Job 38 in Maale
1 ናንጊና ናንጋ ጎዳ ዓልጎ ዢባሬና ማዒ ዒዮቤም ሂዚ ጌዔኔ፦
2 «ሃይ ዔራቶባኣያ ጌስቲንታ ጌኤሲና ታኣኮ ዞሮ ሼሌዒሲ ዛጋሢ ዒ ዖናዳይ?
3 ሂንዳ ታ ቤርታ ዓቲንቄ ማዒ ቱኡቲ ዔቄ፤ ታ ኔና ዖኦጫንዳኔ፥ ታኣም ማሂ ኬኤዜ።
4 ጎዖንቴ ታኣኒ ሳዖ ማዣኣና ኔኤኒ ዒኢካ ዓኣ? ኔኤኒ ዔራያ ሃሣ ጶቂሣያ ማዔቴ ሂንዳ ታኣም ኬኤዜ።
5 ሳዓ ዬማዺ ማዖንጎ ጌዔሢ ዖናዳይ? ዒዞኮ ዳልጉሞና ዖዶሱሞና ዔራኒ ዋርቆ ሱዞ ዓርቄሢ ዖናታቴያ ኔ ዔራ?
6 ሳዖኮ ቱርቱሮ ዶዲሺ ዓርቄ ዎልቃ ዓይጌንዴዳይ? ሳዖ ማዣኒ ቦኦኮልቄሢያ ዖናዳይ?
7 ካሪፆ ዦኦጋሢ ፔቱሞና ዓይናዻኣና ኪኢታንቻ ቢያ ዒላሻኣና ኔኤኒ ዓንካዳይ?»
8 «ባዛ ሳዖ ዴማፓ ዹኡቂ ኬስኬ ዎዶና ዑርቴ ካሮ ዎዼሢ ዖናዳይ?
9 ባዞ ሻኣሮና ካንቄሢ ሻኔ ዹሞናኣ ካንቂ ባይዜሢ ታናኬ።
10 ባዛ ማዓንዳ ዛጶ ኮሼሢ ካራና ቤሲና ዓኣያ ማዓንዳጉዲ ማሄሢ ታናኬ።
11 ሃይማ ሄላንዳኣና ሙኬ! ሃይማፓ ዑሣ ዓኣዺፖ! ኔኤኮ ዼኤፖ ጉዳሢ ዢባራ ሃይማካ ዔቆም! ጌዔሢ ታናኬ።
12 ዔዞ ዒዮቤ! ኔ ናንጌ ዎዶይዳ ቢያ ፔቴታዖ ሳዓ ካራንዳጉዲ ዓይሢ ቤቂያ? ሳዖ ካሪፆኮ ጌኤሽካ ቤዞ ኔ ጌሢያ?
13 ዬይ ካሪፃ ሳዖም ፖዓንዳጉዲ ፑርቶ ዓሶዋ ዓኣሺንቴ ቤዛፓ ፔጋሲ ዻዋንዳጉዲ ኔኤኒ ዓይሢ ቤቂያ?
14 ሳዖ ካሪፆ ፖዓ ጌሜሮና ዶኦጮና ጳንጪንቴ ዓፒላጉዲ ማዒ ጴዻንዳጉዲ ማሃኔ። ዢኢጬ ዓጪና ቆኦቂ ኮሾና ማላታጉዲ ማሂያኣ ዼኤፒሲ ዻዋኔ።
15 ፑርቶ ዓሳ ፖዒ ዴንቁዋጉዲ ላኣጊንቴኔ፤ ዋይዞ ዒፂሲ ጌኤታሳ ቃሳ ዔያቶኮ ሜቄኔ።»
16 «ሊካ ባዞ ዋኣፆ ዔቶ ኔኤኒ ኬዲያ? ዼኤፖ ዋኣፆኮ ዴማ ዓኣ ሳዓ ኔ ሃንቲ ቤቂያ?
17 ሃይቄ ዓሶ ዓጮ ማዔ ዹሞ ዓጮኮ ጌሎ ካራ ኔኤም ፔጋዺ ጴዼም ኔ ዛጊያ?
18 ሳዓ ዎዚዒ ዼኤፒታቴያ ኔ ዔራኒ ዳንዳዓ? ሂንዳ ዬያ ቢያ ዔራያ ማዔቴ ታኣም ኬኤዜ። »
19 «ፖዖ ባንሢ ዔኪ ዓኣዻ ጎይፃ ሃሣ ዹማኣ ዓንካ ናንጋቴ ኔ ዔራ?
20 ፖዖንታ ዹሞንታ ፔ ቤዞ ቤዞ ዔኪ ኔ ዓኣዻኒ ዳንዳዓ? ዔያቶኮ ናንጎ ቤዞ ዔኪ ዓኣዻ ጎይፆ ኔ ዔራ?
21 ሳዓ ማዢንቴ ዎዶና ኔኤኒ ሾይንቲ ዓኣሢሮ ጎኔኬ ኔኤኒ ዔራኔ! ሚርጌ ሌዔያ ኔኤኒ ናንጌያኬ!»
22 «ሻጮ ጌሦ ማኣሮ ኔኤኒ ጌሊያ? ጊንሣ ሃሣ ቡኩሲ ጌሦና ሻጮ ኔኤኒ ዛጊያ?
23 ዬያ ሻጮ ዖልዚ ዖልታኒ ሜቶ ዎዴም ታኣኒ ጌሤያኬ።
24 ፖዒ ዳኪንታ ቤዛ ዎካፓዳይ? ሃሣ ጊንሣ ዖይዺ ዢባሬ ሳዖ ባንሢ ዳኪንታሢ ዓንካፓዳይ?»
25 «ዒሮም ኬዶንዶ ጎይፆ ጊኢጊሼሢ ጉጉንፆና ዎላ ዓኣ ዢኢፖ ዒሮም ጎይፆ ኮሼሢ ዖናዳይ?
26 ዬያጉዲ ዖኦኒያባኣ ሳዖይዳ ዓሲ ናንጉዋ ዳውሎ ቦኦላ
27 ዒርዚ ዋርቂሻሢ ዖናዳይ? ካዮና ጉሮ ሳዖና ሎጪ ሳዓ ማኣቲ ባቃልሳንዳጉዲ ማሃሢ ዖናዳይ?
28 ዒሮንታ ዖልኮንታ ማዤሢ ዖናዳይ?
29 ዼኤፖ ሻጮንታ ዻኮንታ ማዢ ኬሳሢ ዖናዳይ?
30 ጪኢዣ ዋኣፆ ሹቺጉዲ ዶዲሻኔ፤ ዼኤፖ ዋኣፆኮ ዴሞ ሻቺጉዲ ዶዲሻኔ።»
31 «ፑንጫሮ ዦኦጎ ፔቴይዳ ኔ ቱካኒ ዳንዳዓ? ዛኣፖ ዦኦጋሢያ ጋሢንቲ ዓኣ ሱዞ ዱኡዛኒ ኔ ዳንዳዓ?
32 ዦኦጋሢ ቢያ ፔ ዎዶና ዎዶና ኔ ኬሳኒ ዳንዳዓ? ዦኦጎኮ ዓኒና ማቾና ዎላ ኔ ዔኪ ዓኣዻኒ ዳንዳዓ?
33 ጫሪንጫ ዎዚጉዴ ዳምቤና ዎርቃያታቴ ኔ ዔራ? ዬይ ዳምባ ሳዖይዳ ማዺንታንዳጉዲ ማሃኒ ኔ ዳንዳዓ?»
34 «ሚርጌ ዒርዚ ኔኤም ዋርቂሳንዳጉዲ ሻኣሮ ኔኤኒ ዓይሣኒ ዳንዳዓ?
35 ዜኤሊንፃ ኔ ዓይሥሢና ዜኤሊንሣ? ዔያታ፦ ‹ሃይሾ ኑ ሙኬኔ› ኔ ኮይላ ጋዓ?
36 ዒሮ ማቻ ዒርዚ ዋርቃኒ ጋዓኣና ዖኦላንዳጉዲና ኮይዳኣ ቂኢቃንዳጉዲ ዔያቶም ኬኤዛሢ ዖናዳይ?
37 ፔ ዔራቶና ሻኣሬ ፓይዳኒ ዳንዳዓይ ዖናዳይ? ኩሊንቴ ዓጫ ዎዒ ቶርጴ ማዓንዳጉዲ ዴዔ ቤዞ ጫሪንጫፓ ዋኣፆ ሊካ ላኣላሢ ዖናዳይ?
39 ካዮይዳ ካቲ ላሂ ዓኣንቴ ዒንዴ ዞቢም ኬሞ ኔኤኒ ኬማ? ዒዞኮ ናይዼ ናኣቶ ሙኡዛኒ ኔ ዳንዳዓ?
40 ዔያታ ዴኖ ቆኦፖይዳ ካፒ ዴዓኔ፤ ዴኤሎ ካዮ ባኣካኣ ላሃኔ።
41 ናኣታ ዒዞኮ ሙኡዚ ባይዚ ሜታዺ ታ ባንሢ ዔያታ ዒላታኣና ቁራኬሎም ሙኡዚ ዒንጋሢ ዖናዳይ?»