Proverbs 21 in Maale

1 ካኣቲኮ ዒና ናንጊና ናንጋ ጎዳ ኩጮይዳኬ፤ ናንጊና ናንጋ ጎዳ ዒዛ ዎታ ዋኣሢጉዲ ኮዔ ቤሲ ባንሢ ዔኪ ዓኣዻኔ።

2 ዓሲ ማዻ ባካ ቢያ ዬያ ማዻ ዓሢም ፒዜ ማላኔ፤ ናንጊና ናንጋ ጎዳ ጋዓንቴ ዓሲኮ ዒኖ ማሊፆ ዛጊ ዔራኔ።

3 ፆኦሲም ዒንጎ ባኣዚ ዒንጊሢዳፓ ባሼ ፒዜና ጎኔ ማዔ ባኣዚና ማዺሢ ናንጊና ናንጋ ጎዳ ዎዛሳኔ።

4 ፑርቶ ዓሳ ዔርታሢ ዖቶርሙሞና ሄርሺንቲናኬ፤ ዬይ ጎሜኬ።

5 ኮሺ ማሊ ቱኮና ቱኡሲና ማዺንታ ማዾ ሚርጌ ባኣዚ ጴዺሳኔ፤ ማሊሢ ባኣያ ሩኡሩሞና ማዾ ማዾ ጋዓንቴ ማማንቂሳኔ።

6 ሉኡዙሞና ጴዻ ቆሎ ባባይቃ ሱኡሌጉዴያ፤ ጊንሣ ሃሣ ዎዻ ፒሮጉዴያኬ።

7 ዋይዚ ዒፃ ዓሳ ኮሺ ማዔ ባኣዚ ማዺሢ ናሽኩዋኣሢሮ ዔያቶኮ ጌኖ ማዾና ዔያታ ባይቃኔ።

8 ጎሞ ዓሳ ዎቦ ጎይሢና ዓኣዻኒ ናሽካኔ፤ ዒኖ ጌኤዦ ዓሳ ጋዓንቴ ኮሺ ባኣዚ ማዻኔ።

9 ጎሪንቲ ሺራ ላኣሊና ዎላ ፔቴ ማኣሪዳ ናንጊሢዳፓ ማኣሮኮ ኮጮ ዙላ ናንጊሢ ቃራኬ።

10 ዋይዞ ዒፃ ፑርቶ ዓሳ ቢያ ዎዴ ፑርታ ባኣዚ ማዻኒ ናሽካኔ፤ ዓይጎ ዓሲማኣ ዔያታ ሚጪንቱዋሴ።

11 ቦሂ ዓማሊ ሺራ ዓሲ ሻርሺንታ ዎዶና ዔኤያ ዓሲ ዬያ ዛጋዖ ዔራቶ ዴንቃኔ፤ ጪንጫ ዓሲ ዔርዞ ዎዶና ባሼ ዔራ ማዓኔ።

12 ፂሎ ፆኦዛሢ ፑርቶ ዓሶ ማኣሮይዳ ማዾ ባኮ ቢያ ዛዛጋኔ። ፑርቶ ዓሶ ዒዚ ኬዲ ኬኤሪ ባይዛኔ።

13 ማንቆ ዓሲኮ ዒላቶ ዋይዛኒ ናሽኩዋ ዓሲ ዒዚያ ሜታዺ ዒላታ ዎዶና ዒዛ ማኣዳንዳ ዓሲ ዴንቂንዱዋሴ።

14 ዻጋዼ ዓሲም ዓኣቺ ዒንጎ ባኣዚ ዒንጊንታኣና ዻጋ ዒዛኮ ሺሺማኔ፤ ዴሚና ዓኣቺ ዒንጊንታ ዒንጊሢያ ዻጋ ጪኢሻኔ።

15 ፒዜ ዎጌ ዎጊንታ ዎዶና ኮዦ ዓሳ ዎዎዛዻኔ፤ ፑርቶ ዓሶ ጋዓንቴ ዲዲቃሣኔ።

16 ማሊ ጶቂሥሢዳፓ ሃካ ዓሲ ሃይቢ ካፓኔ።

17 ዔኤቢ ቃውቲሢ ናሽካ ዓሲ ማማንቃኔ፤ ዎይኔ ዑሺንታ ዛይቶ ቲዦንታ ናሽካ ዓሲ ዎይቴቴያ ዖርጎጩዋሴ።

18 ኮዦ ዓሶይዳ ሄላኒ ዓኣ ሜታሢ ፑርቶ ዓሶ ሄላኔ፤ ፒዜ ዓሶ ሄላኒ ዓኣ ሜታሢያ ጉሙርቂሢባኣ ዓሶ ሄላኔ።

19 ጎሪንቲ ሺራ ማቾና ዎላ ናንጊሢዳፓ ዓሲ ናንጉዋ ዳውሎይዳ ናንጊሢ ቃራኬ።

20 ጪንጫ ዓሲ ሚርጌ ቆሎንታ ሚርጌ ሚኢሼ ኬሳ ባኣዚንታ ፔ ማኣራ ቡኩሳኔ፤ ማሊ ጶቂሥሢ ፓጬ ዓሲ ጋዓንቴ ፔኤኮ ዓኣ ባኮ ቢያ ላኣሊ ባይዛኔ።

21 ፂሉሞና ናሹሞና ጋዓ ጊንፆ ማዻ ዓሲ ናንጊንታ ዖርጎቹሞንታ፥ ሃሣ ቦንቺንቲያኣ ዴንቃኔ።

22 ዖሎ ዓሶኮ ጪንጮ ሱኡጌ ዶዲ ዖላ ዓሲና ካፒንታ ካታሞ ዖሊ ባሺ ዓዓርቃኔ፤ ጉሙርቂንታ ዋርዲዮ ቤዞዋ ዶይሳኔ።

23 ሜቶይዳፓ ቶላኒ ኮዓ ዓሲ ፑርታ ጌስቲሢ ሃሻኔ።

24 ዖቶርቃያና ሄርሺንታያና ማዔ ዓሲ ቦኦዛኬ፤ ማዻ ዒዛኮ ዖቶርሙሞ ሌሊኬ።

25 ማዾ ማዻኒ ኮዑዋ ቤልፃ ዓሲ ፔና ዎዼ ዓሲ ማዒ ፓይዲንታኔ።

26 ቤልፃ ቢያ ዎዴ ኮዓሢ ሚርጌ ባኣዚ ዴንቃኒኬ፤ ኮሺ ዓሲ ጋዓንቴ ኮሹሞና ዒዒንጋኔ።

27 ዋይዞ ዒፃ ዓሳ ዒንጋ ዒንጊፃ ፆኦሲ ሻኣካያኬ፤ ዬያፓ ባሼ ፑርታ ማሊሢና ዔቂ ዒንጎ ዒንጊፃ ሚርጌና ዒዛ ዒሣያኬ።

28 ሉኡዚ ዓሲኮ ማርካቶ ዔውቱዋያ ማዓኔ፤ ኮሺ ማሊ ጌስታ ዓሲኮ ጌኤዛ ጋዓንቴ ጎናዻኔ።

29 ጎኔ ዓሲ ፔ ማዻ ባኮ ዛሎ ኮሺ ዔራኔ፤ ፑርታ ዓሲ ጋዓንቴ ዻቤዖ «ታ ዻቢባኣሴ» ጌይ ማዖ ዒፂ ዶዳኔ።

30 ዓሲ ፔ ዔራቶና ፔኤኮ ማሊ ጶቂሢፆና፤ ሃሣ ቱካ ቱኡዞና ናንጊና ናንጋ ጎዳ ቃዛኒ ዳንዳዑዋሴ።

31 ዖልዚ ዖሊሢሮ ፓሮ ጊኢጊሻኒ ዳንዳዓኔ፤ ባሺሢ ዒንጋሢ ጋዓንቴ ናንጊና ናንጋ ጎዳኬ።