Song of Solomon 1 in Maale

1 ሴሎሞኔ ዓይናዼ፥ ቢያፓ ባሻ ዓይኑሞ

2 ናሹማ ኔኤሲ ዎይኖ ዑዣፓ ባሼ ታና ዎዛሳያ ማዔሢሮ ኔ ሙሱራ ታና ሄርቆንጎ።

3 ኔኤኒ ቲሽቴ ቲዣ ቃራ ሳውቃያኬ፤ ሱንፆ ኔኤኮ ዔኤሊፃ ሳውቃ ቲዦ ፑኡኪሢጉዲኬ፤ ዉዱራሢ ኔና ናሽካሢ ዬያሮኬ።

4 ኩጮ ታኣኮ ዓርቂ ጎቺ ታና ዔኪ ዓኣዼ፤ ኑ ዎላ ዑካዺ ዓኣዾም፤ ካኣቲ ፔ ቆልዖ ጋሮ ታና ዔኪ ጌልዜኔ። ዑኡቴሎኮ ላጎ ዓይኑሞ ኔኤኮ ናሹማ ኮሺ ኑና ዎዛሳኔ፤ ዎይኖ ዑዦይዳፓ ባሼ ናሹሞ ኔኤሲ ኑ ሄርሻኔ። ዑኡቴሎ ዓይኑሞ ዔያታ ኔና ሃያይዲ ናሽካሢ ፒዜኬ።

5 ዒንሢ ዬሩሳላሜ ዓጮ ዉዱራሢ ዋይዙዋቴ! ታኣኒ ካርሢኬ፤ ማዔቴያ ታኣኒ ሚዛጲኬ፤ ካርሡማ ታኣኮ ቄዳሬይዳ ዓፒሎና ማዢንቴ ማኣሮጉዲኬ፤ ሚዛጱማ ታኣኮ ጋዓንቴ ሴሎሞኔኮ ካኣቱሞ ማኣሮ ጎኦቦ ዓፒሎጉዲኬ።

6 ታና ካርሤሢ ዓቦ ሩኡጶኬ፤ ታኣኒ ካርቴሢሮ ታና ቶኦቺፖቴ፤ ታ ዒንዶ ናኣቶ ማዔ ታ ጌርሲንሢ ታኣና ፑርቴሢሮ ዎይኖ ጎዦ ታና ዔያታ ካፒሴኔ፤ ዬያሮ ታኣኒ ታ ዎይኖ ጎዦ ካፒፆ ሃሼኔ።

7 ታ ዒሼ! ታኣም ሂንዳ ኬኤዜ፤ ኔኤኮ ማራቶ ኔኤኒ ዓንካ ሄንቃይ? ዓባ ሳዛ ማዓኣና ኔ ዔያቶ ዓንካ ቃኣቲሳንዳቴያ ታኣም ኬኤዜ፤ ታ ኔና ኮይፆ ኔ ላጎ ቆልሞ ጊንፆ ዓኣዺሢና ዓፒላ ቶኦኪና ጉኡሊንቴ ላኣሊጉዲ ማዒሢና ዣኣሊ ሺራሢ ዓይጎሮዳይ?

8 ኔኤኒ ላኣሎይዳፓ ቢያ ባሼ ሚዛጴሌ! ቤዞ ኔ ዔሩዋያ ማዔቴ ማራቶ ኮጲዞ ዓርቂ ዓኣዼ፤ ዋናናኣቶ ኔኤኮ ሞኦፆ ናኣቶ ጉርዶ ዓጫ ሄንቄ።

9 ታ ሚሼ! ጊብፄ ካኣቲኮ ሳርጌሎ ዖይቶ ጎቻ ፓራሢ ባኣካ ዓኣ ዒንዶ ፓሮ ኔኤኒ ማላኔ፤

10 ጋንጋራ ኔኤኮ ሚዛጲ ሙሊሢ ሹቺጉዲኬ፤ ባቃና ኔኤኮ ሚዛጶ ፓልማሢና ማዒ ዴንቃያኬ።

11 ኑኡኒ ጋዓንቴ ቢራ ዓንጊ ፓልሞ ዎርቄና ሚዛጲሶናያ ኔኤም ኮሻንዳኔ።

12 ካኣቲ ቃሚፆ ሻኣሎይዳ ሙዖሮ ዴይ ዓኣንቴ ታኣኮ ሳውቃ ቲዦ ሳውማ ጋሮ ዒዛኮ ዔኬኔ።

13 ታ ዒሼ፥ ታኣኮ ዻንፆ ባኣካ ላሃ ሳውማ ዒዛኮ ዖሺንቲ ዓኣ ኬርቤጉዲኬ።

14 ታ ዒሼ፥ ዒንጌዴ ጌይንታ ዎይኖ ቱኮ ቤዛ ባቃሊ ዓኣ ቦኦሊ ቡኒጉዲኬ።

15 ታ ሚሼ! ዎዚ ኔኤኒ ሚዛጳይ! ዓውካራ ኔኤኮ ዎዚ ኮሽካይ! ዓኣፓ ኔኤኮ ዶኦሌ ዓኣፒጉዲ ሚዛጳኔ።

16 ታ ዒሼ! ኔኤኒያ ሚዛጲታንቴሞ፤ ኮሺ ኔ ታና ዎዛሳኔ፤ ሻኣላ ኑኡኮ ዋርቂ ዓኣ ማኣቲጉዲ ዎዛሳያኬ።

17 ማኣሮኮ ኑኡኮ ቱርቱራ ሊባኖኦሴ ሚፆኬ፤ ሳካኣ ዚቢቆ ሚፆና ማዢንቴያኬ።