Job 23 in Maale
1 ዒዮቤ ሂዚ ጌይ ማሄኔ፦
2 «ሃሢያ ታኣኮ ዖዪፃ ጫንቺኬ፤ ሜታዺ ሜታዺ ታ ዒላቴቴያ ፆኦሲኮ ኩጫ ታጊዳ ዴኤፂ ዴኤፂ ዓኣኔ።
3 ዒዚ ጴዻ ቤዞ ዎንዴ ታ ዔራያታቶ ዎዚ ታኣም ኮሽካንዳይ? ዒዚ ናንጋ ቤዞ ታ ሄሌቶ ዎዚ ታ ዎዛዻንዳይ?
4 ታኣኮ ዓኣ ሜቶ ታ ዒዛም ኬኤዛንዳንቴ፤ ታ ዒዛ ሞኦታ ሞኦቶዋ ፓይዲ ፓይዲ ታ ዒዛም ሺኢሻንዳንቴኬ።
5 ዎዚ ጌይ ዒ ታኣም ማሃቴያ ሃሣ ዒ ታኣም ዎዚ ጋዓቴያ ታ ዔራንዳንቴኬ።
6 ጎዖንቴ ፆኦሲ ፔኤኮ ዼኤፖ ዎልቆና ታና ሞኦታንዳኖ? ታ ሺኢቃ ባኮ ታኣም ዒ ዋይዛንዳፓዓቴም ዬያ ዒ ማዻዓኬ።
7 ዒኢካ ፒዜ ዓሲ ዒዛና ሞኦታንዳኔ፤ ታኣኮ ጌኤዞ ጌስታ ፆኦዛሢ ናንጊና ታና ሜታ ባኣያ ማሂ ኬሳንዳኔ።»
8 «ጋዓንቴ ዓባ ኬስካ ባንፆ ታ ዓኣዼቴያ ዒ ዬካ ባኣሴ፤ ጊንሣ ዓባ ጌላ ባንፆ ታ ማዔቴያ ዒዛ ዴንቃኒ ታ ዳንዳዒባኣሴ።
9 ዒዚ ኬዶ ዛሎና ማዾ ፔኤኮ ማዻኔ፤ ጋዓንቴ ታ ዒዛ ዴንቂባኣሴ፤ ዾኦሎ ዛሎ ታ ሺሬቴያ ዒዛ ዴንቃኒ ታ ዳንዳዒባኣሴ።
10 ዒ ታኣኮ ሄፆ ቢያ ዔራኔ፤ ዒ ታና ዎይታቴ ዛጌቶዋ ዎርቄጉዲ ጌኤሺ ማዔሢ ዴንቃዳኔ።
11 ቶካ ታኣኮ ዒዚ ናሽካ ጎይፆ ዓኣዻኔ፤ ሻውላ ሚዛቂ፥ ሴካ ሃንጋ ታ ጎዑዋሴ።
12 ቢያ ዎዴ ዒዛኮ ዓይሢፆ ታ ካፓኔ፤ ቃኣሎዋ ታ ዒዛኮ ዒና ካፒ ዓኣኔ።»
13 «ፆኦሲ ላኣሚንቱዋሴ፤ ዒዛም ዋይዚ ዒፃይ ባኣሴ፤ ዒ ናሽኬ ባኣዚ ቢያ ማዻኔ።
14 ታኣም ዒ ማሌ ባኮ ቢያ ማዺ ኩንሣንዳኔ፤ ዬያጉዴ ሚርጌ ማሊሢ ዒዛኮ ዓኣኔ።
15 ዬያሮ ዒዛ ቤርታ ዔቂፃ ኮሺ ታና ዒጊቻኔ፤ ዬያ ታ ማላዖ ጎጎጋይቃኔ።
16 ፆኦሲ ታኣኮ ዒኖ ባይዜኔ፤ ቢያ ባኮ ዳንዳዓ ጎዳ ታና ዲቃሤኔ።
17 ዎዚ ሻኔ ዹማ ዓኣፖ ታኣኮ ዓርቄቴያ ዹሞኮ ዎልቃዺፃ ጌስቲፆ ታና ባሺባኣሴ።»