Proverbs 15 in Maale

1 ሺኢቲ ጌስቲሢ ዻጋ ሺሚሻኔ፤ ዻጋ ዑኡሲ ጋዓንቴ ዻጎ ሃቺም ዶዲሻኔ።

2 ዔሮ ዓሲ ጌስታ ጌኤሲ፦ ዓሲ ዔራቶ ኮዓንዳጉዲ ማሃኔ፤ ዔኤያ ዓሲ ዻንጋፓ ጋዓንቴ ጉሪ ዔኤያቶ ባኣዚ ኬስካኔ።

3 ናንጊና ናንጋ ጎዳ ቢያ ቤስካ ማዺንታ ባኮ ጉቤ ዛጋኔ፤ ኮሺ ማዔቴያ ፑርታ ባኣዚ ማዺንታሢ ዒዚ ዴዴንቃኔ።

4 ኮሺ ጌኤሲ ናንጊኮ ዼኤሻኬ፤ ጌኔ ኩሜ ጌኤሲ ጋዓንቴ ዒኔ ሜንሣኔ።

5 ዔኤያ ዓሲ ፔ ዓዶኮ ዞሮ ቶቶኦቻኔ፤ ጎሪ ዞሮ ዞሮ ዔካሢ ጋዓንቴ ማሊ ጶቂሣ ዓሲኬ።

6 ኮሺ ዓሲኮ ማኣራ ሚርጌ ቆሎና ኩማኔ፤ ፑርቶ ዓሳ ዴንቃ ባካ ጋዓንቴ ሜቶ ዔያቶም ዔኪ ዬዓኔ።

7 ዔራቶ ዳልጊ ዴንዳሢ ጪንጮ ዓሶና ማዓንዳፓዓቴም ዔኤዮ ዓሶናቱዋሴ።

8 ናንጊና ናንጋ ጎዳ ጎሞ ዓሳ ዒዛም ዒንጋ ባኮ ሻሻኣኪንታኔ፤ ዒኖ ፒዜዞንሢኮ ሺኢጲፃ ጋዓንቴ ዒዛ ዎዎዛሳኔ።

9 ናንጊና ናንጋ ጎዳ ፑርቶ ዓሶኮ ጎይፆ ዒፃኔ፤ ፒዜ ማዻ ዓሶ ጋዓንቴ ዒ ናሽካኔ።

10 ፒዜ ማዔ ጎይፆ ሃሺ ዻቢንቲ ማዔ ባኣዚ ማዻሢ ሜቶ ዔካኔ፤ ጎሪ ዞሮ ዞሮ ዒፃሢያ ባይቃኔ።

11 ናንጊና ናንጋ ጎዳ ሃይቄ ዓሳ ዓኣ ቤዞንታ ባይሲንቶ ቤዞንታይዳ ዓኣ ባኮ ዛጋያ ማዔቴ ኑኡኮ ዒኖ ጋራ ዓኣሢ ዎይቲ ዒዚ ዛጊንዱዋይ?

12 ዔኤቢ ቦሂ ሺራ ዓሲ ዞሮ ናሽኩዋሴ፤ ዔሮ ዓሲዳፓ ዞሮ ዖኦጩዋሴ።

13 ዒና ዎዛ ዓኣፒ ካራ ፖዒሣኔ፤ ዒና ዖዪሢ ጋዓንቴ ጎጲ ዋኣፂሳኔ።

14 ማሊ ጶቂሣ ዒኔ ዓኣ ዓሲ ዔራቶ ኮኮዓኔ፤ ዔኤዮ ዓሳ ጋዓንቴ ፔ ዔኤያቶ ኮሺ ማሂ ዎዎዛዻኔ።

15 ሄርቂንቲ ዎርቃ ዓሶኮ ናንጋ ቢያ ዎዴ ሜቶናኬ፤ ዎዛዻ ዓሳ ጋዓንቴ ቢያ ዎዴ ፔ ናንጋ ጊኢጌም ናንጋኔ።

16 ዖርጎቺታዖ ዣሎና ናንጊሢዳፓ ማንቆ ማዒ ናንጊና ናንጋ ጎዳ ቦንቺ ናንጊሢ ኮሺኬ።

17 ዎሊ ዒፂሢ ዓኣ ቤስካ ማሊ ዓሽኪ ሙይሢዳፓ ናሹሞ ዓኣ ቤስካ ኮልፖ ሙይሢ ቃራኬ።

18 ጎሪንቲ ዣሎ ማዣኔ፤ ጊቢ ዳንዳዒሢ ጋዓንቴ ዑራ ጪጪኢሻኔ።

19 ቤልፃ ዓሲኮ ጎይሢ ሜቶ ዓንጊሢና ዲርቂንቴያኬ፤ ፒዜ ዓሲኮ ጎይፃ ጋዓንቴ ባኣሶና ዳልጊ ጎይሢጉዴያኬ።

20 ጪንጫ ናይ ፔ ዓዶ ዎዎዛሳኔ፤ ዔኤያ ናይ ጋዓንቴ ፔ ዒንዶ ቶኦቻኔ።

21 ማሊ ጶቂሥሢ ፓጬ ዓሳ ፔ ዔኤያቶና ዎዛዻኔ፤ ጪንጮ ዓሳ ጋዓንቴ ፒዜ ማዔ ባኣዚ ማዻኔ።

22 ኮሺ ዞሮ ኔ ዋይዚ ዔኬቴ ቢያ ባኣዚ ኔኤም ጊኢጋንዳኔ፤ ዞሮ ኔ ዋይዚባኣቴ ዓይጎ ባኣዚያ ኔኤም ጊኢጋዓኬ።

23 ኮይሳ ጌኤሲ ኮይሳ ቤስካ ጌስቲሢ ሚርጌና ዎዛሳኔ።

24 ጪንጮ ዓሳ ሌካ ዔኪ ዓኣዻ ሼምፓሢ ጎይፆ ዓኣዻኣፓዓቴም ሊካ ኬይሳ ሃይቢ ጎይፆ ዓኣዹዋሴ።

25 ናንጊና ናንጋ ጎዳ ዖቶርቃ ዓሶኮ ማኣሮ ባይዛኔ፤ ዜኤሮ ዒንዶኮ ዛጳ ሂዒንቱዋጉዲ ዒዚ ካፓኔ።

26 ናንጊና ናንጋ ጎዳ ፑርታ ማሊሢ ዒፃኔ፤ ጌኤሺ ማዔ ሃይሴና ጋዓንቴ ዒ ዎዛዻኔ።

27 ጋኣዶና ዔኤቢጊዳ ቃሲ ዴንቃኒ ኔኤኒ ማሌቴ ኔ ማኣሮ ዓሶ ሜቶይዳ ኔኤኒ ኬኤራንዳኔ፤ ዴሚና ዒንጎ ሚኢሼ ዔኪፖ፤ ሚርጌ ዎዴ ኔኤኒ ናንጋንዳኔ።

28 ኮሺ ዓሲ ጌስታንዳሢኮ ቤርታ ማማላኔ፤ ፑርቶ ዓሳ ጋዓንቴ ሩኡሩሞና ፑርታ ሃይሴ ጌስታኔ።

29 ናንጊና ናንጋ ጎዳ ፑርቶ ዓሶ ሺኢጲፆ ቄል ጋዓኔ፤ ኮዦ ዓሳ ዒዛ ሺኢቃዛ ጋዓንቴ ዒ ዋዋይዛኔ።

30 ዎዛዼ ዓኣፒ ካራ ዒና ዎዎዛሳኔ፤ ኮሺ ሃይሴያ ማሊሢ ዓካሲ ዶዲሻኔ።

31 ናንጊ ዒንጋ ዞሮ ዋይዚ ዔካሢ ዔሮ ዓሲኮ ላጌ ማዓኔ።

32 ጎሪ ዞሮ ዞሮ ዒፃሢ ፔና ሜቶይዳ ዓጋኔ፤ ጎሪ ዞሮ ዞሮ ዔካሢ ጋዓንቴ ዔራቶ ቃሳኔ።

33 ናንጊና ናንጋ ጎዳ ዒጊጪሢ ዔራቶ ዴንቂሢኬ፤ ቦንቾ ዴንቃኒ ቤርታዺ ሼሌዔ ማዓኒ ኮይሳኔ።