Job 12 in Maale

1 ዬካፓ ዒዮቤ ሂዚ ጌይ ማሄኔ፦

2 «ጎኔኬ ዒንሢ ኮሺ ጪንጫኬ፤ ዒንሢ ሃይቃኣና ዔራቶ ዒንሢና ዎላ ሃይቃያ ዒንሢም ማላኔ!

3 ያዺ ማዔቴያ ታኣኮ ዒንሢጉዲ ማሊ ጶቂሣ ዒኔ ዓኣያኬ፤ ፔቴታዖ ዒንሢዳፓ ዓይጎናኣ ታ ዻኩዋያኬ፤ ዒንሢ ኬኤዛ ባኮ ዓሲ ቢያ ዔራያኬ።

4 ፆኦሲ ታኣኒ ዔኤሌም ማሂ ታኣም ዒ ኬኤዜ ዎዴ ዓኣኔ፤ ሃሢ ታኣኒ ታ ላጎና ሚኢጪንታያ ማዔኔ፤ ዻቢንቲ ባኣያ ታኣኒ ፒዜ ዓሲታዖ ዓሲ ቢያኮ ዓማሎ ባኣዚ ታ ማዔኔ።

5 ሜታ ሄሊባኣ ዓሲ ኮርካ ሜታዼ ዓሲኮ ሜቶ ቶኦቺሢ ሼሌዔኬ። ጋዓንቴ ሎኦማኒ ጋኣዲንታ ዓሢ ዒንሢ ሂሂዓኔ።

6 ፔኤኮ ዎልቆ ፆኦሲ ማሂ ፓይዳ ዉዞንታ ፆኦሲ ሃሼ ዓሶንታታዖ ኮሺና ናንጋኔ። »

7 «ሂንዳ ቆልሞ ዖኦጬ ኔና ዔርዛንዳኔ፤ ጫሪንጮ ካፖዋ ዖኦጬ ኔኤም ኬኤዛንዳኔ።

8 ሳዖም ኬኤዜ፥ ኔና ዔርዛንዳኔ፤ ባዞ ሞላሢያ ኔኤም ኬኤዛንዳኔ።

9 ዬያቶ ቢያሢፓ ናንጊና ናንጋ ጎዳኮ ኩጫ ዬያ ማዤሢ ዔሩዋይ ዖናዳይ?

10 ሼምፓ ዓኣ ማዢንታ ቢያ ሃሣ ፔቴ ፔቴ ዓሶኮዋ ሼምፓሢ ፆኦሲ ቢታንቶ ዴማኬ።

11 ዒንዲርሲ ዓኣሢ ካሣ ዱማሲ ዔራሢጉዲ ዋይዚያኣ ዎዚ ጌይ ጌስቲንቴቴ ዔሪ ዱማሳኔ።»

12 «ዔራቶ ጋርቻቶና ማሊ ጶቂሥሢያ ሚርጌ ሌዔ ናንጊሢፓ ጴዻኔ።

13 ዔራቶና ዎልቄና ፆኦሲኮ ዓኣኔ፤ ዞሮና ማሊ ጶቂሥሢና ጴዻሢ ፆኦሲ ኮራፓኬ።

14 ፆኦሲ ሻሄሢ ጊንሣ ማሂ ኮሻኒ ዖኦኒያ ዳንዳዑዋሴ፤ ፆኦሲ ቱኬሢ ዖኦኒያ ቡላኒ ዳንዳዑዋሴ፤

15 ፆኦሲ ዒርዚ ላኣጌቴ ሳዓ ቦኦሪ ሜላኔ፤ ዒሮ ዒ ላኣሊ ሃሼቴ ጋዓንቴ ዓጫ ዲጲና ባይቃኔ።

16 ፆኦሲ ዶዲ ሃሣ ዖልዚናኣ ባሻያኬ፤ ጌሺንታሢታቴያ ጌሻሢ ላምዓሢ ዒዛ ቢታንቶ ዴማኬ።

17 ዒዚ ዞራ ዓሶ ዔራቶ ላኣጋኔ፤ ዴሮ ሱኡጎዋ ዔኤያ ማሃኔ።

18 ዒዚ ካኣቶ ካኣቱሞ ዓልጋፓ ኬይሳኔ፤ ጊልዲማ ሌሊ ቱኬ፥ ቱኡሲ ዓሲ ዔያቶ ዒ ማሃኔ።

19 ቄኤሶ ቢታንታፓ ኬይሲ ዒ ዳውሳኔ፤ ቢታንታ ዓኣ ዓሶዋ ቢቲ ማዒፆይዳፓ ኬይሳኔ።

20 ዔርቴ ጉሙርቂንታ ዓሶ ዚቲዳኔ፤ ጋርቾ ዓሶይዳፓኣ ማሊ ጶቂሣ ዒኖ ዔካኔ።

21 ዖሎ ዓሶ ዓይሣ ዓሶዋ ቦርሲሳኔ፤ ዎልቆ ዓሶኮዋ ዎልቆ ባይዛኔ።

22 ዹሚዳ ዓኣቺንቴ ባኮዋ ፔጋሳኔ፤ ሻኔ ዹሞዋ ፖዒ ባንሢ ላኣማኔ።

23 ካኣቶ ዎልቄ ዓኣያ፥ ዔርቴያ ማሃኔ፤ ጋዓንቴ ጊንሣ ዔያቶ ዒ ባሺ ባይዜኔ፤ ዴሮ ዒ ዺቢሻኔ፤ ዜርቂያኣ ባይዛኔ።

24 ሱኡጎኮ ማሊ ጶቂሢፃ ፓጫንዳጉዲና ጎይሢባኣ ዳውሎ ቦኦሎይዳ ዣኣሊ ሃንታንዳጉዲ ማሃኔ።

25 ፖዒ ባይዚ ዹሚዳ ዹቂንታንዳጉዲና ማሢንቴ ዓሲጉዲ ጋኣዲንታንዳጉዲያኣ ዒ ማሃኔ።»