Psalm 90 in Maale

1 ፆኦሲ ዓሢ ሙሴኮ ሺኢጲፆ ናንጊና ናንጋ ጎዳሢዮ! ኔኤኒ ሾይንቲፓ ሾይንቲ ሄላንዳኣና ኑኡኮ ፑኖ ካያሢኬ።

2 ዹኮ ማዻንዳሢና ዓጮዋ ኔ ማዣንዳሢኮ ቤርታ ኔኤኒ ናኣናና ናናንጋ ፆኦሲኬ።

3 ዓሶ ኔኤኒ ሳዖ ባንሢ ማሃኔ፤ «ዓሲዮቴ! ዒንሢ ቤዞ ማዑዋቴ!» ጋዓኔ።

4 ሺያ ሌዔ ኔኤም ካሪ ዓኣዼ ዚጊናኣ ኬሊጉዲኬ፤ ዻካ ዴዓዖ ካራ ዹሚጉዲኬ።

5 ዲጲጉዲ ፒፂ ኔ ዔያቶ ዔኪ ዓኣዻኣና ዓውቲጉዲ ዔያታ ማዓንዳኔ፤ ጉቶ ጉቶ ባቃላ ማኣቲጉዲ ዔያታ ዋርቃኔ።

6 ማኣታ ጉቶ ባቃላዖ ዓኣዓኔ፤ ዓቦ ጌሎ ሹሊ ሜላኔ።

7 ኔኤኮ ጎሪንታ ኑና ኩርሴኔ፤ ዱማ ዱማ ዎዻ ባኮናኣ ኑ ዲቃቴኔ።

8 ጎሞ ኑኡሲ ኔ ቤርታ ኔ ጌሣኔ፤ ኑኡኮ ዓኣሺንቴ ዻቢንቶ ኔኤም ጴዻ ቤስካ ኔኤኒ ዴይሣኔ።

9 ኑኡኮ ናንጎ ዎዳ ቢያ ኔ ጎሪንቶና ጋፔኔ፤ ናንጎ ኑኡሲ ኑ ጎኦሺንቴ ጎይሣ ጋፒሳኔ።

10 ናንጎ ሌዓ ኑኡኮ ላንካይታሚ ሌዔ፤ ሚርጌኔ ጌዔያታቴ ሳሊታሚ ሌዔኬ፤ ዬካፓ ዑሣ ዓኣዼያ ማዔቴ ላቢሢና ሜቶና ሌሊ ማዓያኬ፤ ናንጋ ኑኡኮ ዑኬ ጋፓኔ፥ ኑኡኒ ዓዓኣዻኔ።

11 ኔኤኮ ዻጎ ዎልቆ ዖኦኒ ዔራይ? ዱማ ዱማ ዎዻ ባካ ኔኤኮ ዒጊቺፆጉዴያ ዼኤፒኬ።

12 ኑኡኮ ናንጎ ሌዖንሢዳ ዔራቶና ኑ ናንጋንዳጉዲ ዔራቶ ዓኣ ዒኔ ኑም ዒንጌ።

13 ናንጊና ናንጋ ጎዳሢዮ! ኔኤኒ ማዔ፤ ሃይ ዓይዲ ሄላንዳኣና ሃኣዺ ማዓንዳይ? ኔኤኮ ማዻ ዓይሎም ሚጪንቴ።

14 ኑኡኮ ናንጎ ዎዶይዳ ቢያ ኑ ዎዛዻንዳጉዲ ኔኤኮ ሚጪንቲፆ ጉቴና ጉቴና ዺቢሺ ዻዌ።

15 ሜታሢ ኔ ኑና ዻዌ ሌዖጉዴያ ፑርቶ ባኮዋ ኑ ዛጌ ሌዖጉዴያ ኑና ዎዛሴ።

16 ማዻ ኔኤኮ ኔ ዓይሎም ቦንቻኣ ዔያቶኮ ናኣቶም ፔጋዺ ጴዾም።

17 ናንጊና ናንጋ ጎዳ ማዔ ኑ ፆኦዛሢኮ ኮሹማ ኑ ዑፃ ማዖም! ኑ ማዻ ባኮዋ ኑኡም ዓንጄ፤ ሂዮ ኑኡም ዓኣፒሴ።