Revelation 7 in Makaa

1 Ja ísâ ínɨ í mə shîn bə yí, mə mú dʉ́g *wə́éŋgəles onɔ̧̂ bwə́ tə́l íkɔ́ɔ́mb í shí ínɔ̧̂ dɨ̂, bwə́ mə́ káágʉlə óŋkwɔ̧̂ onɔ̧̂ wâ shí. Bwə́ a shígɛ́ bɨ́d nə́ ŋkwɔ̧̂ kúŋgʉg tɔɔ shí, tɔɔ mâŋ, tɔɔ mə́lɨ́ɨ́d.

2 Mə mú nyiŋgə dʉ́g ŋgwɔ́l *éŋgəles ŋgə́ wú ŋgɛɛ kɔ́ɔ́mb jwɔ̂w í dʉ cúwo yí, a mbíd sá bwə́ dʉ bwadʉlə búúd mə́yɨɨgyé mə́ Zɛmbî á kuwô yí. Nda bwə́ á yə wəéŋgəles ónɔ̧̂ ŋkul nə́ bwə́ ntámág shí nə mâŋ nə́, éŋgəles mə á nyiŋgə dʉ́g ɛ́nɛ mú kɨ̂m gwɔ́w-gwɔ̂w lás nə bwo.

3 Nyə á cɨ nə bwo nə́: «Kúgá fwo ntáma shí, ŋkí mâŋ, ŋkí məlɨ́ɨ́; bwándʉ́gá, sə́ fwóg wá ósɔ́ɔl ɔ mə́sáal ɔ́ Zɛmbî wúsʉ́ məyɨɨgyé mə́mpwoombʉ́d.»

4 Mə músə gwág nə́ buud bwə́ á wɨ́yɔw məyɨɨgyé wá bwə́ á bə buud otɔ́ɔ́shin təd nə məwûm mə́nɔ̧́ nə ónɔ̧̂, ŋgə̌lə zhu íbɛɛnd i *Izʉrəyɛ̂l byɛ̂sh dɨ̂.

5 Í á bə buud otɔ́ɔ́shin wûm nə óbá bɛɛnd mə Yúda dɨ́, otɔ́ɔ́shin wûm nə óbá bɛɛnd mə Rubɛn dɨ́, otɔ́ɔ́shin wûm nə óbá bɛɛnd mə Gâd dɨ́,

6 otɔ́ɔ́shin wûm nə óbá jé mə́ Azɛr dɨ́, otɔ́ɔ́shin wûm nə óbá jé mə́ Nɛftali dɨ́, otɔ́ɔ́shin wûm nə óbá jé mə́ Manase dɨ́,

7 otɔ́ɔ́shin wûm nə óbá jé mə́ Símʉyon dɨ́, otɔ́ɔ́shin wûm nə óbá jé mə́ Lévi dɨ́, otɔ́ɔ́shin wûm nə óbá jé mə́ Isakâr dɨ́,

8 otɔ́ɔ́shin wûm nə óbá jé mə́ Zabulon dɨ́, otɔ́ɔ́shin wûm nə óbá jé mə́ Yósɛb dɨ́, otɔ́ɔ́shin wûm nə óbá jé mə́ Bəŋzhamɛ̧̂ dɨ̂. Buud ɔ́nɨ bɛ̂sh wə́ bwə́ á wɨ́yɔw məyɨɨgyé mə́mpwoombʉ́d wá.

9 Ja áməyɨɨgyé ɛ́nɛ mə́ shîn yí, mə mú dʉ́g búúd áncuncuma, bímbí múúd cúgɛ́ nə ŋkul lɔ̧́ yí. Bwə́ á bə buud wâ ilwoŋ byɛ̂sh, nə ibɛɛnd byɛ̂sh, nə ikúl byɛ̂sh, nə məkə̂l mɛ̂sh, bwə́ tə́l mpwóómbʉ́ caaŋgə́d, Mwâ Ncwəmbɛ dɨ́ míshʉ́d, bwə́ mə́ bwáád íjud í áfufumə́, bwə́ nə máŋ mə́ lə́ndú mə́bwə́d.

10 Bwə́ á ŋgə kɨ̂m gwɔ́w-gwɔ̂w nə́: Zɛmbî wúsʉ́ muud njúl caaŋgə́d yɛ́, bá Mwâ Ncwəmbɛ wə́ bwə́ mə́ cʉg sə̂.

11 *Wəéŋgəles bɛ̂sh bwə́ mə́ lyɛ̧ *caaŋgə́ nə ocúmbá buud, nə mikuwó mí ísâ mínɔ̧̂ wá, bwə́ mú wusə mə́nyúúl shí ombúmbudɨ̂ na mpwóómbʉ́ caaŋgə́d, yə Zɛmbî gúmə́,

12 bwə́ ŋgə́ cɨ nə́: Amɛn. Məzhwámá, nə milwanə́, nə fʉg, nə akíba, nə gúmə́, nə mpífə́, nə ŋkul, bísə Zɛmbî wúsʉ́ isâ byé kandʉgə á kandʉgə. Amɛn.

13 Nə́ ndɛɛ́, ŋgwɔ́l cúmbá muud mú lás, cɨ nə mə nə́: «Ozə́ bâŋ bɨ́ nə ijud í áfufumə́ ɔ́nɨ, bwə́ ŋgə wú ŋgow?»

14 Mə mú bɛ̧sa nə nyə nə́: «Yé Cwámba, wo wə́ mə́ mpû.» A mú cɨ nə mə nə́: «Bʉ́sə buud bwə́ ŋgə́ wú yáág-yáág cúwʉ́líd wá. Bwə́ mə́ gusa íjud byáŋ mə́cií mə Mwâ Ncwəmbɛ dɨ́, sá nə́ í bə́g ofúfumə̂.

15 Gwə́ wə́ bwə́ tə́l na mpwóómbʉ́ caaŋgə́ mə́ Zɛmbî dɨ́ yí. Bwə́ é dʉ yə Zɛmbî gúmə́ bulú nə mwásə́ nyə́dɨ́ Mpáánzə́. Muud njúl caaŋgə́d yɛ́ mə́ bá wá bwo nyə́dɨ́ gúgʉ́wád.

16 Bwə́ ábʉ́lɛ́ ná bwɛlɛ gwág zha, kú nyiŋgə bwɛlɛ gwág shwáásʉ́lə minʉ́. Tɔɔ yásə́ tɔɔ ŋgwɔ́l bibibi nyə abʉ́lɛ ná nyiŋgə nyaan bwo nyúúlʉ́d.

17 Nəcé Mwâ ncwəmbɛ jɨ́ tâm caaŋgə́ yɛ́ mə́ bá bə mbaagʉlə wáŋ, a bá kə nə bwo mə́ncwuŋ mə́ ŋgə́ wééshʉli məjúwó mâ cʉg mád, Zɛmbî mú bá fîm bwo məzhwíílɛ mɛ̂sh míshʉ́d.»