Lamentations 3 in Maale

1 ፆኦሲኮ ዻጎ ኮኦሎና ጳዺንቲ ሜቶ ዛጌ ዓሲ ታናኬ።

2 ዒዚ ፔ ቤርታፓ ታና ፔቴታዖ ፖዒባኣ ዹሚ ቤሲ ዳውሲ ዳኬኔ።

3 ኬስኬ ዓባ ጌሊ ካራንዳኣና ታና ሌሊ ዒዚ ጳርቄ ጎይሣ ዴዔኔ።

4 ዒዚ ታኣኮ ዑፆ ዓሽኮንታ ዒልዖንታ ጋርቺሴኔ፤ ሜጌፆዋ ታኣኮ ሜንሤኔ።

5 ዒናፓ ዻጋሳ ዻጋና ላቢሢና ታጊዳ ዳኪ ታና ማንጊሴኔ።

6 ሃይቄዖ ሚርጌ ናንጌ ዓሲጉዲ ዹሚዳ ታና ዴይሢ ሃሼኔ።

7 ኮይሎ ታኣኮ ዒዚ ዲርቄሢሮ ቶላኒ ታ ዳንዳዒባኣሴ፤ ካኒ ቢራታና ታና ዒ ቱኬኔ።

8 ታና ዒ ማኣዶም ታኣኒ ዒላቴቴያ ታኣሲ ዋይዛኒ ዒዚ ኮዒባኣሴ።

9 ጎይፆ ታኣኮ ዓርሲንቴ ዼኤፒ ዼኤፒ ሹቺና ዲርቄኔ፤ ታኣኒ ዴንዳ ካሮዋ ሺርሺ ዎቢሴኔ።

10 ዒዚ ታና ሙዓኒ ካቲ ዓኣ ዲቤ ጌይንታ ቦዖጉዲ፤ ጊንሣ ሃሣ ታና ዎዻኒ ጊኢጊ ዔቄ ዞቢ ማዔኔ።

11 ጎይፃፓ ታና ጎቺ ዔኪ ሺኢሺ ሾኦሌኔ፤ ታና ማኣዳያኣ ባኣያ ማሂ ሃሺ ዴንዴኔ።።

12 ፔ ሂኢዦና ታና ዱካኒ ዓኣሤኔ፤ ሆቲና ታና ዱኪ ዓይዲሳኒ ዒ ጊኢጌኔ።

13 ሂኢዦና ሳዞ ታኣኮ ቂርፂዲ ዱኬኔ።

14 ታ ዴሮኮ ታኣኒ ሚኢቺ ባኣዚ ማዔኔ፤ ዔያታ ኮርጋ ኬሎ ዴንዲ ዚሮ ሄላንዳኣና ታና ቦሂ ቦሂ ኮርጋኔ።

15 ሜቶ ታጊዳ ዺቢሲ ናንጎ ታኣኮ ጫንቂሴኔ፤ ታና ዒዚ ዋላንጋ ላይሲ ሚሼኔ።

16 ቃንፆ ታና ዻይሲ ዓጮ ታኣኮ ሜንሤኔ፤ ሳዖ ሲላሎይዳኣ ታና ሂዒ ኬኤሬኔ።

17 ታኣኮ ሼምፓሢ ኮሹሞ ጋዓ ባኣዚ ዴንቃኒ ዳንዳዒባኣሴ፤ ዎዛ ጎዖ ባኣዚ ዓይጎታቴያ ታኣም ጶቁዋሴ።

18 ዬያሮ ታኣኒ፦ «ቦንቻ ታጊዳፓ ዴንዲ ባይቄኔ፤ ናንጊና ናንጋ ጎዳ ታኣም ሃጊ ዒንጋንዳኣዋይ ታ ጋዓ ባካ ቢያ ሙኪ ታና ሄላ ካራ ባኣያ ማዒ ዓቴኔ» ጌዔኔ።

19 ታኣኮ ሜቶና ካሮ ባይቂፆና ዛሎ ማሊፃ ዓዳ ዋላንጋና ጪሼናጉዲ ታኣም ጫንቄኔ።

20 ዬያ ዛሎ ቢያ ዎዴ ታኣኒ ማላኣና ዒና ታኣኮ ኮሺ ዖያኔ።

21 ጋዓንቴ ፔቴ ታኣኒ ማላ ባኣዚ ዓኣኔ፤ ዬኖ ታ ማላማና ሃጊ ማዓንዳ ዎዛና ዒና ታኣኮ ሃውሻኔ።

22 ዬና ዓይጎዳይ ጌዔቴ፦ ኑኡኒ ባይቁዋዖ ሼምፔና ዓቲ ዓኣሢ ናንጊና ናንጋ ጎዳኮ ሚጪንቲፃ ፔቴታዖ ጋፑዋያ ናሹማኣ ናንጊና ናንጋያ ማዔሢሮኬ።

23 ዬይ ሚጪንቲፃ ኬላ ኬላ ዓካዻኔ፤ ናንጊና ናንጋ ጎዳ ማዔ ኔኤኮ ጉሙርቂንቲፃ ዼኤፒኬ።

24 ናንጊና ናንጋ ጎዳ ታኣኮ ጊሽኮና ጊሺ ማዔሢሮ ዒዛ ሌሊ ታኣኒ ጉሙርቃንዳኔ።

25 ዒዛ ጉሙርቂ ሃጋኣ ዎዛ ዒዛይዳ ጌሣዞንሢና ዒዛ ኮዓዞንሢናም ዒዚ ኮሺኬ።

26 ዓሲ ዚቲ ጋዓዖ ናንጊና ናንጋ ጎዳ ዻቂሻ ዻቂሺፆ ጉሙርቂ ካፔያታቴ ቃራኬ።

27 ዓሲ ዼጌ ዓኣዖ ሜቶ ጊቢ ዳንዳዒ ዔኬቴ ኮሺኬ።

28 ናንጊና ናንጋ ጎዳ ዒዛይዳ ሜቶ ዓጋኣና ዚቲ ጌይ ፔኤሮ ዒ ዴዔቴ ቃራኬ።

29 ሃጊ ጊንሣ ኮሺ ባኣዚ ሙካኒ ዳንዳዓሢሮ ሳዓ ባሊቲና ላሂ ናንጊና ናንጋ ጎዳም ዓይሢንቲ ዎርቆንጎ።

30 ባዓሢም ጋንጋሮ ዻዊ ሃሾንጎ፤ ጫሺታቴያ ዔዔኮንጎ።

31 ናንጊና ናንጋ ጎዳ ዬያ ቢያ ማዼቴያ ናኣናና ኬንኬሊዲ ዓሲ ሃሹዋሴ።

32 ዎዚ ዓሲዳ ፑርታ ባኣዚ ሄላንዳጉዲ ዒዛ ማሊሢ ማዔቴያ ዒዛኮ ዑሣ ዓኣዼ ዺቦ፥ ናንጊና ናንጋ ናሹሞና ዓሲም ዒዚ ሚሚጪንታኔ።

33 ዬይ ያዺ ማዓሢ ዒዚ ፔ ሼኔና ዓሲዳ ሜቶና ዖዪሢና ሄሊሱዋኣሢሮኬ።

34 ዓጬሎይዳ ቢያ ቱኡቲ ዓኣ ዓሳ ቢያ ጌኔ ጎይሢና ሄርቂንታሢ፥

35 ዼኤፖ ፆኦዛሢ ዛጋንቴ ዓሲኮ ቶኦኪ ባይዞሢ፥

36 ፔቴ ዓሲኮ ጌኤሲ ዎቦ ጎይሢና ዎጊንታሢ ጎኔና ናንጊና ናንጋ ጎዳ ሃያ ባኮ ዛጉዋዓዳ?

37 ናንጊና ናንጋ ጎዳ ቤርታ ማሊ ቱኪባኣ ባኣዚታቴ ዒዛ ዓይሢ ፔቴ ባኣዚታዎ ማዺሻኒ ዳንዳዓ ዓሲ ዖናዳይ?

38 ፑርታ ባኣዚታቴያ ኮሺ ባኣዚ ማዺንታሢ ዼኤፖ ፆኦዛሢ ዓይሤምኬ።

39 ሂዳዖ ዓካሪ ሼምፔና ዓኣ ዓሲ ፔ ጎሞና ሜቶ ዔካዖ ጉንዱማሢ ዓይጎሮዳዖ?

40 ኑ ሃንታ ሃንቲፆ ማሂ ኑ ዛጎም፤ ናንጊና ናንጋ ጎዳ ባንሢ ኑ ማዖም።

41 ኑኡኮ ዒኖ ኑ ኩጮና ዎላ ጫሪንጫ ዓኣ ኑ ፆኦዛሢ ባንሢ ኑ ዔቂሲ፥ ሂዚ ኑ ጎዖም፦

42 «ኑ ፆኦዛሢዮ! ኑኡኒ ኔኤም ዋይዞ ዒፂ ጎሜ ማዼኔ፤ ኔኤኒ ኑና ማኣሪባኣሴ።»

43 «ዻጋዺ ፑኡካኒ ዑኪ ኑና ኔ ዳውሴኔ፤ ማኣሚቃይዶ ኑና ኔ ዎዼኔ።

44 ኑ ሺኢጲፃ ሙኪ ኔና ሄሉዋጉዲ ዲም ጌዔ ሻኣሬና ኔና ኔኤኒ ዓኣቼኔ።

45 ዴሮ ባኣኮይዳ ቡኡራጉዲ ኔ ኑና ላኣሊ ሃሼኔ።»

46 «ኑኡኮ ሞርካ ቢያሢ ኑና ጫሽኪ ጫሽኪ ሚኢጪ ኑና ዓማሌኔ።

47 ዒጊቹሞና ባይሲንታና ሜቶንታ ሂርጋንታ ሙኪ ኑና ሄሌኔ።

48 ታኣኮ ዴሮይዳ ሄሌ ባይሲንቶ ዛሎ ዓቢሢ ታኣኮ ዓኣፓፓ ዎርዚ ዋኣሢጉዲ ጎዓኔ።»

49 «ዓኣፓ ታኣኮ ሃውሾ ባኣያ ዬኤካኔ።

50 ዬይ ያዺ ማዒ ዴዓንዳሢ ናንጊና ናንጋ ጎዳ ጫሪንጫፓ ሊካ ዛጊ ዴንቃንዳያ ሄላንዳኣናኬ።

51 ታኣኮ ካታሞይዳ ዓኣ ዉዱሮ ናኣቶ ቢያሢዳ ሄሌ ባኮ ዛሎና ታኣኒ ካራ ባይቂ ታ ዒኖና ማሊ ሜታዼኔ።»

52 «ጉሪ ታና ዒፃ ሞርካ ካፒም ፒሮ ፒሮጉዲ ታኣም ፒሬኔ።

53 ታኣኒ ሃይቂባኣንቴ ዔቴይዳ ታና ዓጊ ዔቶ ካሮ ሹቻ ዔያታ ዎዼኔ።

54 ዋኣሢ ታኣኮ ዑሢና ኩሚ ዴንዳኣና ታኣኒ ሃይቃንዳ ዎዳ ዑኬያ ታኣም ማሌኔ።»

55 «ናንጊና ናንጋ ጎዳሢዮ! ዼኤፖ ዔቶይዳ ታኣኒ ጌሊ ዓኣዖ ኔና ሺኢቄኔ።

56 ታኣኒ፦ ‹ዋዮ ኔኤኮ ታ ባንሢ ማሄ፤ ዑኬና ሙኪ ታና ማኣዴ› ጌይ ሺኢቃሢ ኔኤኒ ዋይዜኔ።»

57 ታኣኒ ኔና ዔኤሌ ዎዶና ኔኤኒ፦ «ዒጊጪፖ!» ጌይ ታና ዶዲሼኔ።

58 «ናንጊና ናንጋ ጎዳሢዮ! ኔኤኒ ታ ዛሎ ሞኦቲ ታና ኔኤኒ ዓውሴኔ።

59 ናንጊና ናንጋ ጎዳሢዮ! ታኣም ማዾና ጌኖ ቢያ ኔኤኒ ዛጌሢሮ ታኣም ጌስቲ ዎጌ።

60 ታኣኮ ሞርካ ታና ኮማኒ ዎላ ጌስቲ ቱኬ ቱኡዞ ኔኤኒ ዴንቄኔ።»

61 «ናንጊና ናንጋ ጎዳሢዮ! ታና ዔያታ ጫሽኬ ጫዦና ታኣም ዔያታ ማሌ ጌኖ ኔ ዋይዜኔ።

62 ኬስኬ ዓቢ ዴንዲ ጌሊ ካራንዳያ ሄላንዳኣና ሞርካ ታና ባይዞንዶ ጎይፆ ዎላ ካሽካሺ ጌስታኔ።

63 ዔያታ ዴዒያ ማዖም ዔቂ ቶሳ ቶሶና ታና ጫርጋ ጫጮ ዔያቶኮ ዛጌ።»

64 «ናንጊና ናንጋ ጎዳሢዮ! ዔያታ ማዼ ባኮ ዛሎ ኮይሳማጉዴያ ማሂ ዔያቶም ዒንጌ።

65 ዔያቶ ጋዳንቂ ካራ ዔያቶኮ ባይዜ!

66 ናንጊና ናንጋ ጎዳሢዮ! ኔ ዻጎና ዔያቶ ዳውሴ፤ ጫሪንጮ ዴማፓ ጋፒሲ ዔያቶ ኩርሴ!»