Isaiah 54 in Maale

1 ናንጊና ናንጋ ጎዳ ሂዚ ጋዓኔ፦ «ኔኤኒ ዞኦኬሌ፥ ናይ ሾይ ዔሩዋዜሌ ዓይናዼ፤ ዒላሼ፥ ዎዛናኣ ዒላቴ፤ ኔኤኒ ባኒ ዔሩዋዜሌ፥ ዓኒ ዓኣዜሎፓ ባሼ ዒፂንቴዜሎ ናኣታ ሚርጋንዳኔ።»

2 ኔኤኒ ናንጋ ዓፒሎና ማዢንቴ ማኣሮ ኔኤኮ ዳልጊሼ፤ ኔኤኮ ጎኦቦ ዓፒሎዋ ቡሊ ዳሬ፥ ኩንዒሲፖ፤ ዓፒሎና ማዦ ማኣሮ ዳሮ ሱዞዋ ዖዶሴ፤ ፃውኖ ማዓ ዓንጎዋ ዶዲሼ።

3 ቢያ ዛሎና ዛጶ ኔኤኮ ኔ ዳልጊሻንዳኔ፤ ዜርፃ ኔኤኮ ሜሌ ዴሮ ዓጮ ዔካንዳኔ፤ ዶዔያ ማዔ ካታሞዋ ፔ ቤሲ ማሂ ናንጋንዳኔ።

4 ቦርሲንቲ ማዔቶዋ ዻውሲንቲ ኔና ሄሊንዱዋሢሮ ዒጊጪፖ፤ ሃጊ ኔ ዉዱሮ ዓኣንቴ ኔና ሄሌ ቦርሲንቶ ኔ ዋላንዳኔ፤ ዜኤሪ ዒንዶጉዲ ኔኤሮ ኔ ማዒ ዓኣሤ፥ ጫዦ ዎዶ ማሊ ኔ ጶቂሣዓኬ።

5 ኔኤኮ ዓኒ ኔና ማዤሢኬ፤ ሱንፃ ዒዛኮ ናንጊና ናንጋ ጎዳ ማዔ ፆኦዛሢኬ፤ ኔና ዓውሳሢ ዒስራዔኤሌኮ ዱማዼሢኬ፤ ዒዚ ዓጮ ቢያኮ ፆኦሲ ጌይንታኔ።

6 ኔኤኒ ዉዱሮታዖ ሎዔንቴ ዓኒ ዒፂ ዓንጄም ዒና ዖዬ ላኣሊጉዲኬ፤ ጋዓንቴ ናንጊና ናንጋ ጎዳ ማዔ ኔ ፆኦዛሢ ጊንሣ ኔና ፔ ባንሢ ዔኤሊ ሂዚ ጋዓኔ፦

7 ዻካ ዎዴም ሌሊ ታኣኒ ኔና ሃሼኔ፤ ጋዓንቴ ዼኤፒ ሚጪንቲሢና ታ ኔና ማሃንዳኔ።

8 ሚርጌና ታኣኒ ዻጋዼሢሮ ዻካ ዎዴም ታ ኔና ሃሼኔ፤ ጋዓንቴ ታኣኮ ናንጊና ናንጋ ናሹሞና ታ ኔና ሚጪንታንዳኔ፤ ጋዓኔ፥ ኔና ዻቂሻ ናንጊና ናንጋ ጎዳሢ።

9 « ‹ኖሄ ዎዶና ዓጮ ዋኣሢና ዔኤዺሲ ታ ባይዜሢጉዲ ላሚ ማይ ታ ሳዖ ባይዛዓ› ጌዒ ታ ጫኣቄሢጉዲ ሃሢያ ‹ኔ ጊዳ ላሚ ማይ ታ ዻጋዻዓኬ› ጌዒ ታ ኔኤም ጫኣቃኔ፤ ሃካፓ ሴካ ጎሪያ ታ ኔና ጎራዓኬ።

10 ዹኮንታ ጌሜሮንታ ዓጊፃኒና ዶዓኒ ዳንዳዓኔ፤ ታኣኒ ኔና ናሽካ ናሹማ ጋዓንቴ ናንጊና ዶዲ ናንጋንዳኔ፤ ኮሹሞ ጫኣቁሞ ናንጊና ታ ካፓንዳኔ» ጋዓኔ ኔና ሚጪንታ ናንጊና ናንጋ ጎዳሢ።

11 ናንጊና ናንጋ ጎዳ ሂዚ ጋዓኔ፦ «ኔኤኒ ዋኣዬዜ፥ ዓልጋሢ ዢባሮና ዓጊፄዜ፤ ዶዲሺንቲባኣ ዬሩሳላሜ ካታሜሌ! ታኣኒ ቦንቺንቴ ሹቺና ኔና ማዣንዳኔ፤ ማዢፆኮ ዓይፆ ሴኔፔሬ ሹጮ ጌሢ ታ ዓርቃንዳኔ።

12 ኔኤኮ ኬኤሎ ዲፆ ዑፃ ዓኣ ዼጌ ቤዞ ሜሬጊዴ ሹጮና ኬኤሎ ዲፆ ካሮዋ ዋልጪንቃ ሚዛጶ ሹጮና ዙሎ ሺሪ ዓኣዻ ዲሮዋ ቦንቺንቴ ሹጮና ታ ኔኤኮ ኬልቃንዳኔ።»

13 «ናኣታ ኔኤኮ ቢያ ናንጊና ናንጋ ጎዳይዳፓ ዔሬያ ማዓንዳኔ፤ ኔ ናኣቶም ኮሹሞ ሚርጌያ ማዓንዳኔ።

14 ፒዜ ዎጌና ጎኑሞናይዳ ዔቄያ ኔ ማዓንዳኔ፤ ጌኔ ማዾና ሄርቂ ዎይሥሢ ኔ ጊዳፓ ባይቃንዳኔ፤ ኔና ዒጊቻንዳ ባኣዚያ ባኣሴ፤ ዲቃሣ ባኣዚያ ኔኤፓ ሃካንዳኔ፥ ኔ ባንሢያ ዑካዓኬ።

15 ኔና ዖላኒ ዔቃያ ዓኣታቴ ታኣኒ ዔያቶ ዳኪባኣያታሢሮ ባሺንቲ ኩቺ ኔኤም ዒንጋንዳኔ።»

16 «ቃኣጮ ቄንፃ ዔኤታንዳጉዲ ጊልፖ ጊልፓ ዓንጎ ሼኤሻሢ ማዤሢ ታናኬ፤ ዒዚያ ዓንጎ ዹይ ዓንጋሞ ኮሻሢ ዬይ ዓንጋ ማዻንዳጉዲ ጌይንቴ ማዾ ማዻንዳጉዲኬ፤ ባይዛንዳጉዲ ባይዛሢያ ማዤሢ ታናኬ።

17 ኔና ባይዛኒ ኮሺንታ ዓንጋማ ፑርታንዳኔ፤ ኔና ሞኦታ ዓሶ ቢያ ኔኤኒ ላሣንዳኔ፤ ታ ዓይሎም ጌይንቴ ዓጫ ዬያኬ፤ ታ ጊዳፓ ዔያቶም ጴዻንዳ ፂሉማ ዬያኬ» ጋዓኔ፥ ናንጊና ናንጋ ጎዳሢ።