Psalm 102 in Maale

1 ሜታዼ ዓሲ ሺኢቃ ሺኢጲሢ ናንጊና ናንጋ ጎዳሢዮ! ሺኢጲፆ ታኣሲ ዋይዜ፤ ታኣኒ ዒላታ ዒላታ ኔ ኮራ ሄሎንጎ።

2 ታኣኒ ሜታዼ ኬሎና ዓኣፖ ኔኤሲ ታ ጊዳፓ ማሂፖ! ዋዮ ኔኤኮ ታ ባንሢ ማሄ፤ ታኣኒ ኔና ዔኤላ ኬሎና ሩኡሪና ታኣም ዬሄ።

3 ናንጎ ዎዳ ታኣኮ ጩቢጉዲ ዴንዲ ጋፓኔ፤ ሜጌፃ ታኣኮ ዓዳ ናኣቦጉዲ ዖይዼኔ።

4 ዒና ታኣኮ ቃኣያ ዎዼ ማኣቲጉዲ ሜሌኔ፤ ካሣ ሙኡዚያ ታ ዋሌኔ።

5 ታኣኮ ዒላታፓ ዔቄያና ዑፃ ታኣኮ ሜሊ ዓቴኔ።

6 ዓሳ ናንጉዋ ዳውሎይዳ ዓኣ ሙኡታሌ ታ ማሌኔ፤ ዶዔ ባዓ ቤስካ ዓኣ ኩኩቴ ማዔኔ።

7 ጊንዓ ባኣያ ታ ዎርቃኔ፤ ማኣሮኮ ሄላሢዳ ፔኤሮ ዓኣ ሚኢሻካፒ ታ ማዔኔ።

8 ሞርካ ታኣኮ ሮኦሮ ጉቤ ታና ሚኢጫኔ፤ ታና ፑርቲሳ ዓሳ ሱንፆ ታኣኮ ጋዳንቂንቴያ ማሂ ዛጋኔ።

9 ዲቢንሢ ታኣኒ ዺኢሊጉዲ ኩኡሌኔ፤ ዑዦ ታኣኮ ታኣኒ ዓቢፆና ሲኢሬኔ።

10 ኔኤኮ ጎሪንቶና ዻጎናፓ ዔቄያና ሌካ ታና ኔ ኬሴ ቤዛፓ ሊካ ኬኤሬኔ።

11 ናንጎ ሌዓ ታኣኮ ዓቢ ጌሊ ዔኤዤጉዲኬ፤ ታኣኒያ ማኣቲጉዲ ሹሌኔ።

12 ናንጊና ናንጋ ጎዳሢዮ! ኔኤኒ ጋዓንቴ ናንጊና ኔኤኮ ካኣቱሞ ዖይታ ዴዔኔ፤ ሱንፃ ኔኤኮ ሾይቲፓ ሾይንቲ ሄላንዳኣና ናንጋኔ።

13 ኔ ዔቃንዳኔ፥ ፂዮኔያ ሚጪንታ ዓኣፒና ዛጋንዳኔ፤ ዒዞም ኔኤኒ ኮሹሞ ኔኤሲ ዻዋ ዎዶ ማዔሢሮ ኔ ጌዔ ዎዳ ሄሌኔ።

14 ኔኤኮ ዓይላ ሹጮ ዒዞኮ ዛጊ ዎዛዻንዳኔ፤ ሳዖ ዓጮማኣ ሚጪንታንዳኔ።

15 ዴራ ናንጊና ናንጋ ጎዳሢ ሱንፆ ሳዖ ካኣታኣ ቢያ ቦንቾ ኔኤሲ ዒጊጫንዳኔ።

16 ናንጊና ናንጋ ጎዳ ፂዮኔ ጊንሣ ማሂ ማዣንዳኔ፤ ፔኤኮ ቦንቾና ፔጋዺ ጴዻንዳኔ።

17 ዒዚ ማንቆ ዓሶ ሺኢጲፆ ባንሢ ዛጋንዳኔ፤ ዔያታ ሺኢቃ ሺኢጲፆ ዒ ቦሃዓኬ።

18 ሃጊ ሾይንቲባኣ ዓሳ ዒዛ ጋላታንዳንጉዲ ሃያ ናንጊና ናንጋ ጎዳ ማዼ ዲቃሢ ሄርሺሳ ባኮ ሙካ ሾይንቶም ፃኣፑዋቴ።

19 ናንጊና ናንጋ ጎዳ ዼጌ ቤዛ ዓኣ ናንጎ ማኣራፓ ሊካ ዛጌኔ፤ ጫሪንጮይዳ ዓኣዖ ሳዖ ዛጌኔ።

20 ዬያ ዒ ማዼሢ ቱኡቴ ዓሶኮ ዒላቶ ዋይዛኒ ሃይቆም ዎጊንቴ ዓሶዋ ዓውሳኒኬ።

21 ዬያሮ ናንጊና ናንጋ ጎዳኮ ሱንፃ ፂዮኔይዳ ጋላታኣ ዬሩሳላሜይዳ ኬኤዚንታንዳኔ።

22 ዬይያ ዴሮንታ ካኣቶንታ ናንጊና ናንጋ ጎዳ ካኣሽካኒ ፔቱሞና ቡኪንታኣና ማዓንዳኔ።

23 ዶዱሞ ታኣኮ ጎይፃ ዓይሴኔ፤ ናንጎ ታኣኮ ዒ ዑኬና ጋፒሴኔ።

24 ዬካፓ ታኣኒያ፦ «ፆኦሲዮ ኔኤኒ ናንጋሢ ሾይንቲፓ ሾይንቲ ሄላንዳኣናታሢሮ ናንጎ ታኣሲ ታኣኒ ጋፒሲባኣንቴ ታ ናንጋ ሃጊ ዓኣ ጎይሣ ዓኣንቴ ታና ዔኪፖ» ጌዔኔ።

25 ኔኤኒ ሚና ቤርታ ሳዖ ማዤኔ፤ ጫሪንጫኣ ኔ ማዤሢኬ።

26 ዔያታ ባይቃንዳኔ፤ ኔኤኒ ጋዓንቴ ዶዲ ናንጋንዳኔ። ዬይ ቢያሢ ማኣዖጉዲ ጪንቃንዳኔ፤ ዓፒላጉዲያኣ ኔ ዔያቶ ላኣማንዳኔ፤ ዔያታ ቤዞና ኬኤሪንታንዳኔ።

27 ኔኤኒ ጋዓንቴ ኔናኬ፤ ሌዓኣ ኔኤኮ ፔቴታዖ ጋፑዋሴ።

28 ኔ ዓይሎኮ ናኣታ ዔያቶም ጊኢጌም ናንጋንዳኔ፤ ዜርፃ ዔያቶኮ ኔ ቤርታ ዶዲ ዴዓንዳኔ።