Micah 4 in Maale

1 ጋፒንፆ ዎዶና ናንጊና ናንጋ ጎዳኮ ጌኤዦ ማኣራ ማዢንቴ ዹካ ሜሌ ዹኮ ቢያይዳፓ ዑሣ ባሺ ጴዻንዳኔ፤ ጌሜሮ ጉቤሢዳፓኣ ኮሺ ዼግ ጋዓንዳኔ፤ ሜርጌ ዴሮ ካኣታ ዒዛ ባንሢ ጎዓንዳኔ።

2 ዬያሮ ዴራ ሚርጌሢ፦ «ዎጌ ፂዮኔይዳፓ፥ ናንጊና ናንጋ ጎዳኮ ቃኣላ ዬሩሳላሜይዳፓ ጴዻሢሮ ሃኒ ሙኩዋቴ፥ ናንጊና ናንጋ ጎዳኮ ዹኮ ኑኡኒ ኬስኮም፤ ያይቆኦቤ ፆኦሲኮ ጌኤዦ ማኣሪ ኑ ዓኣዾም፤ ዒዚ ፔ ማሊፆ ኑ ኩንሣንዳጉዲ ኑና ዔርዛንዳኔ፤ ኑኡኒያ ዒዛ ጎይፆ ዴንዳንዳኔ» ጋዓንዳኔ።

3 ዒዚ ሚርጌ ሜሌ ዴሮ ባኣካ ዎጋንዳኔ፤ ሃኬና ዑኬናይዳ ዓኣ ዼኤፖ ካኣቶ ባኣካ ዓኣ ዱማዺፆ ፔቴ ማሂ ጊኢጊሻንዳኔ፤ ዬያሮ ዔያታ ፔኤኮ ጬንቾ ዓፓሮ ማራሻ ዎርፆዋ ዔያታ ባኣቺ ማሂ ዹይሳንዳኔ። ካኣታ ዎሊዳ ዖልዚ ዔቂሳዓኬ፤ ዬካፓ ዖልዚ ዖሎ ጎይሢ ዔራኒ ኮዓንዳ ዓሲያኣ ባኣሴ።

4 ፔቴ ፔቴ ዓሳ ፔ ቱኬ ዎይኖና ቤሌሶ ሚፆኮ ሺባ ዴይ ኮሺና ሃውሻንዳኔ፤ ዔያቶ ዒጊቻንዳ ባኣዚያኣ ባኣሴ፤ ቢያ ባኮ ዎይሣ ጎዳሢ ዬያ ጌዔኔ።

5 ሜሌ ዴራ ቢያ ፔኤኮ ሜሌ ሜሌ ፆኦዞ ካኣሽካንዳኔ፤ ኑኡኒ ጋዓንቴ ናንጊና ናንጋ ጎዳ ማዔ ኑ ፆኦዛሢ ካኣሽኪ ናንጋንዳኔ።

6 ናንጊና ናንጋ ጎዳ፦ «ዬኖ ኬሎና ዎቦ ዓሶንታ ታኣኒ ሜቶ ዔያቶይዳ ዓጌም ዳውሲንቲ ዴንዲ ሜታኣ ኬዴ ታ ዴሮ ታኣኒ ቡኩሳንዳኔ።

7 ዎቦ ዓሳ ፒኢጫዺ ዓታንዳጉዲ ታ ማሃንዳኔ፤ ዋሊንቲ ዓኣዞንሢያ ዶዲ ዴሬ ታኣኒ ማሃንዳኔ፤ ታኣኒያ ፂዮኔ ዹኮይዳ ዬኖ ኬላፓ ዓርቃዖ ናኣናና ዔያቶ ዑፃ ካኣታዻንዳኔ» ጋዓኔ።

8 ኔኤኒ ዒዛኮ ቆልሞ ዴዒ ሄንቆ ሴኤላሢዮ! ፂዮኔ ዉዱሮ ናኣቶኮ ጌሜራሢዮ! ኔኤኒ ሚና ዎይሣ ዓጫ ኔኤም ማዓንዳኔ፤ ኔኤኮ ካኣቱሞ ቢታንታኣ ጊንሣ ማዓንዳኔ።

9 ሃያይዲ ዼጊዲ ኔኤኒ ዒላታሢ፥ ሾይቺ ዓርቄ ላኣሊጉዲ ኔኤኒ ሜታዻሢ ዓይጎሮዳይ? ኔኤኮ ካኣቲ ባኣሢሮዳ? ሃንጎ ኔኤኮ ዞራ ዓሳ ቢያ ባይቄሢሮዳ?

10 ዬሩሳላሜ ዴሬዮቴ! ሾይቺ ዓርቄ ላኣሊጉዲ ሜታዹዋቴ፤ ሃሢ ዒንሢ ካታማፓ ዳውሲንቲ ኬስኪ ቦኦላ ዱንኪ ዴዓንዳኔ፥ ባብሎኔ ዓጮዋ ዒንሢ ዴንዳንዳኔ፤ ዒኢካ ናንጊና ናንጋ ጎዳ ዒንሢ ዻቂሻንዳኔ፤ ሞርኮ ኩጫፓኣ ዒንሢ ዒ ዓውሳንዳኔ።

11 ሃሢ ጋዓንቴ ሚርጌ ሜሌ ዴሬ ዒንሢ ባይዛኒ ቡኪንቲ፦ «ዬሩሳላሜ ዒኢቴያ ማዖንጎ! ኑ ዒዞኮ ሻሂንቲ ባይቂፆ ዛጎም!» ጋዓኔ።

12 ዬያታ ዴራ ጋዓንቴ ናንጊና ናንጋ ጎዳኮ ማሊፆ ዔሩዋሴ፤ ሺርኪንታ ሃኣኮ ቆይዳይዳ ኩሊንታሢጉዲ ዒዚ ዔያቶ ቡኩሲ ሜታሳኒታሢ ዔያታ ዔሪባኣሴ።

13 ናንጊና ናንጋ ጎዳ፦ «ዒንሢ ዬሩሳላሜ ዴራ! ዓኣዺጋፓ ዒንሢኮ ሞርኮ ዓዳ ሃኣኮጉዲ ሺርኩዋቴ! ጉራና ዓንጊ፥ ሄርቃ ሹቁላ ሞኦና ዓንጊ ማዔ ጌማይጉዲ ዒንሢ ታኣኒ ዶዲ ማሃንዳኔ፤ ሚርጌ ሜሌ ዴሮኮ ካኣቶ ዒንሢ ጋኣጫንዳኔ፤ ዔያታ ጌኔ ጎይሢና ቡኩሴ ቆልሞንታ ቆሎዋ ቢያ ዓጮ ቢያኮ ጎዳ ማዔ ታና፥ ፆኦሲም ዒንሢ ዔኪ ሺኢሻንዳኔ» ጋዓኔ።