Jeremiah 9 in Maale
1 ዎዾና ታ ዴሮ ዛሎ ሮኦሮንታ ዋንቶንታ ታ ዬኤኮም ታኣኮ ቶኦካ ዋኣሢ ዔቴ ማዔቴ ዓኣፓኣ ታኣኮ ዓቢሢ ዓልቃያ ማዔቴ ታ ዓይጎ ጋዓንዳይ!
2 ታኣኮ ዴራ ዓኒ ሃሣ ማቾ ማዒባኣያና ላሃያ፤ ሃሣ ጌሻያ ማዔሢሮ ዔያቶ ባኣካፓ ዓሲ ናንጉዋ ዳውሌ ታ ዱማዺ ዴንዲ ናንጋንዳ ጎይሢ ዓሲ ዎርቃ ማኣሪ ታ ዴንቄቴ ዎዚ ታና ዎዛሳንዳይ!
3 ዔያታ ፔ ዻንጎና ሉኡዙሞ ባኣዚ ጌስታኒ ጊኢጌያኬ፤ ዬያሮ ሳዔሎይዳ ጎኑሞ ቤዞ ሉኡዙሞ ካኣታዼኔ። ናንጊና ናንጋ ጎዳ ሂዚ ጋዓኔ፦ «ታኣኮ ዴራ ፔቴ ጎሜ ማዻዖ ጊዴና ሜሌይዳ ፒንቃኔ፤ ታኣኒ ፆኦሲ ማዔሢ ዔሪ ዔያታ ታና ቦንቺባኣሴ።»
4 ፔቴ ፔቴ ዓሳ ፔ ላጎኮ ጌኖ ዔሪ ፔና ካፖንጎ፤ ፔኤኮ ጌርሲ ማዔቴያ ዒ ጉሙርቃኒ ኮይሱዋሴ፤ ጌርሲ ጌይንታሢ ቢያ ጌሻያ ማዔኔ፤ ዒጊኖ ጎዖናሢ ቢያ ፔ ላጋሢኮ ሱንፆ ባይዛኔ።
5 ቢያሢ ፔኤኮ ላጎ ዔኤያሲ ጌሻኔ፤ ጎኔ ጌስታ ዓሲያ ባኣሴ፤ ዻንጎ ዔያታ ሉኡዙሞ ጌስቲሲ ዔርዜኔ፤ ጎሜ ማዺ ማዺ ዑፆ ዔያታ ፔኤኮ ላቢሳኔ።
6 ጌኔይዳ ጌኔ፥ ጌሺሢዳ ጌሺሢ ዔያታ ቃሲ ቃሲ ዓኣዻኔ፤ «ታኣኒ ዔያቶኮ ፆኦሲ ማዔሢ ዔሪ ዔኮ ዔያታ ዒፄኔ» ጋዓኔ ናንጊና ናንጋ ጎዳ።
7 ዬያይዳፓ ዔቄያና ናንጊና ናንጋ ጎዳ ማዔ ቢያ ባኮ ማዤ ጎዳሢ ሂዚ ጋዓኔ፦ «ዴሮ ታኣኮ ታ ጌኤሻኒ ዓንጊጉዲ ሼኤሻንዳኔ፤ ዴራ ታኣኮ ፑርታ ባኣዚ ማዼሢሮ ዬማይዳፓ ሜሌ ታ ዔያቶ ዎዎዳንዳይ?
8 ዻንጋ ዔያቶኮ ቢያ ዎዴ ጌኔ ባኣዚ ጌስታሢሮ ፑርታ ሂኢሺጉዲኬ፤ ፔቴ ፔቴሢ ፔኤኮ ላጎና ዎላ ናሹሞ ዑኡሲና ጌስታኔ፤ ጋዓንቴ ዴሚና ዎሊም ፒሮ ፒራኔ።
9 ሂዳዖ ዬያ ቢያ ባኮሮ ዔያቶይዳ ታ ሜቶ ዓጋኒና ዬያጉዴ ዓሶ ኮሜ ኮፃኒ ታና ኮይሱዋዓዳ? ዬያ ጌዔሢ ታና፥ ናንጊና ናንጋ ጎዳኬ።»
10 ታኣኒ ሂዚ ጌዔኔ፦ «ቢያሢ ባዔ ማዔሢሮ፤ ሃሣ ዒኢካ ሴካ ሃንጋ ሃንታ ዓሲያ ባኣሢሮ ዹኮ ዛላ ታና ማሊሻኔ፤ ቦኦሎ ዛሎዋ ታ ዬዬኤካኔ፤ ቆልሞኮ ዑኡሲያ ዒኢካ ዋይዚንቱዋሴ፤ ጫሪንጫ ባራና ካፖንታ ካዮ ቦዖንታ ቢያ ዒኢካፓ ቤቲ ዴንዲ ባይቄኔ።»
11 ናንጊና ናንጋ ጎዳ ሂዚ ጋዓኔ፦ «ዬሩሳላሜ ካታሞይዳ ዓኣ ማኣሮ ቢያ ታኣኒ ዶዔያ ሌሊ ማሃንዳኔ፤ ዉኡካ ኮኦሚ ሺራ ቤሲ ታ ማሃንዳኔ፤ ዪሁዳ ካታሞ ሃሣ ታኣኒ ዖኦኒያ ናንጉዋያ ጉሪ ቤሲ ማሃንዳኔ።»
12 ናንጊና ናንጋ ጎዳ ኮይላ ታኣኒ፦ «ሳዔላ ዖኦኒያ ዒኢካ ሃንታኒ ዳንዳዑዋያ ዳውሌ ቦኦሊ፤ ሃሣ ዔፄ ካይዚ ማዔሢ ዓይጎሮዳይ? ዬያ ማሊ ጶቂሢ ዔራኒ ዳንዳዓ ዔሮ ዖናዳይ? ሜሌ ዓሶም ፔጋሲ ኬኤዚ ዔርዛንዳጉዲ ኔኤኒ ዖኦም ፔጋሲ ዻዌይ?» ጌዔኔ።
13 ናንጊና ናንጋ ጎዳ ታኣም ሂዚ ጌይ ማሄኔ፦ «ዬይ ቢያ ማዓኒ ዳንዳዔሢ ታኣኮ ዴራ ታ ዔያቶም ዒንጌ ዎጎ ሃሼሢሮኬ፤ ዔያታ ታኣም ዓይሢንቲባኣሴ፤ ታ ዔያቶም ኬኤዜ ባኮዋ ቢያ ዔያታ ማዺ ኩንሢባኣሴ።
14 ዬያይዶንዶሢ ሃሺ ዋይዚ ዒፃ ፑርታ ዓሲ ማዔኔ፤ ዔያቶኮ ዓዶንሢ ዔያቶ ዔርዜ ጎይፆና ባዓኣሌ ማሊሲ ኮሾና ባኮ ዔያታ ዚጊ ካኣሽኬኔ።
15 ዬያሮ ታኣኒ፥ ዒስራዔኤሌ ፆኦዛሢ ማዔ ቢያ ባኮ ማዤ ጎዳ ማዻንዳ ባኮ ታ ዒንሢም ኬኤዞም፤ ሃይ ዴራ ሙዓንዳ ሙዖ ጫንቺ፥ ሃሣ ዑሽካንዳ ዋኣፆዋ ፑርቲ ዶርዖ ማዣ ዋኣሢ ታ ማሃንዳኔ።
16 ዔያቶንታ ዔያቶኮ ቤርታኣ ዓዶንሢንታ ዔሩዋያ፥ ሜሌ ዴሬ ባኣካ ታ ዔያቶ ዜርቃንዳኔ፤ ዔያቶ ጬንቻ ዓራፖና ዎዻንዳ ሞርኬ ታኣኒ ዳኪ ዎዺ ዔያቶ ባይዛንዳኔ።»
17 ቢያ ባኮ ማዤ ጎዳ ሂዚ ጋዓኔ፦ «ሂንዳ ዓካሪ ኮሺ ማሉዋቴ፤ ቃዮ ቃያንዳ ላኣሊ ፔቴይዳ ቡኩሱዋቴ፤ ዓይዳዺ ቃያ ላኣሊያ ዔኤሉዋቴ።»
18 ዴራ ሂዚ ጌዔኔ፦ «ዓኣፓ ኑኡኮ ዓቢሢና ኩማንዳጉዲ ጋጋጮ ዑፆና ሊካ ኬዳንዳጉዲ ቃዪ ኑና ዬውሳ ላኣላ ዑኬና ቃያንዳጉዲ ኬኤዙዋቴ።»
19 ፂዮኔይዳ፦ «ባዴዔ፥ ኑ ኩዴኔ! ጋፒ ኑ ቦርሲንቴኔ! ኬኤፃ ኑኡኮ ሻሂንቴሢሮ ዓጮ ኑ ሃሺ ዴንዲናኣኮኬ» ጌይ ጌይ ዬኤኪንታ ዒላቶ ዑኡዞ ዋይዙዋቴ።
20 ታኣኒያ ሂዚ ጌዔኔ፦ «ዒንሢ ሃይ ላኣላ! ናንጊና ናንጋ ጎዳ ጋዓሢ ዋይዙዋቴ፤ ጌይንታ ባኮ ዓርቂ ዔካኒ ጊኢጌያ ማዑዋቴ፤ ዔያታ ዎማይዲ ቃዪ ዬኤካንዳያ ኮይሳቴያ ዒንሢኮ ዉዱሮ ናኣቶም ኬኤዙዋቴ፤ ቃያሢ ቃዮ ጎይፆ ዒንሢ ባጎንሢም ኬኤዚ ዔርዙዋቴ።
21 ሃይቢ ኑ ኬኤፆኮ ፑልቶ ካሮና ካሮና ጌሌኔ፤ ኑኡኮ ካኣቶ ማኣሮ ማኣሮዋ ጌሌኔ፤ ናኣቶ ጎይፆይዳ፥ ዼጌ ዓሶዋ ዓሳ ቡካ ጶኦኮይዳ ማኣሳንሢ ጋፔኔ።
22 ዓሲኮ ሌሲ ፔጌይዳ ላላኣሊንታ ቡኡራጉዲ ቢያ ቤስካ ኬኤሪንቴኔ፤ ሃኣኮ ጮኦራ ዓሳ ጮኦራዖ ኬይሲ ሃሼም ሜሌ ዓሲ ዴንቂ ዚንጉዋ ሃኣኮ ዬይ ማዔኔ፤ ናንጊና ናንጋ ጎዳ ታና ኬኤዞም ጌዔሢ ዬያኬ።»
23 ናንጊና ናንጋ ጎዳ ሂዚ ጋዓኔ፦ «ዔራሢ ፔ ዔራቶና ዶዳሢ ፔ ዎልቆና ዖርጎጫሢያ ፔ ቆሎና ዖቶርቆፓ፤
24 ፔቴ ዓሲ ዖቶርቃንዳያ ኮይሳያ ማዔቴ ሳዖይዳ ማኣሪሢ ዳካያ፤ ፒዜ ዎጌ ዎጊሢንታ ጎኑሞ ማዾንታ ማዺንቲ ጴዻንዳጉዲ ማሃ ታና፥ ፆኦሲ ዔሪፆና ዖቶርቆንጎ፤ ታና ዎዛሳሢያ ዬያኬ፤ ዬያ ጌዔሢ ታና፥ ናንጊና ናንጋ ጎዳኬ።»
25 ናንጊና ናንጋ ጎዳ ሂዚ ጋዓኔ፦ «ሄርሺንቲሮ ዓቲንቶ ቤርቶ ሌሊ ቲቂንቴዞንሢዳ ሜቶ ታ ዓጋንዳ ዎዴ ዬዓንዳኔ፤
26 ጊብፄ ዓጮ ዓሶ፥ ዪሁዳ ዓሶ፥ ዔዶኦሜ ዓሶ፥ ዓሞኦኔ ዓሶ፥ ሞዓኣቤንታ ዓሲ ናንጉዋ ዳውሎ ኮይላ ናንጋያ ሻውሎና ሚዛቆ ዛሎ ጋንጋሮይዳ ዓኣ ጋፓኖ ሜኤዳ ዴሮንታ፤ ዬያጉዲ ሃሣ ዒስራዔኤሌ ዴራኣ ዒኖይዳ ዓኣ ፑርቶ ቲቂ ሺኢሺባኣሢሮ ዬያቶ ቢያሢዳ ሜቶ ታ ዓጋንዳኔ።»