Job 4 in Maale

1 ቴማኔ ዓጮ ዓሢ ዔልፓዜ ሂዚ ጌይ ማሄኔ፦

2 «ዒዮቤ! ፔቴ ዓሲ ጫርቂ ኔኤም ኬኤዜቴ ጊቢ ኔ ዋይዛንዳ? ጋዓንቴ ኬኤዚሢዳፓ ዖኦኒ ጊንሢም ጋዓንዳይ?

3 ሚርጌ ዓሲ ኔ ዔርዜኔ፤ ላቤ ኩጮዋ ኔ ዶዲሼኔ።

4 ኔ ጌኤዛ ዹቂንታ ዓሶዋ ማኣዳኔ፤ ጎጋይቃ ጉኡዦዋ ኔ ዶዲሻኔ።

5 ሃሢ ሜታ ኔና ሄሌሢሮ ሃጊ ማዓ ዎዛ ባኣ ዓሲ ኔ ማዔኔ፤ ሜታ ኔኤኮ ዴኤፄሢሮ ሃጋኣ ማዓ ዎዞ ኔ ቲቄኔ።

6 ፆኦሲ ዒጊቹማ ኔኤኮ ጌኤቂንቶ ባኮ ፒዜ ጎይፃ ኔኤኮ ሃጊ ማዓ ዎዞቱዋዓዳ?

7 ጌኤሺ ዓሲታንቴ ፆኦሲ ፑርታ ሜቶ ዓጌ ዓሲ ፂሎ ዓሲታንቴ ፆኦሲ ባይዜ ዓሲ ዓኣቴ ሂንዳ ማሌ።

8 ታ ዔራ ጎይፆና ፑርቱሞ ጎሽካዞንሢና ሜቶ ዜርቃዞንሢና ጊንሣ ዒንሢ ዔካኔ።

9 ዔያታ ፆኦሲ ዑኡዞና ባይቃኔ፤ ዒዛኮ ዻጎ ዋኣፆ ጉዳሢና ሙይንታኔ።

10 ፑርቶ ዓሳ ዓዳ ዞቢጉዲ ጉዻኔ፤ ዑኡዞዋ ፔኤኮ ዔያታ ዼጊዲ ዒላታኔ፤ ፆኦሲ ዔያቶኮ ጋዓንቴ ዓጮ ሜንሤኔ።

11 ዞቢ ኬሚ ሙዓ ባኣዚ ባይዛዖ ሃይቃሢጉዲ ዔያታ ሃይቃኔ፤ ዞቤሎኮ ናኣታ ዣኣላሢጉዲ ዔያቶ ናኣታኣ ዣኣላኔ፤»

12 «ፔቴ ዓቢና ዓኣሺንቴ ኪኢታ ታና ሄሌኔ፤ ዬያ ኪኢቶ ካሽካሺና ታ ዋይዜኔ።

13 ዓሶ ዼኤፒ ጊንዓ ዓርቂ ሜታሲ ዹማ ባልባሣ ዎዶና

14 ዒጊቹሞና ጎጋይቂሢና ታና ዓርቄኔ፤ ታኣኮ ሜጌፆ ቢያ ጎቃይሴኔ።

15 ዢባሬ ታ ቤርቲና ዢባርሺ ዓኣዼኔ፤ ዲቃቲሢና ቶኦኮ ጋማ ታኣኮ ጋማሽኬኔ።

16 ዒኢካ ፔቴ ባኣዚ ዔቂ ዓኣንቴ ታ ዛጌኔ፤ ጊዥ ጌይ ታ ዛጌቴያ ዓይጎሞ ዔራኒ ታ ዳንዳዒባኣሴ። ዒማና ዔዌ ቤስካፓ ሂዚ ጋዓ ዑኡሲ ታ ዋይዜኔ፦

17 ‹ፆኦሲ ቤርቲዳ ፂሎ ማዒ ጴዻኒ ዳንዳዓ ዓሲ ዓኣ? ሃሣ ማዤሢ ቤርቶይዳ ጌኤሺ ማዓንዳ ዓሲ ጴዻንዳኣ ናንዳ?

18 ፆኦሲ ፔኤኮ ማዻዞንሢ ጉሙርቁዋያ ማዔቴ ዒዛኮ ኪኢታንቾይዳታዖ ዻቢንቲ ዒ ዴንቃቴ

19 ዓካሪ ራዔ ሙዑዋንቴ ሻሂንታዞንሢ ፃጳ ዔያቶኮ ዓጪና ዢኢጬ ዓጪና ኮሺንቴ ማኣሪዳ ናንጋዞንሢ ዎይቲ ዒ ጉሙርቃንዳይ?

20 ዋንቴና ጉቴናኮ ባኣካ ዔያታ ሜቃኔ፤ ዔርቱዋንቴ ናንጊና ዔያታ ባይቂ ዋሊንታኔ።

21 ፃውና ቱጊንቴ ዓፒሎና ኮሾና ማኣሪጉዲ ዔራቶ ባኣያ ዔያታ ሃይቃኔ።› »