Galatians 6 in Marathi

1 बंधूंनो, कोणी माणूस अपराधात सापडला, तर तुम्ही जे आत्मिक आहात ते त्याला सौम्यतेच्या आत्म्याने ताळ्यावर आणा; तूही परीक्षेत पडू नये म्हणून स्वतःकडे लक्ष दे.

2 तुम्ही एकमेकांची ओझी वाहा म्हणजे ख्रिस्ताचा नियम पूर्ण कराल.

3 कारण आपण कोणी नसता कोणी तरी आहोत असे मानतो, तो स्वतःला फसवतो.

4 पण प्रत्येकाने स्वतःच्या कामाची परीक्षा करावी आणि मग, त्याला दुसर्‍याच्या संबंधात नाही, पण केवळ आपल्यात अभिमानाला जागा मिळेल.

5 कारण प्रत्येकाने आपला स्वतःचा भार वाहिलाच पाहिजे.

6 ज्याला वचनाचे शिक्षण मिळते त्याने शिक्षण देणार्‍याला सर्व प्रकारच्या चांगल्या पदार्थांचा वाटा द्यावा.

7 फसू नका, देवाचा उपहास होणार नाही; कारण मनुष्य जे काही पेरतो त्याचेच त्याला पीक मिळेल.

8 कारण जो आपल्या देहाकरता पेरतो त्याला देहाकडून नाशाचे पीक मिळेल, पण जो आत्म्याकरता पेरतो त्याला आत्म्याकडून सार्वकालिक जीवनाचे पीक मिळेल.

9 आणि चांगले करण्याचा आपण कंटाळा करू नये; कारण आपण खचलो नाही, तर नियोजित समयी कापणी करू.

10 म्हणून आपल्याला संधी असेल तसे आपण सर्वांचे बरे करावे व विशेषतः विश्वासाने एका घरचे झालेल्यांचे बरे करावे.

11 पाहा, किती मोठ्या अक्षरांनी, मी तुम्हाला स्वहस्ते लिहित आहे.

12 जितके दैहिक गोष्टींचा डौल मिरवू पाहतात असे तितके ख्रिस्ताच्या वधस्तंभामुळे त्यांचा छळ होऊ, नये म्हणूनच तुम्हाला सुंता करून घेण्यास भाग पाडतात;

13 कारण ज्यांची सुंता झाली आहे ते स्वतः तर नियमशास्त्र पाळीत नाहीत, पण तुमच्या देहावरून नावाजून घेण्यासाठी, म्हणून, तुमची सुंता व्हावी अशी त्यांची इच्छा बाळगतात.

14 आपला प्रभू येशू ख्रिस्त ह्याच्या वधस्तंभाच्या अभिमानाशिवाय कशाचाही अभिमान बाळगणे माझ्यापासून दूर राहो.पण ज्याच्या द्वारे जग मला आणि मी जगाला वधस्तंभावर खिळलेला आहे.

15 कारण सुंता होण्यात किंवा सुंता न होण्यात काही नाही,तर नवी उत्पत्ती हीच काय ती होय.

16 आणि जे ह्या नियमाने चालतात अशा सर्वांवर व देवाच्या इस्राएलावर शांती व दया असो.

17 आतापासून कोणी मला त्रास देऊ नये, कारण मी आपल्या शरीरावर येशूच्या खुणा धारण केल्या आहेत.

18 बंधूंनो, आपला प्रभू येशू ख्रिस्त ह्याची कृपा तुमच्या आत्म्याबरोबर असो. आमेन.