Psalm 73 in Maale

1 ዓሳኣፔ ዓይኑሞ ዒና ጌኤሺ ማዔ ዒስራዔኤሌ ዓሶም ፆኦሲ ዎዚ ኮሺዳይ!

2 ታኣኒ ጋዓንቴ ቶካ ታኣኮ ዹቂንታኒ ሃሊፄም ሎኦማኒ ዻካሮ ዓቴኔ።

3 ታኣኒ ፑርቶ ዓሶም ዔባ ኮሽካዛ ዛጊ ዋይዞ ዒፃ ዓሶማኣ «ዬይ ዎዲ ማዔዖ» ጌይ ማሌኔ።

4 ፔቴታዖ ሜታ ዔያቶኮ ባኣሴ። ዑፃ ዔያቶሲ ኩሙሢ ኮሺኬ።

5 ዓሲ ሄላ ፑርታ ሜታ ዔያቶ ሄሉዋሴ፤ ዓይጎ ዓሲዳኣ ማዓ ሜታ ዔያቶ ዑፃ ማዑዋሴ።

6 ዬያሮ ዖቶርሙሞ ዔያቶኮ ቆርጫ ማይንቶ ፓልሞኬ፤ ዋይዚ ዒፂሢያ ዓዳ ዔያታ ማኣዖጉዲ ማይንቴኔ።

7 ዔያቶኮ ማሌ ዓኣፓ ቴልዮ ጌይ ዛጋኔ፤ ዒናኣ ዔያቶሲ ፑርታ ማሊሢ ኬሳኔ።

8 ቶኦቺሢና ፑርቱሞ ዔያታ ጌስታኔ፤ ሌካ ጪኢዺንቲ ጪኢዺንቲ ዋይዞ ዒፂፆና ዚርቃኔ።

9 ጫሪንጫ ዓኣ ፆኦዛሢ ማኪ ዔያታ ጌስታኔ፤ ጌኤዛ ዔያቶኮ ሳዓ ማዔ ካሮ ሄላኔ።

10 ዬያሮ ፆኦሲ ዴራኣ ዓቱዋዖ ዔያቶ ባንሢ ጎዓኔ፤ ዋኣፆዋ ዔያቶኮ ካራባኣ ጎይሢና ዑሽካኔ።

11 «ዓካሪ ፆኦሲ ዎይቲ ዔራይ? ዼኤፖ ፆኦዛሢ ኮራ ዔራቶ ዓኣ?» ዔያታ ጋዓኔ።

12 ፑርቶ ዓሳ ያዺ ማላኔ፤ ዔያቶኮ ዓኣ ቆላ ጊዳያኬ፤ ዬያይዴንቴያ ቃሲ ቆሎ ዔያታ ዴንቃኔ።

13 ሃይሾ ዒኖ ታኣኮ ታ ጌኤሺ ማሄሢ ጉሪኬ፤ ዔኤቢ ታ ካኣሚባኣዋይ ጌዒ ኩጮ ማስታሢያ ጉሪኬ።

14 ሮኦሮ ጉቤ ታ ሜታዼኔ፤ ጉቶ ጉቶዋ ሜቶ ታ ዔኬኔ።

15 ታኣኒ ሃያይዲ ጌስታንዳኔ ጌዔያ ማዔያታቶ ኔኤኮ ናኣቶ ሾይንቶይዳ ሄኤዶ ፑርታ ባኣዚ ማዼያናንዳኔ።

16 ዬያ ባኮ ታ ዔራኒ ማሌ ዎዶና ላቢሢ ማዾ ማሊ ታኣም ጴዼኔ።

17 ዬይያ ፆኦሲኮ ዱማዼ ማኣሮ ታ ጌላንዳያ ሄላንዳኣና ጋፒንፆዋ ዔያቶኮ ታ ዛጋንዳያ ሄላንዳኣናኬ።

18 ጎኔና ሃሊፃ ቤስካ ኔ ዔያቶ ጌሤኔ፤ ባይሲንታ ባንሢያ ኔ ዔያቶ ኬይሴኔ።

19 ዔያታ ቤዞና ሩኡሪ ዎይቲ ባይቄይ? ዲቃቲ ጋፒ ዔያታ ኩዴኔ።

20 ዓሲ ዓውቲዳፓ ዲቃታዖ ዎኦታሢጉዲ ናንጊና ናንጋ ጎዳሢዮ! ኔኤኒ ዔቃ ዎዶና ባልባቲሢጉዲ ጉሪ ኔ ዔያቶ ማሃንዳኔ።

21 ማሊፃ ታኣኮ ሚርጌና ጫንቄኔ፤ ዒናኣ ታኣኮ ሜቄኔ።

22 ማሊሢባኣያና ዔሩዋ ዓሲያ ታ ማዔኔ፤ ኔ ቤርታ ቆልሞጉዲ ታ ማዔኔ።

23 ያዺ ማዔያታቴያ ቢያ ዎዴ ታ ኔኤና ዎላኬ፤ ኔኤኒያ ታኣኮ ሚዛቆ ኩጮ ዓርቄኔ።

24 ኔ ዞሪፆና ዔኪ ታና ኔ ዓኣዼኔ፤ ጊንፃፓ ኔ ታና ቦንቺሳንዳኔ።

25 ጫሪንጮይዳ ኔኤፓ ዓታዛ ታኣኮ ዖኦኒ ዓኣይ? ሳዖይዳ ኔ ጊዳፓ ሜሌ ታ ኮዓይ ባኣሴ።

26 ታኣኮ ዑፆንታ ዒኖንታ ላባኒ ዳንዳዓኔ፤ ፆኦሲ ጋዓንቴ ዒኖኮ ታኣኮ ዶዱማሢና ናንጊና ታኣሮ ማሂ ታ ዔኬሢኬ።

27 ዓካሪ ኔኤፓ ሃካዞንሢ ባይቃንዳኔ፤ ኔኤኒ ኔኤም ጉሙርቂንቱዋዞንሢ ቢያ ባይዛንዳኔ።

28 ታኣም ጋዓንቴ ፆኦሲ ባንሢ ዑኪሢ ኮይሳኔ፤ ናንጊና ናንጋ ጎዳ ጊቲማሢ ታኣኮ ታ ማሄኔ፤ ኔኤኮ ማዾ ዛሎዋ ታኣም ኬኤዛኒ ኮሺኬ።