Song of Solomon 4 in Maale

1 ታ ሚሼሌ! ዎዚ ኔ ሚዛጳይ! ዎዚ ኔኤኒ ኮሽካይ! ዓኣፖ ካሮ ኔኤኮ ካንቆና ባኮ ባኣኪና ዓኣፓ ኔኤኮ ጴዻኣና ዶኦሌ ዓኣፒጉዲ ሚዛጳያኬ፤ ቶኦኮ ጋማ ኔኤኮ ጌሌዓዴ ዹካፓ ጎዒ ኬዳ ዺቢ ዋኣሪጉዲኬ።

2 ዓጫ ኔኤኮ ዔያቶ ባኣካ ሴኤካባኣ ጉቤሢ ሜንቴ ሜንቴ ሾዓ ጋፓኖ ታይዛዖዋ ዋኣሢና ማስታ ቦኦሬ ማራይጉዲ ሚዛጳያኬ።

3 ሙሱራ ኔኤኮ ዲንኪ ዞቄ ፓቲሌጉዲ ሚዛጳኔ፤ ኔ ጌስታኣና ሚርጌና ኮሽካኔ፤ ኔኤኮ ላምዖ ዛሎ ጋንጋራ ዓኣፖ ካሮ ካንቆና ባኮ ባኣኪና ጴዻኣና ላምዖ ፓቂንቴ ሮኦማኔ ዓኣፒ ማላያኬ።

4 ባቃና ኔኤኮ ሺያና ፓይዲንታ ዖሎና ዔርቴ ዓሶኮ ጊቲሞና ዖሎ ዓንጋሞና ሱፂንቲ ዴዓ ዖልዚም ዋርዲያ ማዓንዳጉዲ ኮሺንቴያ ዳውቴኮ ዼጌ ቤዞ ማላኔ።

5 ላምዖ ዻንፃ ኔኤኮ ሜንቴ ማይ ሾይንቴያ ሚዛጶ ቡኖ ባኣካ ሄንቃ ሞይሌ ናይ ማላኔ።

6 ሳዓ ካራንዳያ ሄላንዳኣና ዹማ ፖዓንዳያ ሄላንዳኣና ሌካ ኬርቤ ዹኮ ጊንሣ ሃሣ ዑንጆ ጌሜሮ ታ ዴንዲ ሃውሻንዳኔ።

7 ታ ሚሼሌ! ጉቤ ካራና ኔኤኒ ሚዛጲኬ፤ ሃይማ ፓጬኔ ጎዖንዶ ባኣዚ ኔኤኮ ባኣሴ።

8 ታኣኮ ዑኡቴሌ! ሊባኖኦሴፓ ታ ባንሢ ሃኒ ዬዔ፤ ሂዮ፥ ሊባኖኦሴፓ ታ ኮይላ ሙኬ። ዓማኣና ዹኮ ቶኦካፓ ኬዴ፤ ዞቢና ማኣኪናኮ ናንጎ ቤዞ ማዔ ሴኒሬና ሄርሞኔ ዹኮናፓ ኬዲ ሃኒ ዬዔ።

9 ታኣኮ ናሽኪንታያ ሜዔ ዑኡቴሌ ፔቴና ኔኤኒ ታና ዛጌ ዛጎና ኔኤኮ ቆርጮይዳ ዓኣ ሚዛጶ ፓልማሢና ዒኖ ታኣኮ ኔኤኒ ዲዔኔ።

10 ታኣኮ ናሽኪንታ ዑኡቴሌ! ናሹማ ኔኤሲ ዎዚ ታና ዎዛሳይ! ናሹማ ኔኤሲ ዎይኖ ዑዣፓ ባሼ ታኣም ኮሽካኔ፤ ሳውቃ ቲዦኮ ሳውማ ሳዎ ቲዦ ቢያፓ ባሼኬ።

11 ታኣኮ ዑኡቴሌ! ኔኤኮ ሙሱራፓ ዔኤሲ ፆሎሊ ፆዻኔ፤ ዻንጋፓ ኔኤኮ ዔኤሲና ዲኢቂና ዓልቃኔ፤ ዓፒሎኮ ኔኤኮ ሳውማ ሊባኖኦሴይዳ ዓኣ ሳውቃ ዼኤሾጉዲኬ።

12 ኔኤኒ ታኣኮ ናሽኪንታ ዑኡቴሌ! ኔኤኒ ዲርቆና ዱማ ዱማ ባኣዚ ቱኮ ጎሺ ጊንሣ ሃሣ ኮይላ ዲርቂንቴ ዓልቃ ዋኣሢኬ።

13 ኔኤኮ ሃንቶ ጎይፃ ዓኣሢ ዓኣፒ ኩሜ ሮኦማኖ ሚፃ ዓኣ ጎሺጉዲኬ።

14 ናርዶኦሴ፥ ሃምባልታ፥ ዳጅሳኣሬንታ ቄሬፓንታ ዬያጉዲ ሳውማ ዑንጄጉዲ ማዔ ዱማ ዱማ ቱኮና ባኣዚ ዒዞይዳ ዓኣኔ፤ ኬርቤንታ ዋላንጎ ቡኒንታ ዱማ ዱማ ሳዊ ዼኤሻ ዒኢካ ባቃላኔ።

15 ኔኤኒ ቱኪንቴ ዱማ ዱማ ባኮ ዑሻ ዓልቃ ዋኣሢጉዲኬ፤ ዓልቃ ዋኣሢ ዓኣ ዋኣሢ ዔቴጉዲኬ፤ ዬያ ሌሊቱዋንቴ ሊባኖኦሴ ዹኮ ዴማፓ ዓልቃ ዎርዚጉዲኬ።

16 ኬዶ ባንፆ ዢባራሢዮ! ጴጪ ዔቄ! ኔኤኒ ሃሣ ዾኦሎ ባንፆ ዢባራሢዮ! ሃኒ ሙኬ! ታኣኮ ዱማ ዱማ ባኮ ቱኮና ቤዞይዳ ዢባርሼ፤ ዬይ ዢባራ ኮሺ ሳውሞ ዓኣያ ማዖንጎ፤ ታ ዒሼ፥ ዱማ ዱማ ባኮ ቱኮና ቤዞ ሙኮንጎ፤ ኮሺ ዓኣፃያ ማዔ ሚፆ ዓኣፖዋ ሙዖንጎ።