Psalm 41 in Maale
1 ዓሲ ሃርጊንታዖ ሺኢቃ ሺኢጲሢ ማንቆ ዓሶ ማኣዳ ዓሳ ዓንጂንቴያኬ፤ ዔያታ ሜታዼ ዓቦና ናንጊና ናንጋ ጎዳ ዔያቶ ማኣዳኔ።
2 ዒዚ ዔያቶ ካፓኔ፤ ሼምፔናኣ ጌሣኔ፤ ሳዖይዳ ዔያቶ ዓንጃኔ፤ ዔያቶኮ ሞርኮማኣ ዓኣሢ ዒንጉዋሴ።
3 ሃርጊንቲ ዔያታ ላሃዛ ናንጊና ናንጋ ጎዳ ዔያቶ ማይሣኔ፤ ፓሢያ ዔያቶ ፓሣኔ።
4 ታኣኒያ፦ «ናንጊና ናንጋ ጎዳሢዮ! ታ ዻቤሢሮ ታና ሚጪንቲ ማኣሬ፤ ሃርጎይዳፓኣ ታና ፖዒሴ» ጌዔኔ።
5 ታ ሞርካ ታ ዑፃ ፑርቱሞ ጌስታዖ፦ «ዓይዲ ዒዚ ሃይቃንዳይ? ሱንፃ ዒዛኮ ሳዖይዳፓ ዋሊንታንዳሢ ዓይዲ ናንዳይ» ጋዓኔ።
6 ታና ዔያታ ዖኦጫኒ ሙካሢ ዒናፓቱዋሴ፤ ታ ዑፃ ፑርታ ባኣዚ ጌስታኔ፤ ዱማ ዱማ ቤዞ ሃንቲ ሃንቲ ሱንፆ ዔያታ ታኣኮ ፑርቲሳኔ።
7 ሞርካ ታኣኮ ዎላ ፔቴ ማዒጋፓ ታ ዑፃ ካሽካሻኔ፤ ፑርታ ታና ሄላንዳጉዲ ፑርቱሞ ማላኔ።
8 ዔያታ ማላዖ፦ «ዒዚ ሃርጊንቲ ሃይቃኒ ዑኬኔ፤ ማይ ላሄ ቤዛፓ ዒዚ ዔቃዓኬ» ጋዓኔ።
9 ታኣኮ ካሦ ታኣና ዎላ ሙዔሢ ታ ጉሙርቃ ዑኬ ማዔ ላጋሢ ዬይያ ዓቱዋዖ ሞርኬ ማዒ ታ ጊዳ ዔቄኔ።
10 ናንጊና ናንጋ ጎዳሢዮ! ኔኤኒ ጋዓንቴ ታና ሚጪንቴ፤ ታ ሞርኮ ኮሜ ታ ኮፃንዳጉዲ ታና ፓሤ።
11 ታ ሞርካ ታና ባሺፆና ዎዛዺ ዴዒንዱዋሴ፤ ዬያና ኔኤኒ ታና ናሽካያ ማዔሢ ታ ዔሬኔ።
12 ታኣኮ ፂሉሞሮ ኬልቂ ኔ ታና ዓርቄኔ፤ ናንጊና ኔ ኮራ ኔኤኒ ታና ናንጊሻንዳኔ።
13 ናንጊና ናንጊ ሄላንዳኣና ናንጊና ናንጋ ጎዳ ማዔ ዒስራዔኤሌ ፆኦዛሢ ጋላቲንቶንጎ! ዓኣሜን! ዓኣሜን!