1 Peter 3 in Limbu
1 हे़क्केलॽरिक् हिम्सामासे, खिनिॽ हिम्साबाहाॽरे़ खुनिॽ युक्को वये़म्मे़ॽओ, थेआङ्भे़ल्ले़ खे़ङ्हाॽओ कुभा निङ्वाॽफु पाःन्जाक् नसाःन् मे़न्जोःक्मनाबा मे़जोःक्साङ् खिनिॽ थेआङ् मे़म्मे़त्ते सेसेबा हिङ्मन्निन् नु निङ्वाॽफुमाङ्ङिन् इङ्धाःङ् के़बिरुम्बा खे़ङ्हाॽरे़ मे़निःसुआङ् निङ्वाॽफुमाङ्ङिन् नसाःन् चोःक्मा मे़सुक्तुॽरो॥
3 खिनिॽग परिक्परिक्पा थाःक् फःमान्, साम्म्याङ् वाःत्तिहाॽ वाःप्मान् नु इमे़ल्लुङ्बा ना-ना परिक्पा चाङ्हाॽ चाङ्मान्, लाःक्कात्लाम्बा के़धाःप्पा चोःक्सिङ्मो मे़ःन्,
4 कर खिनिॽ नुःमाङ्ग आप्फाल्ले़आङ् मे़म्माःमनाबा सुम्सुम् ये़क्ये़क् नु नःम्नःम् लॽमान्सिगाङ्लाम्बाए निधाःप्ल पोःङ्लो॥ खे़ङ्ग निङ्वाॽफुमाङ्ङिल्ले़ कुनिःमाओ इमे़ल्लुङ्बा चोःक्लो॥
5 थेआङ्भे़ल्ले़ निङ्वाॽफुमाङ्ङिन् ताःक्पो के़जोःक्मा उन्छेःन्समा सेसे मे़न्छुमाहाॽरे़आङ् हे़क्केलॽरिक्के नुःमा मे़जोःक्सिङ्ङाङ् मे़वये़, हे़क्क्याङ् खे़ङ्हाॽ आबाङे हिम्साबाहाॽरे़ खुनिॽ युक्को मे़वये़रो॥
6 कुबिओ सारारे़ कुहिम्साबा अब्राहाम्मिल्ले़ कुबाःन्निन् खे़प्सुआङ् खुने़ॽ आदाङ्बे लॽरिक् मे़त्तुरो॥ खिनिॽआङ् मे़ङ्गिए नुःबा याःम्बक् के़जोगुम्ने़ फाॽग्र खिनिॽ सारारे़ कुस्साः मे़न्छुमाॽनिङ्लो॥
7 हिम्साबासे, खिनिॽआङ् खिनिॽ हिम्सामाहाॽनु सोरिक् के़वयिल्ले़ इङ्धाःङ् पिरे़म्सिम्मे़ॽर तङे़म्मे़ॽआङ् वये़म्मे़ॽओ॥ खिनिॽ हे़क्के के़धुम्मा मे़न्जोःक्ने़न्छाङ् निङ्वाॽफुमाङ्ङिल्ले़ आबिबा कुसङ् हिङ्मन्नो खे़ङ्हाॽग खिनिॽ लक्सामासिरो॥ हे़क्केलॽरिक् खिनिॽ तुवाःन् थेःल्ले़आङ् मे़धेःक्तुन्ल फाॽआङ् नुःरिक् मे़त्ते़म्सिम्मे़ॽओ॥
8 कुनुप्मो, खिनिॽ निङ्वाॽओ काक् थिक्हुप् पोःक्खे़म्मे़ॽ, लुङ्माॽ तुक्कासिम्मे़ॽ, मिःम्जि मे़त्तासिम्मे़ॽ, हाङ्हाङ्वा ओसेःन्धाक्कासिम्मे़ॽ हे़क्क्याङ् चुङ्जिगे़न् नःम्नःम् पोःक्खे़म्मे़ॽओ॥
9 फे़न् पाःन्निल्ले़ कुले़क्वा फे़न् पाःन् मे़जोगे़म्मिन्ने़ॽ, किनाःन्दिःल्ले़ कुले़क्वा किनाःन्दि मे़बिरे़म्सिम्मिन्ने़ॽ, कर खे़ल्ले़ कुले़क्वाग मुॽइसाम् पिरे़म्सिम्मे़ॽ॥ थेआङ्भे़ल्ले़ निङ्वाॽफुमाङ्ङिल्ले़ खिनिॽ मुॽइसाम् पिसे़ के़उःत्तिआङ् वाॽरो॥
10 थेआङ्भे़ल्ले़ साम्योसाप्लाओ अक्खेलॽरिक् साप्ते़आङ् पत्, “हिङ्मन्निन् मिःम्जि के़मे़प्पाआङ् सुये़न्हाॽ ओमे़प्मा निङ्वाॽ के़जोःक्पाल्ले़ फे़न् पाःन् पाःप्मा नु इङ्ले़क् पाःन् पाःप्मा मे़नुॽने़न्॥
11 खे़ल्ले़ फे़न् याःम्बक् चोःक्मा ले़प्माआङ् नुःबा याःम्बक् चोःक्मा पोःङ्॥ सनारुङ्ङो वाॽमा तम्सिन् चोगुर पोःङ् हे़क्क्याङ् हाबा खे़न् पाःन्नो पप्माए पोःङ्लो॥
12 थेआङ्भे़ल्ले़ दाङ्बाल्ले़ साम्योनिबा मनाहाॽ कम्ब्राङ् मे़त्तुसिॽ, हे़क्क्याङ् खे़ङ्हाॽरे़ खुनिॽ तुवाःन् खे़प्सुॽ, कर ताप्फे़ःम्बा याःम्बक् के़जोःक्पाहाॽरे़ खुनिॽ तक्ले़ङ्वाओ निङ्वाॽफुमाङ्ङिन् पोःक्लो॥”
13 खिनिॽ नुःबा याःम्बक् चोःक्मा सिक् सम्बाल्ले़ से़क्खाए आत्तिल्ले़आङ् खाःम्मा के़न्छुक्तिन्लो॥
14 कर नुःबा के़जोगुम्मिल्ले़ इनोगे़न् तुक्खे के़दुमुम्ने़ फाॽग्र निङ्वाॽफुमाङ्ङिल्ले़ मुॽइसाम् के़बिरिॽरो॥ खे़ल्ले़ चोगुल्ले़ “वेॽहाॽनु मे़गिसे़म्मिन्ने़ॽ हे़क्क्याङ् निङ्साम्मोआङ् मे़ध्ये़म्मिन्ने़ॽओ॥”
15 कर खिनिॽ हिङ्मन्नो ख्रिस्ते़न्दाङ्बा लॽरिक् सेवा चोगे़म्मे़ॽओ॥ हे़क्क्याङ् खिनिॽ के़गत्तुम्बा निङ्साङ्ङिल्ले़ कुयाःम्बेओ सेःन्गे़म्लाप्तिल्ले़ लुम्लुम्माङ्इङ्धाःङ्ङिन्नु नोगप् पिमा सदादिङ् यारिप् पोःक्खे़म्मे़ॽआङ् वये़म्मे़ॽओ॥
16 हे़क्केलॽरिक् खिनिॽ तक्ले़ङ्वाओ फे़न् पाःन् के़बाःप्पाहाॽरे़ ख्रिस्तओबा खिनिॽ नुःबा ये़प्ले़क्किन् मनाहाॽरे़ मे़निःसुआङ् खे़ङ्हाॽ सिरिङ् मे़मर फाॽआङ् सेसे खासिङ् कत्ते़म्मे़ॽओ॥
17 निङ्वाॽफुमाङ्ङिल्ले़ निङ्वाॽ चोगुॽने़ फाॽग्र फे़न् याःम्बक् चोःक्माआङ् इनोगे़न् तुक्खे चामानुःल्ले़ नुःबा याःम्बक् चोःक्माआङ् इनोगे़न् तुक्खेओ थामाए नुःबा पोःङ्लो॥
18 थेआङ्भे़ल्ले़ ख्रिस्तरे़आङ् निङ्वाॽफुमाङ्ङो ताःत्छे़ आनिॽ लायोहाॽ सदादिङ् ले़प्मि पिमा फाॽआङ् थिक्ले़ङ् स्ये़रो॥ साम्योनिबा ख्रिस्ते़न्लायोबारे़ कुले़क्वा स्ये़रो॥ खुने़ॽ नासिङ्गे़न् थक्को स्ये़, कर सेसेमाङ्ङोलाम् याम्मो हिङे़रो॥
19 बा कन् सेसेमाङ्लाम् पेआङ् खुने़ॽ पुङ्लाहिम्मो के़याक्पा फे़न्साम्हाॽ इङ्भोःसुसिरो॥
20 खे़ङ्हाॽरे़ग उन्छेःन् नुहाःल्ले़ वालाधा चोगुल्ले़, निङ्वाॽफुमाङ्ङिल्ले़ नासि थःत्तुसिआङ् हाङ्घुसिल्ले़, निङ्वाॽफुमाङ्ङिल्ले़ कुबाःन् खे़म्मा मे़न्दे़न्दे़न्नाङ् मे़वये़रो॥ खे़प्मो ये़त्छि मनाहाॽरक् किप्मा के़घुःबा वादोःक्मोलाम् ताङ्मे़से़ःप्ते़आङ् मे़वये़॥
21 कन् वादोःक्किले़न् च्वाःत्तिङ्ग ताङ्गे़से़ःप्तिबा बप्तिस्माल्ले़ कुबि हे़क्तङ्बारो, कङ्ग थक्कोलाम् माक्ख्रक्किन् वागे़हप्तुम्बा हे़क्केग मे़ःन्, कर सेसे खासिङ्लाम्बा निङ्वाॽफुमाङ्ङो चोःक्मनाबा माङ्हे़क्लो॥ हे़क्क्याङ् खे़न् सेसे खासिङ्ङिङ्ग ये़सु ख्रिस्ते़न्सिःमे़न्लाम् याम्मो हिङे़बालाम् ताःरो॥
22 आल्ल ये़सु ख्रिस्ते़न्साङ्ग्राम्पेदाङ्ङो पेआङ् निङ्वाॽफुमाङ्ङिल्ले़ कुजुप्साङ् ले़प्माङ् युङ्, हे़क्क्याङ् माङ्लाइङ्बाहाॽ, युक्साबाहाॽ नु मुक्साम्हाॽ कुयुक्को कत्तुसिरो॥