2 Peter 1 in Jakalteko

1 Hanin Simón Pedro intiꞌan, ismunlawom Comam Jesucristo yeb xin ischejabpaxo Comam wehan. Chintzꞌibn̈etojan huneꞌ carta tiꞌ teyet, hex xaheyayto yul heyanma yin̈ Comam Dios hacaꞌ han̈on̈tiꞌan̈. Haꞌ heyanma yin̈ Comam tuꞌ caw cꞌulchꞌancanoj hacaꞌ janmahan̈ yin̈ Comam, yuto caw han̈cꞌan̈e istoholal chiswatxꞌe Comam Dios yeb Cocolomal Jesucristo.

2 Akꞌlaxojab txꞌiꞌal iscꞌulchꞌanil iscꞌul Comam Dios yeb akꞌancꞌulal texol yuto heyohtaxa Comam Dios yeb Comam Jesucristo Jahawil.

3 Yu ishelanil yip Comam Dios, yuxin xayakꞌ Comam sunil tzet chiꞌocnico ju yun̈e ay cokꞌinal mach istan̈bal, yeb xin yu coyijen tzet chal Comam. Yakꞌ Comam huneꞌ tuꞌ jet yet johtan̈en̈ Comam Jesucristo, Comam con̈awten yu ishelanil yeb yu iscꞌulchꞌanil isye Comam jet.

4 Hac tuꞌ xin yu yakꞌni Comam huneꞌ yalte jet, huntekꞌan tzet caw cꞌulchꞌancanoj yeb caw ay yelapno yehi. Yun̈e huntekꞌan tzet yalte Comam tuꞌ, yuxin chicochah cokꞌinal yin̈ iskꞌinal Comam, hac tuꞌ xin yu cocolchalo yul iskꞌab isyahbetajil ay yul sat yiban̈kꞌinal tiꞌ yu istxꞌojal yanma anma.

5 Yuxin maẍn̈eojabtaj janico janma yin̈ Comam, wal xin caw yilal janico yin̈ cocꞌul cowatxꞌen cobeybal. Caw yilalpaxo cochꞌib yin̈ ishelanil conabal yin̈ Comam Dios,

6 yeb cocachni coba yin̈ tzet mach cꞌuloj, yeb niman chijute cocꞌul jakꞌni techaho isyaꞌtajil, yeb coyijen tet Comam Dios.

7 Chicoye iscꞌulchꞌanil cocꞌul yin̈ ebnaj juẍtaj yeb ebix janab yeb xin coxahann̈en anma sunil.

8 Ta chiilchalo huntekꞌan tiꞌ jin̈, yeb ta lan̈an cochꞌib yin̈, ay chon̈ocnico yul sat Comam Dios chal tuꞌ, mach nabn̈eho johtan̈elo Comam Jesucristo Jahawil.

9 Yaj wal mac mach chiꞌilchalo huntekꞌan tiꞌ yin̈ xin, lahan hacaꞌticꞌa mach chu ismujlito nahat, maca xin mach chu yilni. Xaisnahuln̈etoj tato txꞌahbilxalo hanta ismul ayco yin̈ yet yalan̈to tuꞌ.

10 Yuxin wal tinan̈ wuẍtaj, wanab, xaquexyawte Comam Dios, yeb xaquexsiqꞌuilo Comam yetoj, yuxin lahweco helin̈ban heba yin̈ huntekꞌan tiꞌ. Ta hac tuꞌ chewatxꞌe, maẍticꞌa chexaycꞌayi.

11 Hac tuꞌ xin chꞌakꞌlax sunil iscꞌulchꞌanil Comam jet, cat joccano yin̈ huneln̈e yul iskꞌab Comam Jesucristo Jahawil, Cocolomalpaxoj.

12 Yuxin ayinn̈eticꞌacojan walnihan teyet yun̈e henaniti huntekꞌan cuybanile tiꞌ, waxan̈ca caw yeli heyohtaj yeb xin lin̈anex yin̈ istꞌin̈anil.

13 Yakꞌ isba itzitz intohan, haꞌ huneꞌ chintxuman tinan̈, caw yilal quexwiptzencanojan yin̈ huntekꞌan cuybanile tiꞌ, yun̈e mach chicꞌayto heyu.

14 Yuto xayakꞌ Comam Jesucristo Jahawil intxumulojan tato matxa nimano tiempo ayinicꞌojan yul sat yiban̈kꞌinal tiꞌ.

15 Yuxin chiwaco yin̈ incꞌulan intzꞌibn̈encantojan huntekꞌan cuybanile tiꞌ teyet, hac tuꞌ xin chenati yin̈ sunilbal tiempo yetxa quinelan yul sat yiban̈kꞌinal tiꞌ.

16 Huneꞌ cuybanile akꞌbilxa teyet juhan̈ yin̈ tzet yelapno ye yip Comam Jesucristo, yeb xin yin̈ tzet chu yul Comam hunelxa, caw mach icꞌtiꞌoj, mach ton̈e nabilcan̈ juhan̈. Wal xin haꞌ caw han̈on̈an̈ jilan̈ yu isbakꞌ cosatan̈ iskꞌakꞌal yip Comam.

17 Jilan̈ yet yanico Comam Dios Mame ismay Comam Jesucristo, ishelni isba, yillax yin̈ Comam yet yelayti yaw xol moyan, yalni hacaꞌ tiꞌ: “Haꞌ naj tiꞌ Incꞌaholan, caw xahan ay wuhan, caw chintzalahan yin̈ naj,” ẍi Comam.

18 Han̈-caw-on̈an̈ jabehan̈ huntekꞌan tzotiꞌ ayilo yul satcan̈ tuꞌ yet ayon̈an̈ yeb Comam Jesús iswiꞌ huneꞌ witz caw txahul.

19 Haꞌ huneꞌ tuꞌ xin, caw cam chꞌakꞌni istꞌin̈anil Istzotiꞌ Comam tzꞌibn̈ebilcano yu ebnaj ischejab Comam yet payxa. Yuxin caw cꞌul yuto cheyaco heyanma hecuyni huntekꞌan tzotiꞌ tuꞌ, yuto hacaꞌ hunu lampara sakꞌal ismujli xol kꞌejholo masanto yet lan̈anxa issajbiloj yet chꞌahilo sajbes, hac tuꞌ xin yehi. Haꞌ huneꞌ tuꞌ chimujli yin̈ heyanma masanto chisajbilo yet chꞌahilo tzꞌayic. Haꞌ chal yelapno huneꞌ tzꞌayic tuꞌ, haꞌ ton yet chul Comam Cristo.

20 Haꞌ ebnaj ischejab Comam Dios yalan̈tocanoj istzꞌibn̈encano ebnaj yul Yum Comam yin̈ huntekꞌan tzet caw yilal yuli. Yaj caw yilal johtan̈eniloj tato machi hunu mac chisje istxumni yul yet ischuquil yin̈ tzet chiyal yelapno huntekꞌan tzet tzꞌibn̈ebilcano tuꞌ.

21 Yuto haꞌ ebnaj ischejab Comam tuꞌ caw machi hunu tzet ye tuꞌ isnati ebnaj yul yet ischuquil yet istzꞌibn̈encanoj, wal xin haꞌ Comam Dios akꞌni yohtan̈elo ebnaj yu Comam Espíritu Santo.