Jeremiah 31 in Maale
1 ናንጊና ናንጋ ጎዳ ሂዚ ጋዓኔ፦ «ታኣኒ ዒስራዔኤሌ ፃጶኮ ቢያ ፆኦሲ ማዓንዳያና ዔያታኣ ታዴሬ ማዓንዳ ዎዴ ሙካንዳኔ፤
2 ጬንቾ ዓራፖና ሃይቦይዳፓ ቶሌ ዴራ ቦኦሎ ጉሮይዳ ቦንቺንታንዳኔ፤ ታኣኒያ ዒስራዔኤሌ ዴሮም ሃውሾ ዒንጋኒ ሙካንዳኔ።
3 ታኣኒ ዔያቶም ሃኬፓ ፔጋዺ ጴዼኔ፤ ዒስራዔኤሌ ዴሬዮቴ፥ ታኣኒ ዒንሢ ናንጊና ናሽኬኔ፤ ታኣኮ ናንጊና ናንጋ ኮሹማ ዒንሢም ዶዲ ዴዓንዳኔ።
4 ታ ዴሬዮ ዒስራዔኤሌ፥ ላሚ ጊንሣ ዒንሢ ታኣኒ ዓካሲ ማዣንዳኔ፤ ዬያሮ ኔኤኒ ማዢንታንዳኔ፤ ጊንሣ ኔኤኒ ካራቤ ዔካንዳኔ፤ ዎዛዻ ዓሶና ዎላ ኬስኪ ኔኤኒ ኮርጋንዳኔ።
5 ጊንሣ ኔኤኒ ሳማሪያኮ ጌሜሮይዳ ዎይኖ ቱካንዳኔ፤ ዬያ ዓኣፖ ማዺ ላቤ ዓሳ ሙዓንዳኔ፤
6 ዬያ ጎዦ ካፓ ዓሳ ዔፕሬኤሜ ዹኮይዳ ዔቂ፦ ‹ሃኒ ዬዑዋቴ፤ ኑ ፆኦዛሢ ማዔ ናንጊና ናንጋ ጎዳ ዓኣ ቤዞ ፂዮኔ ኑኡኒ ዴንዶም› ጋዓንዳ ዎዴ ዬዓንዳኔ።»
7 ናንጊና ናንጋ ጎዳ ሂዚ ጋዓኔ፦ «ሜሌ ዴሮ ቢያይዳፓ ኔኤኒ ባሻያታሢሮ ያይቆኦቤ ዛሎ ዎዛና ዓይናዹዋቴ፤ ‹ናንጊና ናንጋ ጎዳ ፔኤኮ ዴሮ ዓውሴኔ፤ ዒስራዔኤሌ ሳዖይዳ ዓቲ ዓኣ ዓሶ ቢያ ፔ ዓሲ ማሂ ዔኬኔ› ጌይ ጌይ ጋላታ ዓይኑሞ ዓይናዹዋቴ።»
8 «ታኣኒ ዓጮኮ ኬዶ ዛላፓ ዔያቶ ዔኪ ዬዓንዳኔ፤ ዓጫ ማዔ ካራፓ ቢያ ዔኪ ዬይ ቡኩሳንዳኔ፤ ዓኣፓ ባይቄ ዓሳ፥ ዎቦ ዓሳ፥ ጎጶይንዳሢንታ ሾይፆና ዓዺንቴ ላኣላኣ ቢያ ዔያቶና ዎላ ዬዓንዳኔ፤ ዺቢ ዴሬ ማዒ ፔ ዓጮ ዔያታ ማዓንዳኔ፤
9 ታኣኒ ዔያቶ ፔ ዓጮ ባንሢ ዔኪ ዬዓኣና ታኣኮ ዴራ ዎዛፓ ዔቄያና ዬኤኪ ዬኤኪ፤ ሃሣ ታና ሺኢቂ ሺኢቂ ዬዓንዳኔ። ዔያታ ዹቂንቲንዱዋ፥ ጊኢጋ ጎይሢና ቃራ ዓልቃ ዋኣሢ ባንሢ ታ ዔያቶ ዳካንዳኔ። ታኣኒ ዒስራዔኤሌኮ ዓዶኬ፤ ዔፕሬኤሜያ ታኣኮ ናኣዚ ቶይዲኬ።»
10 ናንጊና ናንጋ ጎዳ ሂዚ ጋዓኔ፦ «ሜሌ ዴራ ዒንሢ ዋይዙዋቴ! ባዞ ዼኤፖኮ ኮይሎና ሱኮናይዳ ሃኬ ዓኣ ዓጮም ቃኣሎ ታኣሲ ዼጊዲ ኬኤዙዋቴ፤ ታኣኒ ታኣኮ ዴሮ ሃያኮ ቤርታ ዜርቄኔ፤ ሃሢ ጋዓንቴ ታ ማሂ ዔኪ ዬይ ዔያቶ ቡኩሳንዳኔ፤ ቆልሞ ሄንቃሢ ፔኤኮ ቆልሞ ሄንቃ ጎይፆ ታ ዔያቶ ሄንቃንዳኔ።
11 ታኣኒ ያይቆኦቤ ማሂ ጊንሣ ሻንቂ ዓይላታፓ ኬሴኔ፤ ዼኤፖ ካኣቶኮ ኩጫፓ ማኣዲ ታ ዔያቶ ዻቂሼኔ፤
12 ዬያሮ ዔያታ ማዒ ሙኪ ፂዮኔ ዹኮይዳ ዎዛና ዓይናዻንዳኔ፤ ታኣኒ ዔያቶም ዒንጋንዳ ሃኣኮና፥ ዎይኖ ዑዦና፥ ሪሚቶ ዛይቶና ማራቶና ባኣቶናፓ ዔያታ ዴንቃ ዓንጆና ቢያ ሜታባኣያ ዎዛዻንዳኔ፤ ጊዳ ዋኣሢ ሙኪ ዑሻ ዎይኔ ጎሺጉዲ ዔያታ ማዓንዳኔ፤ ሃይካፓ ሴካ ዔያታ ዖያዓኬ።
13 ዉዱሮ ናኣታ ዔያቶኮ ዎዛና ኮርጋንዳኔ፤ ዓቲንቆንታ ዼጌሢንታ ጋርቾንታ ዎዛዻንዳኔ፤ ታ ዔያቶ ዶዲሻንዳኔ፤ ዬኤፖ ታ ዔያቶኮ ዎዛ ባንሢ ዖዪፆዋ ታ ዔያቶኮ ሺርሺ ዎዛ ማሂ ላኣማንዳኔ፤
14 ቄኤሶ ታኣኒ ሳዖይዳፓ ጴዻ ዓንጆና ሚሻንዳኔ፤ ታ ዴሮም ታኣኒ ታ ኮሹሞና ዒንጋ ባኮ ዺቢሺ ዒንጋንዳኔ፤ ዬያ ጌዔሢ ታና፥ ናንጊና ናንጋ ጎዳኬ።»
15 ናንጊና ናንጋ ጎዳ ሂዚ ጋዓኔ፦ «ዒላቲና ዒናፓ ዬኤኮ ዬኤፒ ዑኡሲ ራኣማይዳ ዋይዚንቴኔ፤ ራሄላ ፔ ናኣቶ ዛሎ ዬኤካኔ፤ ናኣታ ዒዞኮ ሃይቄሢሮ ዶዲፆ ባሺንቴኔ።
16 ዬኤፖ ሃሺ፥ ዓቢፆ ዒንሢኮ ዑጩዋቴ፤ ዒንሢ ናኣቶ ዛሎ ዒንሢ ማዼ ባካ ቢያ ጉሪ ዓታዓኬ፤ ዔያታ ሞርኮ ዓጫፓ ማዒ ዬዓንዳኔ።
17 ናኣታ ዒንሢኮ ፔ ዓጮ ማዒ ሙካንዳሢሮ ሃጊ ማዓንዳ ዎዛ ዒንሢኮ ዓኣኔ፤ ዬያ ጌዔሢ ታና፥ ናንጊና ናንጋ ጎዳኬ።»
18 «ዔፕሬኤሜ ዖዪሢና ሂዚ ጋዓንቴ ታኣኒ ዋይዜኔ፤ ‹ናንጊና ናንጋ ጎዳሢዮ! ኑኡኒ ጎሽኪ ዔርዚቦኦ ዎፓናጉዲታንቴ ኔኤኒ ኑና ዓይሢንቲሢ ዔርዜኔ፤ ኔኤኒ ኑኡኮ ፆኦሲታሢሮ ሃሢ ኔና፥ ኑ ፆኦዛሢ ባንሢ ኑና ማሄ፤ ኑኡኒያ ማዓንዳኔ።
19 ኔጊዳፓ ኑ ሃኪ ዴንዴቴያ ሃሢ ጎሞ ኑኡኮ ኑ ቡኡፄኔ፤ ኑ ዬያ ማዼ ባኮ ዔሪ ቦርሲንቲና ኑ ቶኦኮ ሂርኪዲ ዳዶ ኑኡኮ ኑ ዹዓኔ፤ ዼጋቶ ዎዶና ኑ ማዼ ጎማ ኑና ዻውሲሴኔ›»
20 «ዔፕሬኤሜ! ታኣኒ ዒንሢ ናሽካ፥ ታኣኮ ዒንሢ ናኣቶኬ፤ ቢያፓ ባሼ ማሂ ታ ዒንሢ ናሽካያቱዋዓዳ? ታ ዒንሢ ማኣራኒ፥ ታ ባንሢ ዑኪሳኒ ኮዓኔ፤ ዬያ ጋዓሢ ታና፥ ናንጊና ናንጋ ጎዳኬ።
21 ዒንሢኮ ጎይፆይዳ ማላታ ማዓንዳ ባኣዚ ኮሹዋቴ፤ ጎይፆ ዔርዛንዳ ዻኣቦዋ ዻኣቡዋቴ፤ ዒንሢ ዴንዳ ዚጊሮ ጎይፆ ዒናፓ ኮሺ ዛጉዋቴ፤ ታ ዴሬዮ፥ ዒስራዔኤሌ! ሃያ ኔኤኮ ካታሞ ማዒ ጌሉዋቴ።
22 ዒንሢ ሃይ ጉሙርቂፃ ፓጬ ዴራ ዓይዲ ሄላንዳኣና ዒንሢ ዓልታይ? ታኣኒ፥ ናንጊና ናንጋ ጎዳ ሳዖይዳ ዓኪ ባኣዚ ማዤኔ፤ ዬይ ዓይጎዳይ ጌዔቴ ላኣሊ ዓቲንቄ ማኣዳኒ ዔቃኔ፤ ዬያ ዱማ ማዔ ዓኮ ባኮ ታኣኒ ማዤኔ።»
23 ዒስራዔኤሌ ፆኦዛሢ፥ ቢያ ባኮ ዎይሣ ጎዳሢ ሂዚ ጋዓኔ፦ «ታኣኒ ዴሮ ፔ ዓጮ ባንሢ ማሄ ዎዶና ዪሁዳና ካታሞናይዳ ላሚ ጊንሣ ዔያታ ‹ኔኤኒ ጎኑሞ ዎርቃ ቤሲ ማዔዜ፥ ፆኦሲም ዱማዼ ዹኬሌ ናንጊና ናንጋ ጎዳ ኔና ዓንጆንጎ› ጋዓንዳኔ።
24 ዪሁዳ ዓጮንታ ካታሞንታ ቢያ ዴራ ናንጋ ቤሲ ማዓንዳኔ፤ ሳዖ ጎሽካ ዓሲና ቆልሞ ሄንቃ ዓሲና ዒኢካ ዓኣያ ማዓንዳኔ፤
25 ላቤዞንሢኮ ቢያ ዎልቆ ታኣኒ ዶዲሻንዳኔ፤ ናዮና ካራ ባይቂ ሜታዼዞንሢም ሙኡዚ ዒንጊ ታኣኒ ሚሻንዳኔ።»
26 ዒማና ታኣኒ ኮሺ ጊንዖ ጊንዒ፥ ጊንዓስካፓ ጴጫዖ ኮይሎ ዛጌኔ።
27 «ታኣኒ፥ ናንጊና ናንጋ ጎዳ ዒስራዔኤሌንታ ዪሁዳንታ ሳዖ ሚርጌ ዴሬና፤ ጊንሣ ሃሣ ቆልሞና ኩንሣንዳ ዎዴ ዬዓንዳኔ።
28 ዔያቶ ታኣኒ ቱጋኒና ሻሃኒ፤ ሴካ ሃንጋ ሺርሺ ጉኡፓኒና ባይዛኒ፤ ኩርሳኒያ ዚርቂ ዔቂ ማዼሢጉዲ ዔያቶ ጊንሣ ዾቂ ዔቂሳኒ ዒማዺ ታኣኒ ማዻንዳኔ።
29 ዬኖ ዎዶና፦ ‹ዓዶንሢ ሙዔ ሶልኮ ዎይኖ ዓኣፓ ናኣቶ ዓጮ ዎዼኔ› ጌይንቲ ጌስቲንታ ኮኦኪንሣ ዓታንዳኔ።
30 ዬያ ማዒፃ ዓቴም ሶልኮ ዎይኖ ዓኣፖ ሙዔ ዓሶማኮ ዒማና ዓጫ ሃይቃንዳኔ፤ ፔቴ ፔቴ ዓሳ ፔ ጎሞማና ሃይቃንዳኔ።»
31 ናንጊና ናንጋ ጎዳ ሂዚ ጋዓኔ፦ «ሃይሾ ታኣኒ ዒስራዔኤሌ ዴሮና ዪሁዳ ዴሮና ዎላ ዓኪ ጫኣቁሞ ጫኣቃንዳ ዎዴ ሙካንዳኔ፤
32 ዬይ ጫኣቁማ ዔያቶ ታኣኒ ጊብፄ ዓጫፓ ኩጮ ዔያቶኮ ዓርቂ ዔኪ ኬሴ ዎዶና ጌሌ ጫኣቁሞጉዲ ማዓዓኬ፤ ታኣኒ ዔያቶኮ ፆኦዛሢታንቴ ዔያታ ታኣኮ ዬያ ጫኣቁሞ ጉሙርቂንቲ ካፒባኣሴ፤ ዬያሮ ታኣኒ ዔያቶ ቄል ጌይ ዛጌኔ፤
33 ሃሢ ዓካሪ ሃካፓ ሴካ ዒስራዔኤሌ ዴሮና ዎላ ታኣኒ ጫኣቃንዳ ጫኣቁማ ያዺ ማዓንዳኔ፤ ታኣኮ ዎጎ ታኣኒ ዔያቶኮ ዒና ጌሣንዳኔ፤ ዒና ታ ዔያቶኮ ፃፃኣፓንዳኔ፤ ታኣኒ ዔያቶኮ ፆኦዛሢ ማዓንዳኔ፤ ዔያታኣ ታኣኮ ዴሬ ማዓንዳኔ፤
34 ሃይካፓ ሴካ ‹ናንጊና ናንጋ ጎዳ ዔሬ› ጌይ ፔኤኮ ላጋሢምታቴያ ጌርሲም ኬኤዚ ዔርዛንዳ ዓሲ ባኣሴ፤ ዼኤፖፓ ዴንዲ ዻኮ ዓሶ ጌይንታሢ ሄላንዳኣና ቢያሢ ታና ዔራንዳኔ፤ ዻቢንቶዋ ታ ዔያቶኮ ዓቶም ጋዓንዳኔ፤ ጎሞዋ ታ ዔያቶኮ ዔኤቢኬ ጌይ ማሊ ዔካዓኬ፤ ዬያ ጌዔሢ ታና፥ ናንጊና ናንጋ ጎዳኬ።»
35 ዓቦ ሮኦሮና ፖዒሣሢ ዓጊኖንታ ዦኦጋሢንታ ዹሞና ፖዓንዳጉዲ ዳምቦ ኬሴሢ ዼኤፖ ባዞዋ ዢባሮና ዴቺ ዓጊሣ፥ ናንጊና ናንጋ ጎዳሢ ሂዚ ጋዓኔ፤ ሱንፃኣ ዒዛኮ ቢያ ባኮ ማዤ ጎዳኬ።
36 ታኣኒ ዬያ ባኮ ዓይሢ ማዺሻ ዳምባ ዓታያ ማዔቴ፤ ዓካሪ ዒስራዔኤሌ ዜርፃ ታ ቤርታ ዴሬ ማዒ ናንጊና ናንጊፃ ዓታንዳኔ።
37 ዒዛኮ ዴራ፥ ዒስራዔኤሌ ማዼ ጎሞ ዛሎና ናንጊና ናንጋ ጎዳ ዔያቶ ኬኤራንዳኔ ጌይንታኒ ዳንዳዓሢ ጫሪንጮኮ ዳልጉማ ዋርቂንቲ ዔርቲ ሳዖኮዋ ማዢንቴ ካራ ቢያ ዛጊንቲ ዔርታኒ ዳንዳዒንቴቴ ሌሊኬ። ዬያ ጌዔሢ ናንጊና ናንጋ ጎዳኬ።
38 ናንጊና ናንጋ ጎዳ ሂዚ ጋዓኔ፦ «ሃናኒዔኤሌ ኬኤሎ ካራፓ ዓርቃዖ ዴንዲ ኬኤሎ ዲፃ ዎላ ካኣማ ካሮ ሄላንዳኣና ዬሩሳላሜ ታ ካታማ ማዒ ማዢንታንዳ ዎዴ ዬዓንዳኔ።
39 ዬያኮ ዛጳ ኬኤሎ ዲፃ ዎላ ካኣማ ካራፓ ጋሬቤ ጌሜሮ ባንሢ ዴንዳያ ማዓዖ ዒኢና ጎዓ ባንሢ ዴንዳንዳኔ።
40 ሼምፓ ሃይቄ ባኮንታ ዲቢንፆንታ ላኣሎ ዶኦጫ ቢያ ዓባ ኬስካ ባንፆና ዴንዲ ፓራሢ ካሮ ሄላንዳኣና ጉቤ ናንጊና ናንጋ ጎዳም ዱማዼያ ማዓንዳኔ፤ ዬይ ካታማ ማይ ላሚ ሻሂንቲ ባይቃዓኬ።»