Proverbs 11 in Maale

1 ዴኤሡሞ ዔሮ ባኮና ጌሺ ሺራ ዓሶ ናንጊና ናንጋ ጎዳ ዒፃኔ፤ ዴኤሡሞ ዔሮ ባኮና ፒዜ ማዻ ዓሶና ጋዓንቴ ዒዚ ዎዛዻኔ።

2 ዖቶርሙሞ ዻዻውሲሳኔ፤ ሼሌዑሞ ጋዓንቴ ዔራቶ ዴንቂሳኔ።

3 ፂሉሞ ዓርና ማዒ ፒዜ ዓሶ ዔኪ ዓኣዻኔ፤ ጉሙርቂንቱዋ ዓሶ ጋዓንቴ ዔያቶኮ ዎቡማ ባይዛኔ።

4 ኔኤኒ ሃይቃኒ ዑኬ ኬሎና ቆላ ኔኤኮ ኔና ፓሣዓኬ፤ ፂሉሞ ጋዓንቴ ሃይቢዳፓ ዓውሳኔ።

5 ኮሹሞ ኮሺ ዓሲኮ ናንጎ ፒዚሳኔ፤ ፑርታ ዓሲ ጋዓንቴ ፔ ፑርቱሞና ሎኦማኔ።

6 ፒዜ ዓሲ ፔ ኮሹሞና ዻቃኔ፤ ጉሙርቂንቱዋ ዓሲ ጋዓንቴ ዒዛኮ ፑርቶ ማሊፃ ፒሮ ማዒ ዒዛ ዓርቃኔ።

7 ፑርታ ዓሲ ሃይቃኣና ዒዛኮ ሃጊ ማዓ ዎዛ ዒዛና ዎላ ሃይቃኔ፤ ጊንሣ ዒዚ ፔ ዎልቆና ሄርሺንታ ሄርሺንታኣ ዒዛና ዎላ ባይቃኔ።

8 ፂሎ ዓሲ ሜቶይዳፓ ዻቃኔ፤ ዬይ ሜታ ጋዓንቴ ፑርቶ ዓሶ ሄላኔ።

9 ናንጊና ናንጋ ጎዳ ካኣሽኩዋ ዓሳ ፔ ጌኤዞና ዓሲ ባይዛኔ፤ ፂሎ ዓሳ ጋዓንቴ ዔራቶና ዻቃኔ።

10 ፂሎ ዓሶም ቢያ ባካ ጊኢጋዛ ካታሞይዳ ዎዛ ማዓኔ። ፑርቶ ዓሳ ሃይቃኣና ዒላሺሢ ሚርጋኔ።

11 ጎኔ ዓሳ ዓንጂንቴ ዓንጆ ዛሎና ካታማ ዲጪ ዲጪ ዴንዳኔ፤ ፑርቶ ዓሶኮ ፑርቶ ጌኤዛ ጋዓንቴ ባይሲንታይዳ ጌልዛኔ።

12 ቦሂ ጌስቲ ዓሲ ዻውሲሳሢ ማሊሢ ፓጬ ዓሲኬ፤ ማሊ ጶቂሣ ዓሲ ጋዓንቴ ዚቲ ጋዓኔ።

13 ዾንኮ ዾንካ ዓሲ ጌኤሲ ዒና ዓርቁዋሴ፤ ጉሙርቂንታ ዓሲ ጋዓንቴ ዬያጉዴ ጌኤዞ ዒና ዓኣቺ ዓርቃኔ።

14 ዞራ ዓሲባኣ ካኣታ ሎሎኦማኔ፤ ሚርጌ ዞራ ዓሲ ዓኣ ካኣቶ ጋዓንቴ ሜታ ሄሉዋሴ።

15 ኔ ዔሩዋ ዓሲኮ ጋሌ ጪጋኒ ዋኣሴ ማዔቴ ሜቶይዳ ኔኤኒ ኬዳንዳኔ፤ ጋዓንቴ ዋኣሶ ኔ ማዑዋ ዓቴቴ ኮሺ ኔኤም ማዓንዳኔ።

16 ሚጪንታ ኮሺ ላኣሊ ቦቦንቺንታኔ፤ ዎልቄና ፑርታ ማዻ ዓሲ ቆሎ ሌሊ ዴንቃኔ።

17 ሚጪንታ ዓሲ ኔኤኒ ማዔቴ ኔና ኔ ማኣዳኔ፤ ጌኔ ማዻ ዓሲ ኔኤኒ ማዔቴ ኔና ኔ ሜቶይዳ ዓጋኔ።

18 ፑርታ ዓሲ ዴንቃንዳ ባኣዚ ባኣሴ፤ ፒዜ ማዔ ባኣዚ ኔ ማዼቴ ኔኤኮ ኮዦ ማዾ ዛሎ ዒንጎ ባኮ ኔ ዴንቃንዳኔ።

19 ኮሺ ማዾ ዒናፓ ማዻ ዓሲ ሼምፔና ናንጋኔ፤ ፑርቱሞ ማዺ ሺራ ዓሲ ጋዓንቴ ሃይቃኔ።

20 ናንጊና ናንጋ ጎዳ ዒኖ ዎቦ ዓሶ ሻሻኣኪንታኔ፤ ቦሂሳ ባኣዚባኣ ጎይሢና ዴንዳ ዓሶና ዎዛዻኔ።

21 ፑርቶ ዓሶ ጎኔና ሜታ ሄሊሢ ዓቱዋያኬ፤ ኮዦ ዓሶ ዜርፃ ጋዓንቴ ሜቶፓ ዻቃኔ።

22 ማሊ ጶቂሥሢ ፓጬ ሚዛጶ ላኣሌላ ዒዞኮ ሚዛጱማ ጉዱንሢኮ ሲኢዾይዳ ዎርቄ ዱንዶ ዓኣሥሢጉዲኬ።

23 ፂሎ ዓሶኮ ማሊፃ ኮሺና ኩማያኬ፤ ፑርቶ ዓሶ ማሊፃ ጋዓንቴ ባይሲንታ ዔኪ ሙካኔ።

24 ፔቴ ፔቴ ዓሳ ኮሹሞና ሚኢሾ ፔኤኮ ዒንጊ ላኣላኔ፤ ጋዓንቴ ቆላ ዔያቶኮ ሚርጊ ሚርጊ ዓኣዻኔ፤ ሃንጎ ዓሳ ሃሣ ፔኤኮ ሚኢሾ ዑሣ ዓኣዼ ዱኡዻዻኔ፤ ጋዓንቴ ማንቁማ ዔያቶኮ ሚርጊ ሚርጊ ዴንዳኔ።

25 ኮሹሞና ዒንጋያ ማዔ፤ ኔኤኒ ዖርጎጫንዳኔ፤ ሜሌ ዓሶ ማኣዴ፤ ኔኤኒያ ማኣዲንታንዳኔ።

26 ቆኦዙሚ ጌሢ ዺቢ ሚኢሼም ሻንቻኒ ሃኣኮ ናቲ ጌሣ ዓሲ፥ ዴራ ዒዛ ጋዳንቃያ ማዓኔ፤ ጋዓንቴ ሃኣኮ ቦኦኮ ኬሳ ዓሢ ዴራ ጋላታያ ማዓኔ።

27 ኮሺ ባኣዚ ዶዲ ኮዓሢ ኮሺ ባኣዚ ዴንቃንዳኔ፤ ፑርታ ባኣዚ ማዻሢ ጋዓንቴ ፑርታ ሄላንዳኔ።

28 ፔ ቆሎና ጉሙርቂንታ ዓሳ ዒላሺጉዲ ዲኢናኔ፤ ጎኑሞ ዓኣ ዓሳ ጋዓንቴ ቱኮና ኮሺ ሚሢጉዲ ዓኣዓኔ።

29 ፔ ማኣሮይዳ ዣሎ ማዣ ዓሲ ዬይ ማኣዳንዳ ባኣዚ ባኣሴ፤ ዔኤዮ ዓሳ ቢያ ዎዴ ዔሮ ዓሶም ማዻያ ማዓኔ።

30 ፂሎ ዓሶኮ ማዻ ናንጊና ናንጊ ዴንቂሳኔ፤ ዋይዚ ዒፂሢ ጋዓንቴ ሼምፖኮ ባይሲንታ ካራ ማዓኔ።

31 ኮዦ ዓሳ ሳዖይዳ ዓኣዖ ኮዦ ማዾ ዛሎ ዒንጎ ባኮ ዴንቃኔ፤ ፑርቶ ዓሶንታ ጎሞ ዓሶንታ ጋዓንቴ ሚርጌ ዶዲ ሜቶ ዔካኔ።