Jeremiah 46 in Maale
1 ናንጊና ናንጋ ጎዳ ታኣም ጊብፄፓ ዓርቃዖ ሜሌ ዓጮ ካኣቶ ዛሎዋ ቢያ ኬኤዜኔ፤ ዒዮዓቄሜ ዪሁዳይዳ ካኣታዼንቴ ዖይዳሳ ሌዖና ዔፕራፂሴ ዎሮ ኮይላ ዓኣ ቤዞ ካርካሚሼይዳ፥ ኔኮ ጌይንታ ጊብፄ ዓጮ ካኣቲስኬይ ዖሎሮ ዔኪ ኬሴ ዓሶ ባብሎኔ ካኣቲ ናብካዳናፆኦሬ ዖሊ ባሼሢ ዛሎ ናንጊና ናንጋ ጎዳ ሂዚ ጌይ ኬኤዜኔ፦
3 «ጊቲሞንታ ዎርፆንታ ዒንሢኮ ጊኢጊሺ ዖልዚሮ ዖሎ ጶኦኮ ዴንዱዋቴ፤
4 ፓራሢ ዒንሢኮ ቢፃልቂ፥ ዒልካዮ ሄርቂጋፓ ቶጉዋቴ፤ ቶኦካ ዓጎ ዖሎ ዓንጎ ዓጊ ቤሲ ቤሲ ዓርቁዋቴ፤ ዎርፆ ዒንሢኮ ዑጪ ጊኢጊሹዋቴ፤ ዖሎ ማኣዓሢያ ማይንቱዋቴ።»
5 «ጋዓንቴ ሃይ ታኣኒ ዛጋ ባካ ዓይጎዳዖ? ዒጊጪ ዓሳ ጊንሢም ማዒሢዳኬ፤ ዖሎ ዓሳ ሃይሾ ባሺንቴኔ፤ ቢያ ዛሎና ዒጊቻ ባኣዚና ሂርጊሻ ባኣዚ ዓኣሢሮ ጊንሢም ሺሪታዖ ዛጉዋዖ ቤርቲም ሌሊ ጳሽኪ ዔያታ ፑኔኔ።
6 ሩኡሪ ጳሽካ ዓሳታዖ ጳሽኪ ቶላኒ ዳንዳዑዋሴ፤ ጎኦባኬ ጌይንታ ዓሳኣ ፔና ዓይሳኒ ዳንዳዑዋሴ፤ ዔፕራፂሴኮ ኬዶ ዛሎይዳ ዹቂንቲ ዔያታ ሎኦሚ ጋፓኔ።
7 ሃይ ዓባዬ ዎሮጉዲ ሙካሢና ዎሮ ዓጮ ቢያ ኩሚ ጮኦሽኪ ዔቦ ቢያ ዔኤዻንዳ ዎርዚ ማዔሢ ሃይ ዖናዳዖ?
8 ዓባዬ ዎሮጉዲ ሙኬሢና ዎሮ ዓጮ ኬስኪ ኩሚ ጮኦሽኪ ዔቦ ቢያ ዔኤዻያ ማዔዛ፥ ጊብፄ ዓጮኬ፤ ጊብፄ ሂዚ ጌዔኔ፦ ‹ታኣኒ ዔቂ ዓጮ ቢያ ዋኣሢጉዲ ዔኤዺ ባይዛንዳኔ፤ ካታሞንታ ዒኢካ ናንጋ ዴሮንታ ቢያ ኩርሳንዳኔ።›
9 ፓራሢ ቤርቲም ዴንዳንዳጉዲ ሳርጌሎ ዖይታኣ ዒጊቻ ጎይሢና ሺሪ ሺሪ ዴንዳንዳጉዲ ዒሹዋቴ፤ ዒቶጲያና ሊኢቢያናፓ ጊቲሞ ዔኪ ሙኬ ዓሶንታ ሊኢዲያፓ ሙኬ ሂኢዦ ዱካ ጎኦቦ ዓሶዋ ቃሲ ዶዲ ዖላ ዓሲ ጊኢጊሺ ዳኩዋቴ» ጋዓኔ ናንጊና ናንጋ ጎዳ።
10 ሃና ኬላ ቢያ ባኮ ዎይሣ ጎዳ ዶኦሬ ኬሊኬ፤ ዒዚ ሃኖ ኮሜ ዔካንዳኔ፤ ፔኤኮ ሞርኮይዳ ሜቶ ዓጋንዳኔ። ዒዛኮ ጬንቾ ዓፓራ ሚርጌ ዓሲ ሙዓንዳኔ፤ ሱጉፆዋ ዔያቶኮ ዑሽካንዳኔ፤ ቢያ ባኮ ዎይሣ ጎዳ ማዔ ፆኦዛሢ ዔፕራፂሴ ዎሮኮ ኬዶ ዛላ ዓኣ ዓሶ ዒዛም ሹኪ ዒንጎ ባኣዚ ማሂ ሹካንዳኔ።
11 ኩሙሢ ዉዱሮ ማዒ ጴዻዜሌ፥ ጊብፄ! ጌሌዓዴ ዓጮ ዴንዲ ቲሽቶንዶ ዼኤሻ ኮዔ፤ ኔኤኮ ዼኤሻ ቢያ ጉሪ ባኣዚኬ፤ ኔና ፓሣኒ ዳንዳዓይ ፔቴታዖ ባኣሴ።
12 ዴራ ኔኤኮ ዻውሲንቶ ዋይዜኔ፤ ዓጮ ዴሮም ጉቤ ኔኤኮ ዒላታ ሱቴኔ፤ ፔቴ ፖኦሊሳሢ ባጋሢ ዋርቴም ቢያሢ ዎሊ ዔኪ ሳዓ ሎኦማኔ።
13 ባብሎኔ ካኣቲ፥ ናብካዳናፆኦሬ ጊብፄ ዓጮ ዖላኒ ሙካንዳሢ ዛሎ ናንጊና ናንጋ ጎዳ ሂዚ ጌይ ታኣም ኬኤዜኔ፦
14 «ጊብፄ ካታሞ ሚግዶኦሌንታ፥ ሜምፒሴንታ ፃፕናኣሴንታይዳ ሃያ ቃኣሎ ዼጊዲ ኬኤዜ፤ ‹ዒንሢ ዛሎ ዖልታኒ ጊኢጉዋቴ፤ ዒንሢ ኮይሎይዳ ዓኣ ዖላ ቢያ ባይቃንዳኔ።
15 ዼኤፒኬ ዒንሢ ጋዓ ዓጲሴ ጌይንታ ፆኦዛ ዎይቲ ዒንሢኮ ሎኦሜይ? ናንጊና ናንጋ ጎዳ ሂዒ ኬኤሬሢሮቱዋዓዳ?›
16 ዔያቶኮ ዖሎ ዓሳ ፔቴይ ባጋሢ ዋርቲ ዎላ ሎኦማንዳኔ፤ ዔያታ ፔቴ ባጋሢ ኮይላ፦ ‹ሞርኮኮ ዖላፓ ኑ ጳሽኪ ፑኒ ኑ ዓጮ ዴሮ ባኣኮ ጌላኒ ሩኡሮም› ጋዓንዳኔ።»
17 «ጊብፄ ካኣቲም፦ ‹ማዾንዶ ባኮ ዳይዲ ሃሼ፥ ጉሪ ሆኦሊንቲ ሺራያ› ጌይንታ ዓኪ ሱንሢ ጌሢንታንዳኔ፤
18 ሱንፃ፦ ‹ቢያ ባኮ ዎይሣ ጎዳ ማዔ ፆኦሲ› ጌይንታ ካኣታሢ ሂዚ ጋዓኔ፤ ታኣኒ ሼምፔና ናንጋያኬ፤ ዹኮ ባኣኮይዳ ታኣቦኦሬ ዹካ፥ ባዞ ኮይሎዳ ሃሣ ቄርሜሎሴ ዼጊ ጌይ ጴዻሢጉዲ ዒንሢ ዑፃ ዼግ ዼጊ ጌይ ዒንሢ ባሻንዳ ዎልቄ ዬዓንዳኔ።»
19 «ጊብፄ ዴሬዮቴ! ዒንሢ ዲዒንቲ ዔውታንዳሢሮ ዒንሢኮ ዓኣ ሜሆ ቢያ ታኣጊንቱዋቴ፤ ሜምፒሴ ካታማ ሻሂንቲ ዓሲ ናንጉዋ ዳውሌ ማዒ ዓታንዳኔ፤
20 ጊብፄ ዑፃ ኮሽኪ ሚዛጴ ማሮጉዲኬ፤ ኬዶ ዛሎና ሙካ ሶኦፆምቦ ዉፃላ ዒዞ ዑፃ ቁንዳንዳኔ።
21 ሚኢሾሮ ማዺሻኒ ዔኮና ፖኦሊሳ ማሌ ዎፓናጉዲኬ፤ ጊንሢም ሺሪ ዔያታ ጳሽኪ ፑናንዳኔ፤ ዔያቶይዳ ፑርታ ዎጌ ዎጊንቴሢሮና ባይሲንታኣ ዔያቶ ሄሌሢሮ ዶዲ ዔቂ ዔያታ ዖላኒ ዳንዳዑዋሴ።
22 ሞርኮኮ ዖሎ ዓሳ ሙኪ ዑካኣና ሾኦሺጉዲ ሱኡሪንሢ ዑኡሲ ዋይዚሲ ጊብፄ ጳሽኪ ፑናንዳኔ፤ ዲም ጌዔ ዓንሢ ካይዚ ዓሲ ጲሻሢጉዲ ዬይ ዖሎ ዓሳ ሄርጋና ዔያቶይዳ ጌሊ ዔያቶ ኩርሳንዳኔ። ዬያ ዓሶኮ ፓይዳ ፓይዲንታኒ ዳንዳዑዋያኬ፤ ዖሎ ዓሶኮ ሚርጉማኣ ዓቢሢዳፓ ባሻያ ማዓንዳኔ።
24 ጊብፄ ዴሮ ኬዶ ዛሎይዳ ናንጋ ዴራ ዖሊ ባሻንዳሢሮ ዔያታ ቦርሲንታንዳኔ፤ ዬያ ጌዔሢ ታና፥ ናንጊና ናንጋ ጎዳኬ።»
25 ዒስራዔኤሌ ፆኦሲ ማዔ ቢያ ባኮ ዎይሣ ጎዳሢ ሂዚ ጋዓኔ፦ «ጊብፄ ዓጮንታ ዒኢካ ካኣሽኪንታ ፆኦዞንታ ካኣቶንታ፤ ቴቤሴ ጌይንታ ካታሞኮ ካኣሽኮ ፆኦዛሢንታ ጊብፄ ካኣቲንታ ዒዛ ጉሙርቃ ዓሶ ቢያሢንታይዳ ሜቶ ታኣኒ ዓጋንዳኔ።
26 ሃሣ ጊንሣ ዔያቶ ዎዻኒ ኮዓ፥ ባብሎኔ ካኣቲ፥ ናብካዳናፆኦሬና ዒዛኮ ዖሎ ዓሶ ኩጮናይዳ ዓኣሢ ታኣኒ ዔያቶ ዒንጋንዳኔ፤ ዬካፓ ዻካ ጋዓዖ ዬያኮ ቤርታ ዓኣ ጎይፆ ዓሲ ጊንሣ ጊብፄይዳ ናንጋያ ማዓንዳኔ፤ ዬያ ጌዔሢ ታና፥ ናንጊና ናንጋ ጎዳኬ።»
27 «ታኣኮ ዓይላሢ፥ ያይቆኦቤ ናኣታ! ዒንሢ ዒስራዔኤሌ ዓሳ! ዒጊጪ ዎዛ ቲቂፖቴ፤ ዒንሢ ታኣኒ ሃኬ ዓጮይዳፓ ዒንሢኮ ዜርፆዋ ታኣኒ ዲዒንቲ ዴንዴ ቤዛፓ ዔኪ ዬይሢና ዓውሳንዳኔ። ቤርታኣሲጉዲ ዖኦኒያ ዒንሢ ዲቃሡዋንቴ ጊንሣ ኮሺ ናንጊ ዒኢካ ናንጋንዳኔ።
28 ታኣኒ ዒንሢና ዎላታሢሮ ዒንሢ ታኣኮ ዓይላ፥ ዒስራዔኤሌ ዓሳ! ዒጊጪ ዲቃቲፖ፤ ዒንሢ ዜርቂንቲ ዴንዲ ዔያቶ ባኣካ ዴዓንዳጉዲ ታኣኒ ማሄ ዴሮ ቢያ ታኣኒ ባይዛንዳኔ፤ ዒንሢ ጋዓንቴ ታኣኒ ጋፒሲ ባይዛዓኬ፤ ያዺ ማዔቴያ ዻካ ታ ዒንሢ ፁንቃንዳኔ፤ ታ ዒንሢ ፁንቁዋዖ ጋዓንቴ ሃሻዓኬ፤ ዬያ ጌዔሢ ታና፥ ናንጊና ናንጋ ጎዳኬ።»