Psalm 148 in Maale

1 ናንጊና ናንጋ ጎዳ ጫሪንጫፓ ጋላቱዋቴ! ሎ ዼጌ ጫሪንጫ ዓኣ ማዢንታ ናንጊና ናንጋ ጎዳሢ ጋላቱዋቴ።

2 ዒንሢ፥ ዒዛኮ ኪኢታንቻ ዒዛ ጋላቱዋቴ፤ ጫሪንጮይዳ ዓኣ ዒዛኮ ዖሎ ዓሳ ቢያ ዒዛ ጋላቱዋቴ።

3 ዓቦንታ ዓጊኖንታ ጋላቱዋቴ፤ ጫሪንጫ ፖዓ ዦኦጋሢያ ዒዛ ጋላቱዋቴ።

4 ሌካ ዼግ ጌይ ዓኣ ጫሪንጫ ዒዛ ጋላቱዋቴ፤ ዼጌ ቤዞኮ ዑፃ ዓኣ ዋኣፃኣ ጋላቱዋቴ።

5 ቢያ ባካ ናንጊና ናንጋ ጎዳ ጋላቶንጎ! ዒዚ ዓይሤም ዬይ ባካ ቢያ ማዢንቴኔ።

6 ኬስካ ዎዶይዳ ቢያ ላኣሚንቱዋ ዳምቤና ናንጊና ናንጋንዳጉዲ ማዢ ዶዲሺ ዔያቶ ዒ ጌሤኔ።

7 ባዞይዳ ዓኣ ዼኤፖ ቦዖንታ ኮሺ ዔታዻ ቁልቦ ዋኣፃኣ ቢያ ሳዓፓ ናንጊና ናንጋ ጎዳ ጋላቱዋቴ።

8 ዜኤሊንፃ፥ ዻኮ ሻጫ፥ ሻጮ ዼኤፖንታ ሻኣሮንታ ዒዛኮ ዓይሢፆ ማዺ ኩንሣ ዼኤፖ ዓልጋሢ ቢያ ናንጊና ናንጋ ጎዳ ጋላቱዋቴ።

9 ጌሜሮንታ ዹኮንታ ዓኣፓ ሙይንታ ሚፆንታ ዴኤሎ ካያ ዓኣ ሚፃኣ ቢያ ዒዛ ጋላቱዋቴ።

10 ካዮ ቦዖንታ ጋራ ዓኣ ቆልሞንታ ሳዖይዳ ጎቺንቲ ሃንታ ባኮንታ ጋኣዞና ባራና ባካ ቢያ ናንጊና ናንጋ ጎዳሢ ጋላቱዋቴ።

11 ካኣቶንታ ሳዖይዳ ዓኣ ዴራ ቢያ ቢታንታ ዓኣ ሱኡጎንታ ዎጎ ዎጋ ዓሳኣ ቢያ ዒዛ ጋላቱዋቴ።

12 ዓቲንቆ ዼጌሢንታ ዉዱራሢንታ ጋርቾንታ ናኣቶንታ ቢያ ዒዛ ጋላቱዋቴ።

13 ዒዛኮ ሱንፃ ሜሌ ሱንፆ ቢያፓ ባሻሢሮ ዒዛኮ ቦንቻ ሳዖና ጫሪንጮናፓ ባሼ ዼኤፒታሢሮ ቢያሢ ናንጊና ናንጋ ጎዳ ጋላቶንጎ!

14 ዒዛኮ ዒኖና ዎላ ቱኡቴያ ማዔ ዒዛ ዴሮ ዒስራዔኤሌ ዒዚ ዼጊዲ ቦንቺሴኔ፤ ጋላታ ጋላታንዳጉዲያኣ ዒዚ ዔያቶ ማሄኔ። ናንጊና ናንጋ ጎዳ ጋላቱዋቴ!