Hebrews 1 in Kaqchikel

1 Ri ojer can, ri Dios jalajoj tak tiempo y jalajoj rubanic xucusaj richin xch'o chique ri te'ej-tata'aj richin ri rutinamit, y ja ri profetas xerucusaj richin xek'alajrisan ri ruch'abel chiquivech.

2 Jac'a chupan ri ruq'uisbel tak tiempo ri rojc'o-vi, ri Dios ja ri Ruc'ajol rucusan richin nich'o chike, ri achok pa ruk'a' xuya-vi richin ntoc rajaf ronojel. Y mismo ri Ruc'ajol xucusaj richin rubanon ronojel ri xrojo' chi xec'uje'.

3 Riq'uin ri Ruc'ajol nitz'intz'ot-vi ri nimalaj ruk'ij ri Tata'aj, y tzak achel-achel ri Tata'aj, quiri' mismo ri Ruc'ajol, ri uc'uayon ronojel riq'uin ri rutzij ri c'o ruchuk'a'. Romari', tok ch'ajch'oj chic rubanon chike chuvech ri kamac, xtz'uye-apu chicaj pa rutz'uyubal pa ru-derecha ri nimalaj Rey ri can c'o ruk'ij.

4 Y achel x-an chi más c'o ruk'ij que chiquivech ri ángeles, quiri' mismo ri rubi' ri xyo'ox, más c'o rakale'n que chuvech quibi' ri ángeles.

5 Roma ri Dios man jun bey quire' ru'in che jun ángel: Rat, rat Nuc'ajol. Vacami xatinc'ut chiquivech chi ja yin ri yin yayon ac'aslen. Y pa ruvi' jun ángel man jun bey quire' ru'in: Yin, yin Tata'aj pa ruvi', Y rija' Nuc'ajol. Man jun bey ru'in quiri'.

6 Y jun bey chic ri Dios quire' nu'ij tok nutak choch'ulef ri Ruc'ajol ri más c'o ruk'ij que chiquivech conojel: Conojel ri nu-ángeles tiquiya' ruk'ij ri Nuc'ajol. Quiri' ri tz'iban can.

7 Jac'a pa quivi' ri ángeles, ri ruch'abel ri Dios quire' nu'ij: Ri ru-ángeles erusamajela' y nu'on chique achel cak'ik', Y achel ruxak-k'ak'.

8 Pero che ri Ruc'ajol, quire' nu'ij: Jumul-jumul xta'an gobernar, rat Dios, Y ri ruc'u'x ri a-gobierno ja chi pa ruchojmil na'an gobernar.

9 Nika chavech ri choj, y itzel natz'et ri man choj ta. Romari' ri Dios, ri a-Dios rat, (xuk'ej, xuk'ij) aceite pan avi'. Xu'on chave chi más xaquicot que chiquivech ri más chic (avachbil, avach'il).

10 Y jun chic ri xu'ij che ri Ruc'ajol, jare': Rat Ajaf, pa na'ey xa'an ri roch'ulef, Y riq'uin ak'a' xa'an-vi ronojel ri c'o chicaj.

11 Pero c'o na jun k'ij xqueq'uis, jac'a rat jumul ratc'o. Ri caj y ri roch'ulef xa yerijix, achel nitziakir jun tziek.

12 Xque'abus-e y xquejal-e achel ni'an che jun tziek. Jac'a rat, ja' achi-avech richin jumul, Man jun bey xcarijix. Quiri' xu'ij ri Dios.

13 Y ri Dios man jun bey quire' ru'in che jun ángel: Catz'uye-pe pa nu-derecha, C'a ja tok xquenya' chuxe' avakan ri itzel yatquitz'et. Man jun bey ru'in quiri' che jun ángel.

14 Roma ri ángeles e-espíritu, y erusamajela' ri Dios ri yetak richin yequito' ri xquecolotaj.