Jeremiah 4 in Maale

1 ናንጊና ናንጋ ጎዳ ሂዚ ጋዓኔ፦ «ዒስራዔኤሌ ዴሬዮቴ! ዓካሪ ዒንሢ ታ ባንሢ ማዓያታቴ ማዑዋቴ፤ ታኣኒ ዒፃ፥ ሜሌ ፆኦዞ ዒንሢ ባይዚ ታኣም ሌሊ ዒንሢ ጉሙርቂንታያ ማዔቴ፥

2 ጎኑሞና ፂሉሞና ሃሣ ፒዜ ዒኔና፦ ‹ናንጊና ናንጋ ጎዳ ሃይቆ!› ጌይ ጫኣቄቴ፥ ሜሌ ዴራ ዬያና ታና ጋላታንዳኔ፤ ታኣኒያ ዔያቶ ዓንጃንዳኔ።»

3 ናንጊና ናንጋ ጎዳ ዪሁዳና ዬሩሳላሜ ዴሮናም ሂዚ ጋዓኔ፦ «ሻፓዼ ማኣሎ ዒንሢኮ ዋርፃፒ ጊኢጊሹዋቴ፤ ዜርፆ ጉሪ ዓንጊፆ ባኣካ ዜርቂፖቴ!

4 ዒንሢ ዪሁዳና ዬሩሳላሜናይዳ ናንጋ ዓሳ! ዒንሢኮ ዓቲንቶ ቤርቶ ቲቁዋቴ፤ ዒንሢኮ ዒና ዓኣ ፑርቶ ባኮዋ ቲቂ ሺኢሺ ማሊፆ ዒንሢኮ ጌኤሺ ጉቤና ዒንሢኮ ዑፆ ናንጊና ናንጋ ጎዳም ዎርቃያ ማሁዋቴ፤ ዒንሢ ዬያይዲባኣቴ ዒንሢ ማዻ ፑርቶ ማዾ ዛሎና ታኣኮ ዻጋ ታሚጉዲ ዔኤታንዳኔ፤ ዬይ ታኣኮ ዻጋ ዔኤቴቴ ዖኦኒያ ዬያ ዎዻንዳይ ባኣሴ።»

5 ዬኖ ዓጮ ዓሶ ቢያሢም ዛዬ ዋርቁዋቴ! ዑኡዞ ዒንሢኮ ዼጊዲ ዒላቱዋቴ! ዬይ፥ ዪሁዳና ዬሩሳላሜና ዴራ ዙላ ኬልቂንቲ ዲርቂንቴ ካታሞ ጳሽኪ ቶላንዳጉዲ ኬኤዙዋቴ።

6 ፂዮኔም ጎይፆ ዻውዋቴ! ኔጉዋዖ ሼምፖ ዒንሢኮ ዓይሳንዳ ቤሲ ባንሢ ጳሽኪ ፑኑዋቴ! ናንጊና ናንጋ ጎዳ ኬዶ ዛሎ ዓጫፓ ዼኤፒ ባይሲንታ ዳካኒኬ።

7 ዞቢ ጌሊ ዓኣ ዴኤሊፓ ኬስካጉዲ ዴሮ ባይዛይ ዔቃንዳኔ፤ ዒዚ ዬይ፥ ዪሁዳ ባይዛኒ ሙካንዳኔ፤ ዪሁዳ ካታማ ዶዒ ባይቃንዳኔ፤ ዒኢካ ናንጋንዳ ዓሲያ ጴዻዓኬ።

8 ናንጊና ናንጋ ጎዳኮ ዼኤፖ ዻጋ ዪሁዳፓ ሺኢኪባኣሢሮ ሲዬ ፓቲሌ ማይንቲ፥ ቃዪ ዬኤኩዋቴ።

9 ናንጊና ናንጋ ጎዳ ሂዚ ጋዓኔ፦ «ዬኖና ካኣቲንታ ዶንዞንታይዳ ዒጊቹሞ ጌላንዳኔ፤ ቄኤሳ ዒጊጪ ጎጋይቃንዳኔ፤ ታ ማሊፆ ኬኤዛ ዓሳኣ ዲቃታንዳኔ።»

10 ታኣኒ ዒማና፦ «ናንጊና ናንጋ ጎዳ ማዔ ፆኦዛሢዮ! ዬይ ዬሩሳላሜ ዴሮ ጌሺሢ ማዓዓዳ? ‹ዒንሢም ኮሺ ማዓንዳኔ› ኔ ጌዔያንቴ፤ ሃሢ ጊንሣ ‹ጬንቻ ዓፓሮ ሆላ ዔያቶኮ ጌሢንቴኔ› ታ ጌዔም ጊኢጋንዳ?» ጌዔኔ።

11 ዒማና ሃያ፥ ዒስራዔኤሌ ዴሮም ሂዚ ጌይ ኬኤዚንታንዳኔ፦ «ታኣኮ ዴሮይዳ ሙሙዓ ዖይዺ ዢባሬ ዓሲ ናንጉዋ ዳውሎ ዹካፓ ዢባርሻንዳኔ፤ ዬይ ፒዺሲ፥ ጊንሣ ሃሣ ሶኦሪ ጌጌኤሻ ዢባሬቱዋሴ።

12 ናንጊና ናንጋ ጎዳ ዓይሤም ሙካ ዢባሬታሢሮ ቢያ ዢባሬፓ ዶዳያ ማዓንዳኔ፤ ዬያ ዔያቶይዳ ጌስቲ ዎጌሢ ታ ቶኦኪና ታና፥ ናንጊና ናንጋ ጎዳኬ።»

13 «ሃይሾ ሞርኮኮ ዖሎ ዓሳ ሻኣሬጉዲ ሙካኔ፤ ዔያቶኮ ዖሎ ሳርጌሎ ዖይታ ዓልጎጉዲ ሩኡራያኬ፤ ዔያቶኮ ፓራሢያ ኮኦኬፓ ባሼ ባራናያኬ፤ ኑና ባዴዔ! ኑ ኩዴኔ!»

14 ዬሩሳላሜ! ዻቂንታ ኔ ኮዔቴ ፑርቱሞ ቢያ ኔኤኮ ዒናፓ ማስኪ ባይዜ፤ ሂንዳ ኮሺ ዋይዜ ጎሜ ማሊሢ ኔ ዒናፓ ባይቁዋዖ ዴዓሢ ዎማ ሄላንዳኣናዳይ?

15 ዳኣኔ ዓጮና ዔፕሬኤሜ ጌሜሮናፓ ፑርታ ባኣዚ ኬኤዛኒ ዒላታ ዒላቲ ዑኡሲ ዋይዚንታኔ፤

16 ዪሁዳ ካታሞ ጌሊ ዓርቃኒ ኮዓ ሞርካ ዖልዚ ቡላኒ ኬኤዚ ኬኤዚ ሃኬ ዓጪፓ ሙኪዳ ዓኣሢ ዴሮም ዔርዙዋቴ! ዬሩሳላሜ ዴሮማኣ ኬኤዙዋቴ!

17 ዴራ ናንጊና ናንጋ ጎዳም ዋይዞ ዒፄሢሮ ጎሺዳ ሌዖ ሃኣኮ ካፓ ዓሲ ጎይሢ ዬሩሳላሜ ሞርካ ማንጋንዳኔ፤ ዬያ ጌዔሢ ታና፥ ናንጊና ናንጋ ጎዳኬ።

18 ዪሁዳ! ዬይ ቢያ ኔና ሄሌሢ ኔ ሃንታ ሃንቲፆና ኔኤኮ ፑርቶ ማዾ ዛሎናኬ፤ ዬይ ቢያ ጫንጮ ሜታሢ ኔጊዳ ሙኬሢ ኔ ጎሞ ዛሎና ማዔሢሮ ኔ ዑፆ ጌሊ ዒኖ ኔኤኮ ኪፃሴኔ።

19 ሃያጉዴ ባኣዚ! ታ ዎዎይታንዳይ! ሃያ ቢያ ሜቶ ታ ዎዲ ጊቢ ዳንዳዓንዳይ! ቻዓ ታ ሳዜሌ! ታኣኮ ሳዛ ዎዚ ሩኡሪ ዹዓይ? ዛዬ ዑኡሲና ዖልዚ ዑኡሲና ታ ዋይዚ ዋይዚ ዚቲ ጌይ ጊባኒ ታ ዳንዳዑዋሴ።

20 ባይዛ ዶርዓ ቃሲንቲ ቃሲንቲ ጊዳ ኬዳኔ፤ ሳዔላ ቢያ ባይቂ ዓሲ ናንጉዋ ካይዚ ማዔኔ፤ ኑኡኮ ዓፒሎና ማዦና ማኣራ ዶዒ ባይቂ ጋፔኔ፤ ጎኦቦ ዓፒላኣ ዓኣፒ ጊኢጳማጉዴያና ዳርዒ ባይቄኔ።

21 ዖልዚ ባንዲራ ዡጊንታሢ ዖልዚ ዛዬ ዑኡሲያ ዋይዚንታሢ ዓይዲ ሄላንዳኣና ታ ዋይዚ ዋይዚ ናንጋንዳይ?

22 ናንጊና ናንጋ ጎዳ ሂዚ ጋዓኔ፦ «ታኣኮ ዴራ ታና ዔሩዋያ፥ ዔኤያ ማዔኔ፤ ጶቂሢ ዔራ ባኣዚ ባኣሢሮ ናይጉዲ ጌሺንታያ ዔያታ ማዔኔ፤ ፑርታ ባኣዚ ማዻኒ ዓሲ ዔሩዋ ጎይሢ ጪንጮኬ፤ ኮሺ ባኣዚ ማዻኒ ጋዓንቴ ፔቴታዖ ዔያታ ዳንዳዑዋሴ።»

23 ሳዖ ታኣኒ ዛጌኔ፤ ጋዓንቴ ሃይማኬ ጌይ ዔርታ ባኣዚ ባኣያ ሃሣ ፔቴታዖ ዔኤቢባኣያ ጉሪ ማዒ ዓኣኔ፤ ጫሪንጮዋ ታኣኒ ዛጌኔ፤ ዒኢካ ፖዒ ጋዓ ባኣዚያ ጴዹዋሴ።

24 ዹኮ ታኣኒ ዛጌኔ፤ ዔያታ ጎጋይቂሢዳኬ፤ ጌሜሮዋ ታ ዛጌኔ፤ ካራ ባይዚ ሴካ ሃንጋ ጌይሢዳኬ።

25 ዓሲ ጋዓ ባኣዚ ባኣሢያ ታ ዴንቄኔ፤ ካፓ ዒኢካፓ ቢያ ባራኒ ዴንዲ ባይቄኔ።

26 ዓኣዔ ሳዓ ዳውሌ ቦኦሊ ማዒ ላኣሚንቴኔ፤ ናንጊና ናንጋ ጎዳኮ ዼኤፖ ዻጋፓ ዔቄያና ካታማ ቢያ ዶዒ ባይቄኔ።

27 ሳዔላ ዓሲ ናንጉዋ ዳውሌ ቦኦሊ ማዓንዳሢ፤ ጋዓንቴ ጋፒሲ ዒ ባይዚንዱዋኣሢ ናንጊና ናንጋ ጎዳ ኬኤዜኔ።

28 ሳዓ ዬዬኤካኔ፤ ጫሪንጫኣ ዹሚና ዓኣቺንታንዳኔ፤ ዬያ ናንጊና ናንጋ ጎዳ ጌዔኔ፤ ዒ ጌዔ ባካ ሺራያቱዋሴ፤ ዒዚ ጋፒ ጌስቲ ቱኬኔ፤ ጊንሢም ዒ ማዓያቱዋሴ።

29 ፓራሢና ዖላ ዓሶንታ ሂኢዦና ዱካ ዓሶንታኮ ካኣኖ ዋይዛዖ ካታማ ናንጋ ዓሳ ቢያ ጳሽኪ ፑናንዳኔ፤ ፔቴ ፔቴ ዓሳ ካይዚ ጳሽካንዳኔ፤ ዛላ ጊንሣ ዼኤፖ ላሎ ሹጮ ጊዓንዳኔ፤ ፔቴ ፔቴ ካታማ ዓሲ ናንጉዋ ባዔ ቤሲ ማዓንዳኔ፤ ዒኢካ ናንጋንዳ ዓሲ ጴዺንዱዋሴ።

30 ባይቃኒ ጊኢጌዜ፥ ዬሩሳላሜ! ኔና ባዴዔ! ኔኤኒ ዞቄ ማኣዓሢ ማይንቴሢ ዓይጎሮዳይ? ኔኤኒ ፓልሚንቲ ዓኣፖዋ ቲሽኪ ሚዛጲሴሢ ዓይጎሮዳይ? ኔኤና ኮኦማ፥ ኔኤኮ ላጋ ኔና ዒፂ ዎዻኒ ኮዓኔ።

31 ሾይቺ ዓርቄ ላኣሊ ዒላታ ዑኡሲጉዴያ ታ ዋይዜኔ፤ ሾይ ቤቂባኣዖ ቤርቲ ናይ ሾዓ ላኣሊ ዒላታ ዑኡሲጉዴያ ዒላቲ ታ ዋይዜኔ፤ ዬይ ዑኡዛ ዒስራዔኤሌኮ ዑኡዛ ቲቂንቴም ፔኤኮ ኩጮ ሌካ ዔቂሲ «ባዴዔ ታና! ታ ጋፔኔ! ሃይሾ ታና ዔያታ ዎዻኒ ሙኬኔ!» ጌይ ጌይ ዒላታ ዑኡዞኬ።