्याच्यावर येशूची प्रीती होती त्या दुसर्‍या शिष्याकडे धावत येऊन ती त्यांना म्हणाली, “त्यांनी प्रभूला कबरेतून काढून नेले आणि त्याला कोठे ठेवले हे आम्हाला माहीत नाही.”

3 म्हणून पेत्र व तो दुसरा शिष्य बाहेर पडून कबरेकडे जावयास निघाले.

4 तेव्हा ते दोघे जण बरोबर धावत गेले;पण तो दुसरा शिष्य पेत्राच्या पुढे धावत गेला व कबरेजवळ प्रथम पोहचला.

5 त्याने ओणवून आत डोकावले आणि त्याला तागाची वस्त्रें पडलेली दिसली. पण तो आत गेला नाही.

6 शिमोन पेत्रहि त्याच्यामागून येऊन पोहचला व तो कबरेंत शिरला;

7 आणि तागाची वस्त्रे पडलेली व जो रुमाल त्याच्या डोक्याला होता त्या तागाच्या वस्त्रांजवळ नव्हे, तर वेगळा एकीकडे गुंडाळून पडलेला होता.

8 तेव्हा जो दुसरा शिष्य पहिल्याने कबरेजवळ आला होता तोहि आत गेला आणि त्याने पाहून विश्वास ठेवला.

9 कारण त्याने मेलेल्यातून पुन्हा उठावे हे अवश्य आहे, हा शास्त्रलेख त्यांना अजून कळला नव्हता.

10 मग ते शिष्य पुन्हा आपल्या घरी गेले.

11 पण इकडे मरिया बाहेर कबरेजवळ रडत उभी राहिली होती, आणि ती रडता रडता तिने ओणवून कबरेत पाहिले;

12 आणि जेथे येशूचे शरीर आधी ठेवलेले होते तेथे ते शुभ्र वस्त्रे परिधान केलेले दोन देवदूत एक डोक्याकडील बाजूस आणि एक पायांकडील बाजूस बसलेले दिसले.

13 आणि ते तिला म्हणाले, “बाई, तू का रडतेस?” ती त्यांना म्हणाली, “ त्यांनी माझ्या प्रभूला नेले, आणि त्याला कोठे ठेवले हे मला माहीत नाही.”

14 असे बोलून ती मागे वळली, आणि तो तिला येशू उभा असलेला दिसला; पण तो येशू आहे हे तिने आेळखले नाही.

15 येशूने तिला म्हटले, “बाई, तू का रडतेस? तू कोणाला शोधतेस?” तो माळी आहे असे समजून त्याला म्हणाली, “दादा, तू त्याला येथून नेले असेल तर कोठे ठेवलेस ते मला सांग म्हणजे मी त्याला घेऊन जाईन.”

16 येशूने तिला म्हटले, “मरिये,” ती वळूनत्याला इब्री भाषेत म्हणाली, “रब्बूनी,”! (म्हणजे गुरूजी)

17 येशूने तिला म्हटले, “मला शिवू नकोस; कारण, मी अजून पित्याकडे वर गेलो नाही; तर माझ्या बांधवांकडे जाऊन, त्यांना सांग की, ‘जो माझा पिता आणि तुमचा पिता, माझा देव आणि तुमचा देव आहे त्याच्याकडे मी वर जातो.’”

18 मरिया मग्दालीया गेली आणि आपण प्रभूला पहिल्याचे’ आणि त्याने आपल्याला ह्या गोष्टी सांगितल्याचे तिने शिष्यांना कळविले.

19 तेव्हा त्याच दिवशी, म्हणजे आठवड्याच्या पहिल्या दिवशी संध्याकाळी,शिष्य जेथे जमले होते तेथील दारे यहूद्यांच्या भीतीमुळें,बंद असता. येशू आला मध्यभागी उभा राहून म्हणाला, “तुम्हास शांती असो.”

20 आणि हे बोलल्यावर त्याने त्यांना आपले हात आणि कूस दाखविली; आणि शिष्यांनी प्रभूला बघितले तेव्हा ते आनंदित झाले

21 तेव्हा येशू त्यांना पुन्हा म्हणाला, “तुम्हाला शांती असो. जसे पित्याने मला पाठवले आहे तसे मीहि तुम्हाला पाठवतो.”

22 एवढे बोलल्यावर त्याने त्यांच्यावर फुंकर टाकली आणि तो त्यांना म्हणाला, “पवित्र आत्म्याचा स्वीकार करा.

23 ज्या कोणाच्या पापांची तुम्ही क्षमा करता त्यांची क्षमा झाली आहे आणि ज्या कोणाची तुम्ही ठेवता ती तशीच ठेवलेली आहेत.”

24 येशू आला तेव्हा, बारांतील एक, ज्याला दिदुम म्हणत तो थोमा त्यांच्याबरोबर नव्हता.

25 म्हणून दुसऱ्या शिष्यांनी त्याला सांगितले, “आम्ही प्रभूला पाहिले.” तेव्हा तो त्यांना म्हणाला, “मी त्याच्या हातात खिळ्यांची खूण बघितल्याशिवाय, खिळ्यांच्या जागी माझे बोट घातल्याशिवाय, आणि त्याच्या कुशीत माझा हात घातल्याशिवाय मी विश्वास ठेवणारच नाही.”

26 आणि पुन्हा, आठ दिवसांनी, त्याचे शिष्य घरात होते आणि थोमा त्यांच्याबरोबर होता; आणि दारे बंद असताना येशू आला व मध्यभागी उभा राहिला, आणि म्हणाला, “तुम्हाला शांती असो.”

27 मग तो थोमाला म्हणाला, “तुझे बोट पुढे कर, आणि माझे हात बघ; तुझा हात पुढे कर आणि माझ्या कुशीत घाल; आणि विश्वासहीन होऊ नकोस पण विश्वास ठेवणारा हो.”

28 आणि थोमाने त्याला म्हटले, “माझा प्रभू आणि माझा देव!”

29 येशूने त्याला म्हटले, “तू मला पाहिले आहे म्हणून विश्वास ठेवला आहे. पाहिल्यावांचून विश्वास ठेवणारे आहे ते धन्य!”

30 आणि ह्या पुस्तकात लिहिली नाहीत अशी दुसरीही पुष्कळ चिन्हे येशूने आपल्या शिष्यांसमोर केली.

31 पण ही ह्यासाठी लिहिली आहेत की, येशू हा देवाचा पुत्र ख्रिस्त आहे, असा तुम्ही विश्वास ठेवावा. आणि तुम्ही विश्वास ठेवल्याने तुम्हाला त्याच्या नावात जीवन मिळावे.