Hebrews 1 in Kenga

1 Do dɔkin̰ se, Raa lee taaɗo ɓugjege tu ute taar jee taaɗ taar teeco taar Raa ki se mɛt dɛna ɔɔ ute ɗoobm jeege dɛna.

2 Gaŋ ɓɔrse se maakŋ ɓiige tun kaam mɔɔtn ara se, naan̰ taaɗjekiga ute ɗoobm Goonin̰a ɔɔ Goonin̰ se ɓo, naan̰ bɛɛr ɔndin̰o ɔɔ ɛɗin̰ga nakge paac kaam jin̰a. Ɔɔ ute ɗoobm Goonin̰ se ɓo naan̰ aalo nakgen ɓaa se paac kici.

3 Goon ese se ɓo kɛn taaɗ *nookŋ Raa kɛn wɔɔr gɔtɔ kɛlɛŋ ɔɔ naan̰ se tec Raa mala mala. Ute taar naan̰ kɛn ɔk tɔɔgɔ se ɓo, nakgen ɓaa se paac naan̰ tɛɗɗe utu tiŋg gɔtɗe ki. Kɛn naan̰ jaay tug *kusin̰ jikilimge aas sum se, naan̰ ook ɓaa iŋg maakŋ raa ki do ji daam Raa Sidburku ki.

4 Goonin̰ se, Raa ɔndin̰ga raan do kɔɗn Raage tu ɔɔ bin ɓo ro kɛn Raa ɛɗin̰ se, cir gɛn kɔɗn Raage.

5 Taa ɓii kalaŋ tap ɓo Raa taaɗ te kɔɗin̰ kɛn gam eyo, kɛn an̰ ɗeekŋ ɔɔ: Naai se, ꞋGoomuma, jaaki maam mꞋtaaɗn naan jeege tu paac maam ɓo mꞋBubi. Tɛr daala kɔɗn Raa kɛn gam tap ɓo Raa taaɗin̰ te eyo, kɛn an̰ ɗeekŋ ɔɔ: Maam se mꞋtɛɗn Bubi ɔɔ naai lɛ am Ꞌtɛɗn goonuma.

6 Num tɛr daala, kaaɗ kɛn naan̰ ɔlo Goon paragin̰ do duni ki se, naan̰ ɗeek ɔɔ: Ɔn̰ kɔɗumge paac kɛrɛgŋ naanin̰ ki.

7 Gɛn kɔɗin̰ge se Raa taaɗ ɔɔ: Naaɗe se jee tɛɗn naabumge, naaɗe se tec aan gɔɔ kuulu ɔɔ aan gɔɔ rɔɔn̰ pooɗo.

8 Num gɛn Goonin̰ ki se, Raa taaɗin̰ ɔɔ: Gaar naai Raa se tiŋg gɛn daayum, ɔɔ jeeige se lɛ, naai tɔɔɗɗe ute ɗoobm daan ki.

9 Naai lɛ Ꞌje nakŋ ute ɗoobin̰a ɔɔ nakŋ *kusin̰ se naai ɔɔɗ undin̰ naatn. Taa naan̰ se ɓo Bubi Raa, naan̰ ɔɔyiga uubu doi ki gɛn maak‑raapo kɛn taaɗ ɔɔ naai se gaarge ɔɔ maakŋ parige tu se naai ɓo magal cirɗe.

10 Tɛr Raa ɗeekin̰ daala ɔɔ: Kɛse ɓo naai, Mɛlje, do kupm mɛt ki se naai aalo do naaŋa ɔɔ maakŋ raa lɛ naai tɛɗin̰o te jii.

11 Nakgen se paac utu Ꞌtuju, gaŋ naai se tiŋg gɛn daayum. Ɗeere, maakŋ raa ute do naaŋa se utu Ꞌkooy koono aan gɔɔ kala.

12 Ɔɔ naai utu aɗen tuɗn aan gɔɔ kala ɔɔ utu aɗen pɛlɛkŋ aan gɔɔ kɛn kꞋlee kꞋpɛlɛkŋ kalge se. Num naai lɛ Ꞌtɛrl roi eyo ɔɔ daayum daayum naai iŋg gɔti ki.

13 Ɔɔ taa ɓii kalaŋ tap ɓo Raa taaɗ te kɔɗin̰ kɛn gam eyo, kɛn an̰ ɗeekŋ ɔɔ: ꞋƁaaɗo iŋg do ji daamum ki, bini jee taamooyige se maam mꞋaɗen Ꞌtɛɗn naai ɓo kiŋg doɗe ki.

14 Kɔɗn Raage se tap ɓo naaɗe naŋge? Naaɗe se jee kaan̰ naabm Raagen paacn̰ jꞋɔŋ jꞋaakɗen eyo, ɔɔ Raa ɔlɗeno se taa noogŋ jeegen kɛn Raa utu aɗen kaaja.