Isaiah 51 in Maale
1 ናንጊና ናንጋ ጎዳ ሂዚ ጋዓኔ፦ «ታናንታ ታኣኮ ፂሉሞዋ ኮዓዞንሢ ዋይዙዋቴ፤ ዒንሢ ዓርሲንቲ ኬስኬ ሹጫሢ ቦኦኪንቲ ዒንሢ ኬስኬ ዔታሢ ዛጉዋቴ።
2 ዒንሢኮ ዓዳሢ ዓብራሃሜንታ ዒንሢ ሾዔ ዒንዴሎ ሳኣራኣ ዛጉዋቴ፤ ዓብራሃሜ ታኣኒ ዔኤላኣና ናይ ዒዛኮ ባኣሴ፤ ጋዓንቴ ታኣኒ ዒዛ ዓንጄኔ፤ ዜርፆዋ ታ ዒዛም ሚርጊሼኔ።»
3 «ታኣኒ ናንጊና ናንጋ ጎዳ ፂዮኔንታ ዒዞኮ ጉሪ ሳዓ ማዔ ቤዞዋ ቢያ ዶዲሻንዳኔ፤ ዒዞኮ ዓሳ ናንጉዋ ዳውሎ ታኣኒ ዔዴኔ ዳውሎ ሳዖዋ ፆኦሲ ዱማ ዱማ ሚፆ ቱኬ ቤዞ ታ ማሃንዳኔ፤ ዒኢካ ኮሹሞና ዎዛና ዓኣያ ማዓንዳኔ፤ ጋላታ ዓይኑሞዋ ዓይናዺንታንዳኔ።»
4 «ታ ዴሬዮቴ! ዋይዙዋቴ! ታኣኒ ዒንሢም ጋዓሢ ዒና ዔኩዋቴ፤ ዎጌ ታ ኮራፓ ጴዻንዳኔ፤ ታኣኮ ዎጊፃ ታ ዴሮም ቢያ ፖዒ ማዓንዳኔ።
5 ታኣኒ ሩኡሪና ሙኪ ዒንሢ ዓውሳንዳኔ፤ ዓኣፒ ጊኢጳማና ታኣኒ ባሻንዳ ዎዴ ሙካንዳኔ፤ ታኣኮ ዎልቆና ዴሮ ቢያ ታኣኒ ዎይሣንዳኔ፤ ዋኣፆ ሳዛ ዓኣ ዓጮይዳ ናንጋ ዴራ ታና ሃጋኣ ዎዛ ማሂ ካፓኔ፤ ዔያታ ታኣኮ ዎልቆዋ ጉሙርቃኔ።
6 ዼጊ ጌዒ ሌካ ጫሪንጮ፥ ሊካ ሳዖዋ ዛጉዋቴ፤ ጫሪንጫ ጩቢጉዲ ላኣሊንቲ ባይቃንዳኔ፤ ሳዓ ዓዳ ማኣዖጉዲ ጪንቃንዳኔ፤ ዒዞይዳ ናንጋዞንሢያ ቢያ ዉፃሌጉዲ ሃይቃንዳኔ፤ ታኣኮ ዓውሲፃ ጋዓንቴ ናንጊና ናንጋያኬ፤ ታ ፂሉሞኮዋ ጋፒንሢ ባኣሴ።»
7 «ዒንሢ ፒዜ ማዔ ባኮ ዔራዞንሢና ታኣኮ ዎጋ ዒንሢኮ ዒኖይዳ ዓኣ ዓሳኣ ዋይዙዋቴ፤ ዓሲኮ ቦሂፆ ዒጊጪፖቴ፤ ዔያቶኮ ጫዦና ዲቃቲፖቴ።
8 ዔያታ ቢላ ሙዔ ዓፒላጉዲ ዛኣሌ ሙዔ ሱኡፔ ዓፒላጉዲያ ማዓንዳኔ፤ ታኣኮ ዓውሲፃ ጋዓንቴ ናንጊና ናንጋያኬ፤ ታ ፂሉማ ሾይንቲፓ ሾይንቲ ሄላያኬ።»
9 ናንጊና ናንጋ ጎዳሢዮ! ዔቄ! ዔቂ ዎልቆ ኔኤኮ ፔጋሴ! ሚና ቤርታኣ ዎዶና ዓኣ ሾይንቶ ባኣካ ዓዳ ኔ ማዼ ጎይፆ ዔቄ፤ ሬዓቤ ጌይንታ ባዞ ቦዓሢ ጪርኬሢ ዼኤፖ ቃራሢያ ጫርጌሢ ኔናኬ።
10 ኔኤኒ ዓውሴ ዓሳ ባዞና ፒንቃንዳጉዲ ዼኤፖ ዋኣፆ ሚጪሲ ዬያይዴና ጎይሢ ኬሴሢ ኔናኬ።
11 ኔኤኒ ናንጊና ናንጋ ጎዳሢ ዓውሴ ዓሳ ቢያ ዎዛና ዓይናዺ፥ ዒላሺያ ዒላሺ ፂዮኔ ማዓንዳኔ፤ ዒኢካ ዔያታ ናንጊና ናንጋ ዎዛ ቶኦካ ዓጊ ቦንቺንታንዳኔ፤ ኮሹሞንታ ባይቁዋ ዎዛንታ ዔያታ ዴንቃንዳኔ፤ ዖዪሢንታ ዬኤፒንታ ዔያቶፓ ባይቃንዳኔ።
12 «ዒንሢ፥ ታ ዴሮ ዶዲሻሢ ታኣኒ ታኣሮኬ፤ ዓካሪ ማኣቲጉዲ ሹላያና ሃሃይቃ ዓሲ ዒንሢ ዒጊጫሢ ዓይጎሮዳይ?
13 ሳዖ ቦኦኮልቄሢና ጫሪንጮ ዳሬ ዒንሢ ማዤ ናንጊና ናንጋ ጎዳ ዒንሢ ዋሌኔ፤ ዒንሢ ባይዛኒ ጊኢጌ፥ ሄርቂ ዎይሣ ዓሶኮ ጎሪንቶሮ ቢያ ዎዴ ዒንሢ ዒጊቹሞና ናንጋኔ፤ ሃሢ ዔያቶኮ ጎሪንታ ዬይ ዓንካዳይ?
14 ቱኪንቲ ዓኣ ዓሳ ሩኡሪና ዓይላታፓ ኬስካንዳኔ፤ ዔያታ ቱኡቲ ዓኣ ዔቶይዳ ሃይቂንዱዋሴ፤ ዔያታ ሙዓንዳ ካሣኣ ባይቃዓኬ።»
15 «ዋኣፃ ዓጊፃንዳጉዲ ዼኤፖ ባዞ ዓጊሣሢ ታኣኒ ናንጊና ናንጋ ጎዳ ማዔ ዒንሢኮ ፆኦዛሢኬ፤ ሱንፃ ታኣኮ ቢያ ባኮ ዎይሣ ጎዳኬ።
16 ታኣኒ ታኣኮ ቃኣሎ ዻንጋ ኔኤኮ ጩታንዳኔ፤ ኔና ታኣኮ ኩጮ ሺቦና ታ ሺባንዳኔ፤ ጫሪንጮ ዳሬሢ፥ ሳዖዋ ቦኦኮልቄሢ ታናኬ፤ ፂዮኔም፦ ‹ኔኤኒ ታ ዴሬኬ› ታ ጋዓንዳኔ።»
17 ኔኤኒ ናንጊና ናንጋ ጎዳ ኩጫፓ ማሢ ጋኣዲሳ ጎሪንቶ ዑዦ ዼኤፖ ዓንጎና ጋፒሲ ዑሽኬ ዬሩሳላሜ! ጴጬ፤ ላዓ ጌዒ ዔቄ!
18 ኔኤኒ ሾዒ ዲቼ ናኣቶይዳፓ ቢያ ኩጮ ኔኤኮ ዓርቂ ዔኪ ዓኣዻንዳያ ጴዺባኣሴ።
19 ጊዳ ጊዳ ቃሲንታ ባይሲንታ ኔና ሄሌኔ፤ ዓካሪ ዖ ኔና ዶዲሻንዳይ? ዬይ ባካ ዶዒ ባይቂሢንታ ናይዚንታ ዖልዚንታኬ፤ ዬያሮ ታ ኔና ዎዲ ዶዲሻንዳይ?
20 ዓቲንቆ ናኣታ ኔኤኮ ዓዳ ፒሮይዳ ዓዺንቴ ጋፒሪጉዲ ጎይፆኮ ዓሳ ቡካ ጶኦካ ላቢንቲ ሎኦሜኔ፤ ዔያቶ ዑፃ ናንጊና ናንጋ ጎዳኮ ዻጋ ሾኦቴኔ፤ ኔ ፆኦዛሢኮዋ ጎሪንታ ኬዴኔ።
21 ዎይኖ ዑዦ ዑሽኪቱዋንቴ ጉሪ ማሢንቴ ሜታሢና ቡኡዲንቴ ዓሳ ሃያ ዋይዙዋቴ።
22 ናንጊና ናንጋ ጎዳሢ ፔ ዴሮ ዛሎ ሞኦታ ዒንሢ ፆኦዛሢ ሂዚ ጋዓኔ፦ «ዓዳ ማሢንቴ ዓሲጉዲ ጋኣዲሳ ሜታሢ ዑዦ ዓንጎ ታ ዒንሢ ኩጫፓ ዔኬኔ፤ ሃካፓ ሴካ ዬያ ዑዦ ዓንጋፓ ዒንሢ ዑሽካዓኬ።
23 ዬያ ታኣኒ ዔኪ ኔና ሜታሳ ዓሶም ዒንጌኔ፤ ዔያታ፦ ‹ኑ ኔ ጊዴና ሄርቂ ሃንታንዳጉዲ ላሄ› ጌዔኔ፤ ኔኤኒያ ዔያታ ሃንታንዳጉዲ ዙሎ ኔኤኮ ዔያቶም ሃሼኔ።»