Job 7 in Maale

1 «ዓሲኮ ናንጊ ሳዖይዳ ዶዲ ማሹምቦቱዋኣዓዳ? ኬላ ዔያቶኮ ማዾ ማዼም ዓጊኒና ጪጎ ኬሎ ጉዲቱዋኣዓዳ?

2 ዔያታ ሺቢ ዴንካ ሃውሻኒ ኮዓ ማዾ ማዻ ዓሲና ማዼሢ ዛሎ ጪጎ ሚኢሾ ዔካኒ ካፓ ማዻዞንሢጉዲ ቱዋኣዓዳ?

3 ታኣኒ ላቤ ዓጊና ታና ማኣዱዋኣያ ማዔኔ፤ ታኣኮ ሜታሢ ዒባኖንሢ ታኣም ዋኣዪሢ ዋንታ ማዔኔ።

4 ታኣኒ ላሃ ዎዶና ዓይዶ ካሬም ታ ዔቃንዳይ ጋዓኔ፤ ጋዓንቴ ዋንታ ታኣም ዖዶቃኔ፤ ካራንዳያ ሄላንዳኣና ጉሪ ሺሪ ሺሪ ታ ላሃኔ።

5 ዑፃ ታኣኮ ቢያ ዛኣሌ ኩሜኔ፤ ዓሽካ ታኣኮ ጎኦጌ ዒልዒ ሌሊ ማዔኔ፤ ዹኡቂያኣ ጊኢሽኬኔ።

6 ታኣኮ ናንጎ ሌዓ ሃርፖኮ ሞኮኬይዳፓ ባሼ ሩኡራኔ፤ ፔቴታዖ ሃጊ ማዓንዳ ዎዛ ባኣያ ማዒ ጋፒንፆ ሄላኔ።

7 ፆኦሲዮ! ታኣኮ ሼምፓሢ ዑኡሲ ዔኪሢፓ ቃሚቄሢ ማሌ፤ ሃካፓ ሴካ ፔቴታዖ ኮሺ ባኣዚ ታ ዛጋዓኬ።»

8 «ሃሢ ታና ዛጋሢ ላሚ ዛጋዓኬ፤ ኮዔቴያ ዒ ታና ዴንቃኒ ዳንዳዑዋሴ።

9 ሻኣሬ ላኣሊንቲ ባይቃሢጉዲ ሃይቂ ዱኡኪንታ ዓሲ ማዒ ጊንሣ ሙኩዋሴ፤

10 ጊንሣ ሃሣ ፔ ማኣሪያ ማዑዋሴ፤ ዒዛ ዔራ ዓሳኣ ቢያ ዒዛ ዋላኔ።

11 ማይ ሃካፓ ሴካ ታኣኒ ዚቲ ጋዓዓኬ! ታኣኮ ዓያኖ ዋኣዪፆይዳፓ ዔቄያና ታ ኬኤዛኔ፤ ሼምፓሢ ታኣኮ ሜታዼሢሮ ታ ጉንዱማኔ።»

12 «ሃያይዲ ኔ ታና ካፖ ዓሲ ማዓንዳጉዲ ማሄሢ ታኣኒ ባዚዳ? ሃሣ ባዛ ናንጋ ዼኤፖ ቦዖዳ?

13 ‹ታኣኮ ሻኣላ ታና ዶዲሻኔ፤ ታኣኮ ላሆ ቤዛኣ ሃርጋሢ ዳንዳዒሳኔ፤› ጌይ ታ ማሌኔ።

14 ኔኤኒ ጋዓንቴ ዓውቲና ታና ዒጊቻኔ፤ ባልባቲሢናኣ ኔ ታና ዲቃሣኔ።

15 ሃያ ዋኣዪፃ ዺቤ ዑፆ ኬዲ ሃንቲፃፓ ሱፂንቲ ታ ሃይቃኒ ኮዓኔ።

16 ሃጊ ማዓ ዎዛ ታ ቲቄኔ፤ ናንጋኒያ ታ ኮዑዋሴ፤ ታኣኮ ናንጎ ዎዳ ቃሚሢታሢሮ ታና ሃሼ።»

17 «ሃኣዺኬ ኔ ጋዓኒና ዔያቶ ዛሎ ኔ ማላንዳጉዲ ዓሲ ዓይጎ ባኣዚዳይ?

18 ጉቴ ጉቴ ኔ ዔያቶ ማሂ ዛጋንዳጉዲ ሃሣ ቢያ ዎዴ ዎይታቴያ ዛጋንዳጉዲ ዓሲንሢ ዓይጎ ባኣዚዳይ?

19 ጩጮ ታ ዔኤዻንዳኣናታዖ ዻካ ዎዴ ኔ ታና ሃሹዋዓዳ?

20 ኔኤኒ ዓሲ ሙሪ ዛጋ ፆኦዛሢዮ፥ ታኣኒ ጎሜ ማዼሢሮ ኔኤም ዓይጌ ፑርቴይ? ታጊዳ ኔ ቲፕ ጌይ ዓይጋ ዔቄይ? ያዺ ማዓንዳኣና ታ ኔኤም ኬዲ ማዒያ?

21 ጎሞ ኔ ታኣኮ ፔቴታዖ ዓቶም ጎውዋዓዳ? ታ ማዼ ዻቢንቶ ኔ ታኣኮ ባይዙዋዓዳ? ዱኡኪንቲፃ ታኣኮ ሄሌኔ፤ ሃካፓ ሴካ ኔ ታና ኮዔያታቴያ ታ ጴዻዓኬ።»